Kenjeǵalı Saǵadıev memleketimizdi damytý isine mol úles qosty - Prezıdent
NUR-SULTAN. QazAqparat - Prezıdent Qasym-Jomart Toqaev asa kórnekti ǵalym, belgili qoǵam qaıratkeri, QR Ǵylym akademııasynyń burynǵy prezıdenti, ekonomıka ǵylymdarynyń doktory, professor Kenjeǵalı Ábenuly Saǵadıevtiń dúnıeden ótýine baılanysty onyń otbasy men jaqyndaryna kóńil aıtyp, jedelhat joldady, dep habarlaıdy Aqorda.
«Kenjeǵalı Ábenuly memleketimizdi damytý isine mol úles qosty. QR Ǵylym akademııasyna jáne Qazaq memlekettik agrarlyq ýnıversıtetine basshylyq jasady. Parlament Májilisiniń ІІІ jáne IV shaqyrylymdarynyń depýtaty bolyp, otandyq zańnamany jetildirýge atsalysty, uzaq jyldar boıy ustaz retinde shákirtter tárbıeledi. Artynda óshpes iz, ulaǵatty urpaq, ǵylymı mura qaldyrdy. Marqumnyń jany jánnatta, ımany salamat bolsyn», — delingen jedelhatta.
Aıta keteıik, keshe akademık Kenjeǵalı Saǵadıev 82 jasynda dúnıeden ótken bolatyn.
