Kisi óltirgeni úshin 15 jyldan beri izdeýde júrgen Reseı azamaty Temirtaýdan ustaldy

QARAǴANDY. QazAqparat - Qaraǵandylyq polıtseıler kisi óltirdi degen kúdikpen on bes jyl boıy izdeýde júrgen Reseı azamatyn ustady, dep habarlaıdy QazAqparat tilshisi.

23 qarashada Qaraǵandy oblysy PD krımınaldyq polıtsııa basqarmasyna Samara oblysy boıynsha Reseı ІІM MM-nen asa aýyr qylmys jasady degen kúdikpen izdestirilip jatqan 43 jastaǵy Reseı azamaty Qaraǵandy oblysynyń aýmaǵynda bolýy múmkin degen aqparat kelip tústi.

Tergeý málimetine sensek, 2005 jyly ol Reseı Federatsııasynyń Samara oblysyndaǵy basqa seriktesterimen birigip Reseı azamatyn urlap ketken. Sosyn ony baltalap, óltirip tastaǵan.

Keıinnen jábirlenýshiniń máıitin órtep, jaqyn mańdaǵy sý qoımasyna muz astyna jasyrǵan.

Atalmysh derek boıynsha RF Qylmystyq kodeksiniń 105-baby 2-bóligi boıynsha qylmystyq is qozǵaldy.

«30 qarashada jedel izdestirý barysynda Qaraǵandy oblysy PD krımınaldyq polıtsııa basqarmasynyń qyzmetkerleri on bes jyl boıy Temirtaýda boı tasalaǵan reseılik azamatty anyqtap, ustady. Ol ýaqytsha ızolıatorǵa qamaldy» dep habarlady Qaraǵandy oblysy PD baspasóz qyzmeti.