Aýa raıy
Astana 4 °S
Almaty 4 °S
valıýta baǵamy
USD 421.58
EUR 496.83
RUB 5.53
CNY 62.20

Qoǵamdyq baqylaý jemqorlyqpen kúreske septigin tıgizedi - Baný Nurǵazıeva

2020 jyldyń 23 qyrkúıek 2020 19:15

NUR-SULTAN. QazAqparat - Búgin Memleket basshysynyń Joldaýyn talqylaýǵa arnalǵan «Qoǵamdyq baqylaý: memlekettik organdarmen ózara is-qımyl tetikteri jáne zańnamalyq bekitý» taqyrybynda dóńgelek ústel otyrysy ótti. Onda Aqparat jáne qoǵamdyq damý mınıstri Aıda Balaeva Baný Nurǵazıevany «Qazaqstannyń Azamattyq alıansy» zańdy tulǵalar birlestiginiń prezıdenti laýazymyna taǵaıyndalýymen quttyqtady, dep habarlaıdy QazAqparat tilshisi.

Mınıstr alıans basshylyǵyna tájirıbeli adamnyń taǵaıyndalýy memlekettik organdar úshin de, jalpy alǵanda azamattyq sektor úshin de tıimdi bolatyndyǵyn basa aıtty.

«Azamattyq alıans tek bizdiń mınıstrliktiń ǵana emes, barlyq memlekettik organdardyń senimdi seriktesi ekendigin bilemiz», - dep atap ótti mınıstr.

Óz kezeginde Baný Nurǵazıeva el Prezıdentiniń qoǵamdyq baqylaý týraly zań jobasyn ázirleýge qatysty tapsyrmasy, eń aldymen, memlekettik apparat sapasynyń jaqsarý protsesin pash etetindigin jáne aldaǵy ýaqytta azamattyq sektordyń damýyna oń áserin tıgizetindigin atap ótti. Sonymen qatar ol «Halyq únine qulaq asatyn memleket» tujyrymdamasyn ilgeriletýdegi mańyzdy qadamnyń biri qoǵamdyq baqylaý sanalatyndyǵyn basa aıtty. Óıtkeni, atalǵan tujyrymdama bılik pen qoǵam arasyndaǵy ózara senimdi ornatýǵa septigin tıgizedi.

«Eń aldymen, qoǵamdyq baqylaý eldegi jemqorlyqtyń jolyn kesýdiń aldyn alý sharalarynyń biri sanalady», - dedi Baný Nurǵazıeva.

Onyń aıtýynsha, qoǵamdyq baqylaý týraly zań azamattyq qoǵam ınstıtýttary tarapynan baqylaýdy júzege asyrýdyń biryńǵaı quqyqtyq tetigin qurýǵa baǵyttalýy tıis. Sonymen qatar ol atalǵan zań jobasyn ázirleýge Qazaqstannyń Azamattyq alıansy belsendi qatysýǵa daıyn ekendigin aıtty.

Osy rette Aıda Balaeva spıkerdiń Qazaqstannyń Azamattyq alıansymen birge sapaly zań ázirleý jónindegi pikirine qoldaý kórsetti.


Joǵary qaraı