Kókshetaýda soǵylǵan kóliktiń ishinde qysylyp qalǵan júrgizýshi men jolaýshy qutqaryldy
KÓKShETAÝ. QazAqparat - Kókshetaýda qutqarýshylar jol apatyna ushyraǵan jeńil kólikti arnaıy quraldyń kómegimen kesip, ishinde qysylyp qalǵan júrgizýshi men jolaýshyny qutqardy, dep habarlaıdy QazAqparat tilshisi.
Aqmola oblystyq TJD baspasóz qyzmetiniń málimetinshe, bıylǵy jyldyń 17 qańtarynda polıtsııa qyzmetkerlerinen Kókshetaý qalasyndaǵy Nazarbaev dańǵyly men Ǵabdýllın kósheleriniń qıylysynda jol–kólik oqıǵasy oryn alyp, júrgizýshi men jolaýshy zardap shekkeni týraly habar túsken. Anyqtalǵandaı, «Aýdı» avtokóligi joldyń qarsy baǵytyna shyǵyp ketip, qalaishilik baǵyttaǵy 13-avtobýspen soqtyǵysqan. Jol apatynan jeńil kólik myjylyp, júrgizýshi men jolaýshysy qysylyp qalǵan.
«Oqıǵa ornyna dereý Kókshetaý qalalyq jedel-qutqarý jasaǵynyń 5 qyzmetkeri jetti. Olar bes mınýt ishinde jol-kólik oqıǵasynan qatty jaraqat alyp, esinen tanyp qalǵan 2001 jylǵy er adamdy syrtqa alyp shyqty. Sondaı-aq, qutqarýshylar kóliktiń artqy oryndyǵynda ıyǵy men qabyrǵalary synǵan 1980 jylǵy áıeldi qutqaryp, jedel járdem brıgadasyna tapsyrdy», - dedi vedomstvodan.
