Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qoqıqazdy kórý úshin astanalyqtar Taldykólge aǵylyp jatyr

2021 jyldyń 13 qyrkúıek 2021 17:33

NUR-SULTAN. QazAqparat – Nur-Sultan qalasynyń shet jaǵyndaǵy Kishi Taldykólge bir top qoqıqaz ushyp keldi. Osyǵan baılanysty atalǵan meken az ýaqyttyń ishinde elorda turǵyndary men qala qonaqtarynyń týrıstik jáne demalys ornyna aınalyp úlgerdi. QazAqparat tilshisi kólge kelgen jabaıy qustardyń tirshiligin óz kózimen kórip qaıtty.

«Qoqıqazdar bizdiń elge Afrıka, Túrikmenstan, Aýǵanstan elderinen ushyp keledi. Sáýir aıynda kelip, kún sýytqansha (qyrkúıek, qazan aılaryna deıin) bolady. Qoqıqazdardyń elordaǵa jaqyn jerdegi negizgi mekeni Qorǵaljyn qoryǵy, olarda sonda mekendep, kóbeıedi. Mamandardyń aıtýynsha, elimizge jyl saıyn 100 myńǵa jýyq qoqıqaz ushyp keledi eken. Onyń ishinde Aqmola, Qostanaı, Jambyl jáne Mańǵystaý oblysynyń aýmaǵyn mekendeıdi. Taldykólge kelsek, mamandardyń málimdeýinshe, munda kishi jáne úlken 100-den astam qus mekendeıdi. Onyń qatarynda qoqıqaz, aqqý, qaz, úırek, shaǵala, birqazan jáne taǵy basqa qustar bar. Taldykólge kelgen bul qoqıqazdyń bıylǵy balapandary. Olar jyly jaqqa ushpas buryn osyndaı kól men kólshikterge toqtap, ál jınap, odan ári ushady», - dedi eko-belsendi Sáken Dildahmet.







Onyń aıtýynsha, qoqıǵaz Qazaqstannyń Qyzyl kitabyna engizilgen jáne álemde onyń 10-nan astam túri bar.

Qazirgi ýaqytta Taldykólde 10-nan astam qoqıǵaz kelip, mekendep jatyr. Jáne atalǵan kólde qoqıǵazdan basqa da qustar bar.

Sonymen qatar, tabıǵat janashyry Taldykól mańyndaǵy qurylysqa qatysty alańdatýshylyq tanytty.

«Sońǵy jyldary Taldykóldiń mańynda qurylys jumystary qarqyndy júrip jatyr. Ókinishke qaraı, bul tumsa tabıǵat pen onyń mekendeýshilerdiń tynyshtyǵyn buzady. Sondyqtan da qurylys bastamas buryn qorshaǵan ortanyń erteńi men halyqtyń pikirin eskergen jón. 2000 jyldardyń basynda qalanyń ishine kıik, elik kelgen jaıttar da bolǵan. Al qazir barlyq jerde qurylys. Óz basym Taldykóldiń joıylýyna qarsymyn, kóldi saqtap qalý kerek», - deıdi ol.







Ushyp kelgenine 1-2 kún bolǵan qoqıqazdardy tamashalaýshy astanalyqtardyń sany kún sanap artyp jatyr. Qazirdiń ózinde Taldykól jaǵasynda 20 shaqty adam qustardyń tirshiligin tamashalap otyr.

«Kesheden beri áleýmettik jelide Astanaǵa qoqıqaz keldi dep shýlap jatyr. Jeliden foto, vıdeosyn kórip men de tamashalaýǵa keldim. Keremet kórinis. Jabaıy qustardyń qalanyń ishine kelgeni tańǵaldyrady. Mundaı tabıǵatty saqtap, qorǵaý kerek. Keıde biz ózimizde bar baılyqty baǵadaı bermeımiz», - dedi elorda turǵyny (aty-jónin kórsetpeýdi ótindi).







Rasynda da kesheli beri Taldykólge kelgen bir top qoqıqazdy tamashalap, onyń sýreti men vıdeosyn jelige jarııalaýshylardyń sany artqany baıqalady.

Eske sala ketsek, jýyrda elorda ákimdigi kópshilikti mazalap, jurtshylyqty tolǵandyrǵan Kishi Taldykól taǵdyryna qatysty resmı túsinikteme berdi.

«Áńgimeni Taldykól kóli men sýly-batpaqty Kishi Taldykólmen shatastyrmaý kerektiginen bastaǵym kelip tur. Elordanyń bas josparyna sáıkes, qalanyń shyǵysynda ornalasqan Taldykól kóliniń boıynda kópqabatty turǵyn úı salý josparlanyp otyr. Árıne, turǵyn úıden bólek, mektep, balabaqsha, emhana jáne basqa da áleýmettik nysandar turǵyzylmaq. Osy tusta aıtarym, kóldiń ózine tıispeımiz, kerisinshe onyń mańyna úı salyp, ınfraqurylymdy damytamyz. Sol sııaqty batpaqty las sýdy tazartýdy kóldi joıý dep túsinetin sekildi. Bizde kóldi joıý maqsaty joq, kerisinshe onyń las batpaqtan tazartyp, saqtap qalmaqpyz. Sebebi ekologııalyq kórsetkishter boıynsha onyń sýly-batpaǵy las ári zııan»,- degen edi Nur-Sultan qalasy sáýlet, qala qurylysy jáne jer qatynastary basqarmasynyń basshysy Nurlan Uranhaev elorda ákimdiginde ótken baspasóz máslıhatynda.














Avtor Álı Ibraev
Basty sózder: Nur-Sultan, Ekologııa, Qoǵam,
Joǵary qaraı