Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Kókshetaýda qutqarýshylarǵa arnalǵan mýral paıda boldy

2021 jyldyń 19 qazan 2021 18:21

KÓKShETAÝ. QazAqparat - Qutqarýshylar kúni qarsańynda Kókshetaý qalasynda kópqabatty turǵyn úıdiń qasbetine qazaqstandyq qutqarýshylarǵa arnalǵan art-nysan salyndy, dep habarlaıdy QazAqparat tilshisi oblystyq ishki saıasat basqarmasyna silteme jasap.

Jambyl oblysynda oq-dári qoımasynda oryn alǵan órt pen jarylysty joıý kezinde qaza tapqan Túrkistan oblysy tótenshe jaǵdaılar departamentiniń órt sóndirý jáne azamattyq qorǵaý júıesi qyzmeti bastyǵynyń orynbasary, polkovnık Meıirjan Aımanov beınelengen mýral Abylaı han dańǵylyndaǵy 9 qabatty turǵyn úıdiń qasbetinde salyndy.

Batyr-qutqarýshynyń portretin Tótenshe jaǵdaılar departamenti men oblys ortalyǵy ákimdiginiń bastamasymen jergilikti «Design city» kompanııasynyń ujymy jasaǵan. Sýretshiler mýraldy salý úshin 5 kún jumys istedi.




Aqmola oblysy tótenshe jaǵdaılar departamentiniń bastyǵy Nurlan Atyǵaevtyń aıtýynsha, art-nysan batyrdy eske alý úshin jáne arnaıy kásibı mereke - Qutqarýshylar kúnine oraı, 19 qazan kúni ashylyp otyr.

«Qutqarýshylardyń jumysy óte qaýipti. Olar únemi ózgeniń ómirin saqtap qalý úshin óz bastaryn qaterge tigedi, olar qıyndyqtyń ne ekenin bilmeıdi. Bizdiń mindettimiz qaıtsekte adamdardy qaýip-qaterden qutqarý. Búginde oblysta 1377 órt sóndirýshi-qutqarýshy qyzmet atqarady. Osy ıgi iske qoldaý bildirgen qala basshylyǵyna alǵysymyz sheksiz», - dep atap ótti Nurlan Atyǵaev.

Turǵyndar da turǵyn úıdiń qabyrǵasyna sán berip turǵan strıt-art sýretin qoldap, búginginiń batyrlarynyń erligi maqtanyshqa aınalatynyn atap ótti.

«Órt sóndirýshiniń bul portreti halyqtyń nazaryn otpen abaılap jumys isteýge aýdarady jáne órt sóndirýshi mamandyǵyna degen qurmetti odan ári arttyrady dep úmittenemiz», - dep túsindirdi Kókshetaý qalasynyń turǵyny Azamat Baltabaev.

Aıta ketsek, Kókshetaý qalasyndaǵy 22 turǵyn úı alaby strıt-art kompozıtsııalarymen bezendirilgen.


Joǵary qaraı