Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Kelbeti kóz súısindirer Kókshetaýdyń kórikti oryndary qandaı – fotoreportaj

2021 jyldyń 28 qazan 2021 17:08

KÓKShETAÝ. QazAqparat - Aqmola oblysynyń ortalyǵy – Kókshetaý qalasy Táýelsizdiktiń 30 jyldyǵy ishinde biregeı sáýletimen, záýlim ǵımarattarymen, keń dańǵyldarymen, kók jelekke oranǵan gúlzarlary men saıabaqtarmen kórkeıip keledi. Osy rette QazAqparat tilshisi qaladaǵy negizgi kórneki oryndarǵa sholý jasaıdy.

Tý týǵyry

Kókshetaýdyń eń bıik núktesi Buqpa taýynyń tóbesine ornatylǵan 100 metrlik tý tuǵyry el men egemendik múddesinde bir týǵa jınalǵandyǵyn bildirse, ekinshisi eldiń egesi, kıesi baryn da alystan aıshyqtap turady. Qala turǵyndary men qonaqtary taýdyń basyna kóterilip, bıiktikten qalanyń ásem kórinisin tamashalaı alady.




Volashaq Saraiy

Kókshetaýdaǵy ásem ári qazirgi zamańǵy ǵımarattardyń biri – 2020 jyly Qazaqstan men Reseıdiń óńiraralyq yntymaqtastyq forýmyna daıyndyq aıasynda salynǵan balalar men stýdentterdiń «Volashaq Saraiy» saraıy der edik. Ǵımarattyń qurylys arhıtektýrasy zamanaýı sheshimdermen, erekshe formalarmen tolyqtyrylǵan jáne ázirleýshi kompanııanyń ınnovatsııalyq oılaýynyń joǵary deńgeıin kórsetedi. Germanııanyń zamanaýı jabdyqtarymen jabdyqtalǵan jáne óner men ǵylymnyń kez kelgen baǵytynda bilim berýdiń sheksiz múmkindikterine ıe. Munda oqýshylar men stýdentter óner, sport, ǵylymı-tehnıkalyq, IT baǵytynda ózderiniń daryndylyqtary men talanttaryn damyta alady. Ǵımarattyń aýlasyndaǵy túrli túske enetin sýburqaqta ádemi. Analar balalarymen birge bul jerde kóńildi ýaqyt ótkize alady.









Jaǵajaı

Sonymen birge Qazaqstan men Reseıdiń óńiraralyq yntymaqtastyq forýmy aıasynda salynǵan nysannyń biri – búgingi kúni qala turǵyndary men qonaqtarynyń demalyp, serýendeıtin súıikti orny Qopa kóliniń jaǵajaıy. Sýǵa túsip, kúnge qyzdyrynyp, kóńil sergiter jaǵajaıdyń ashylýy qala halqyna jańa bir tynys boldy. Uzyndyǵy 1,5 shaqyrym aýmaqty alyp jatqan jaǵajaıda amfıteatr, balalar men sport alańdary, velosıped joldary bar.







Amfıteatr

Qylshaqty ózeniniń Nazarbaev dańyǵyly arqyly ótetin kópir jáne Abylaı han dańǵyly arqyly ótetin tusynda ashyq aspan astyndaǵy amfıteatr da kókshetaýlyqtardyń keshkilik ýaqytta serýendip, sýretke túsetin súıikti ornyna aınalǵan.





NEKE Saraiý

Shyǵys sáýlet óneriniń klassıkalyq úlgisimen salynǵan jańa «NEKE Saraiý» neke saraıy. Ǵımarat alyp kıiz úı úlgisinde turǵyzylǵan. Sáýleti kelisken, qazirgi zaman talabyna saı mundaı ǵımarattar respýblıkanyń birqatar oblys ortalyqtarynda ǵana kezdesedi.





Qalaǵa kireberistegi qaqpa

Elimizdiń Táýelsizdigi men Kókshetaýdyń eńsesin kóterip turǵan nysandardyń biri Nur-Sultan baǵytynan qalaǵa kire beristegi qaqpa deýge bolady. Egemendik jyldary qol jetken jetistikterimizdi aıǵaqtaıtyn qaqpa búgingi Kókshetaýdyń kelbetin kelistirip aq tur. 2015 jyly turǵyzylǵan sáýlet qurylysynyń bıiktigi 15 metr, uzyndyǵy 40 metr. Orta tusynda úlken árippen «Kókshetaý» ataýy jazylǵan.




«Qoǵamdyq kelisim» saraıy

Kókshetaýdyń zamanýı úlgide salynǵan «Qoǵamdyq kelisim» saraıy óńirdegi túrli ult ókilderiniń basyn bir shańyraqtyń astyna uıystyrǵan oryndarynyń biri sanalady. Qopa kóliniń jaǵasynda ornalasqan ásem sáýlet nysany qala qonaqtary men turǵyndaryn anadaıdan ózine tartady. Al birlesken ómirge qadam basqan jas jubaılarǵa Dostyq úıiniń qasynda sýretke túsý – merekelik is-sharanyń ajyramas nyshany.











«Kókshetaý» mádenıet saraıy

Búgingi tańda Kókshetaýdaǵy áleýmettik-ekonomıkalyq sıpattaǵy nysandar qalpyna keltirilip, kúndelikti turmysqa qatysty túıtkildi máseleler sheshimin tabýda. Sonyń ishinde «Kókshetaý» mádenıet saraıy kúrdeli jóndeýden ótip, syrt kelbeti jarqyrap shyǵa keldi.




Saryarqa shaǵynaýdany

Kókshetaý qalasynda turǵyn úı qurylysy qarqyn alǵan. Ásirese, Qopa kóliniń ońtústik shyǵys jaq tusynda jańadan boı kótergen Saryarqa shaǵyn aýdanynda salynyp jatqan turǵyn úıler men áleýmettik nysandardyń sulýlyǵy erekshe. Qyzyl kirpishten salynǵan ásem úıler men taqtaıdaı tep-tegis joldar alystan kóz tartady.







Meshit pen sobor

Kókshetaýdyń taǵy bir arhıtektýralyq «marjany» - ol qalanyń qaq tórinde ornalasqan Naýan Haziret meshiti men Qopa kóliniń jaǵalaýynan oryn tepken Voskresenııa Hrıstova kafedaraldy sobory.









Joǵary qaraı