Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Keden salasyna keltirilgen shyǵyndar bıýdjetke qaıtarylady - Erulan Jamaýbaev

2022 jyldyń 19 mamyr 2022 10:58

NUR-SULTAN. QazAqparat – Keden salasyna keltirilgen shyǵyndar bıýdjetke tolyǵymen qaıtarylady. Bul týraly QR Premer-Mınıstriniń orynbasary – Qarjy mınıstri Erulan Jamaýbaev málim etti, dep habarlaıdy QazAqparat tilshisi.

Búgin Senatta tilshiler Qarjy mınıstrinen kedendegi zańsyzdyqtardan memleketke keltirilgen 165 mlrd teńge kólemindegi shyǵynǵa qatysty suraq qoıdy. Sonymen qatar bul zańsyz áreketterge kimder jaýapty ekeni suraldy.

«Qazir kedenge túsetin salyq qarajaty artyp keledi. Atap aıtqanda, bıyl Qarjy mınıstrligi 165 mlrd teńge kóleminde keltirilgen shyǵyndy bıýdjetke qaıtarýǵa barlyq kúsh jigerin salady. Bıylǵy josparymyzda onyń ornyn tolyǵymen toltyramyz», - dedi E. Jamaýbaev.

Degenmen, mınıstr keden salasyndaǵy zańsyzdyqtar boıynsha kimder kúdikke ilingenin naqtylap aıta almady.

«Bul derekterdi arnaıy komıssııa teksergen. Komıssııa Bas prokýratýranyń jetekshiligimen qurylǵan. Sondyqtan osyǵan qatysty másele quqyq qorǵaý organdarynyń quzyretine jatady. Bul turǵyda taýarlardy ákelgen kezde salyq nemese baj salyǵyn tolyǵymen tólemeý faktileri tirkeldi. Osy oraıda sol qarajatty qaıtarý bóliginde tıisti jumystar júrip jatyr», - dedi ol.

«Kóbinese jalǵan kásipkerlik uıymdastyrylǵan jáne bul fırmalar jabylyp qalǵan. Qazir olardy anyqtaý jumystary atqarylyp jatyr», - dedi Erulan Jamaýbaev.

Budan buryn habarlanǵandaı, Memlekettik kirister komıteti Bas prokýratýra janyndaǵy vedomstvoaralyq toptyń quramymen syrtqy ekonomıkalyq qyzmetke qatysýshylardyń, sondaı-aq Qytaı Halyq Respýblıkasymen shekaralas ótkizý pýnktteriniń qyzmetine birlesken tekserý júrgizdi .

«Úsh jyl ishindegi buzýshylyqtardyń jalpy somasy - 165 mlrd teńge. Budan basqa, 398 mlrd teńgege jalǵan elektrondyq shot-faktýralardy jazyp berý belgileri bar. Aldyn ala shyǵyn somasy – 128 mlrd teńge. Materıaldar qylmystyq is qozǵaý máselesin qaraý úshin quqyq qorǵaý organdaryna berildi. Sonymen qatar 151 ımporttaýshynyń jalǵan elektrondyq shot-faktýralar jazyp berý belgileri boıynsha materıaldary qarjy monıtorıngi agenttigine jiberildi», - delingen komıtet habarlamasynda.


Joǵary qaraı