Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazandaǵy qandy oqıǵadan keıin Jambyldaǵy mektepterde qaýipsizdik sharalary kúsheıtilýde

2021 jyldyń 13 mamyr 2021 06:15

TARAZ. QazAqparat – Tatarstannyń Qazan qalasyndaǵy mektepte oryn alǵan qaıǵyly oqıǵa barshany alańdatyp qana qoımaı, sabaq bolýy tıis. Osyǵan oraı Memleket basshysy Qasym-Jomart Toqaevtyń eldegi bilim berý mekemelerindegi qaýipsizdik sharalaryn barynsha kúısheıtýge qatysty tapsyrmasy boıynsha oblys ákimdiginde arnaıy shuǵyl jıyn ótti, dep habarlaıdy QazAqparat tilshisi.

Oblys ákimi Berdibek Saparbaevtyń tóraǵalyǵymen ótken otyrysqa tıisti memlekettik organdardyń basshylary qatysty.

«Barlyq bilim berý mekemelerinde qaýipsizdikti qamtamasyz etý sharalaryn nyǵaıtýǵa kóńil bólý kerek. Bul turǵyda aldymen mektepter men kolledjderde qaýipsizdik erejesi qanshalyqty saqtalyp otyrǵanyn tekserip alý – asa mańyzdy. Tótenshe jaǵdaılar departamenti bilim basqarmasymen birlesip, arnaıy oqý-jattyǵýlar ótkizgeni abzal. Qazir barlyq oqý oryndary beınekameralarmen qamtylǵanyn aıtyp júrmiz, biraq olardyń jumys isteý sapasy muqııat tekserilýi tıis. Ol kameralardy kim qarap otyr, jyldamdyǵy joǵary ınternetpen qamtylǵan ba, mektepterge kirip-shyǵyp jatqan adamdardy saralap otyrǵan bireý bar ma? Eń birinshi osy suraqtar boıynsha naqty jumys júrgizý kerekpiz»,- dedi aımaq basshysy.

Sondaı-aq, oblys ákimi mektep ákimshiligimen qatar ata-analardyń da balalary úshin jaýapkershiligin arttyra túsý qajettigin basa aıtty. Jas óspirimder arasynda zorlyq-zombylyq áreketterdi nasıhattaıtyn elektrondy saıttar men áleýmettik jelilerdegi paraqshalardy anyqtaý boıynsha sharalar da pysyqtaldy.

Budan bólek, aımaq basshysy aýdan ákimderine, TJD basshylyǵyna óńirde tilsiz jaýdyń aldyn alý, órt qaýipsizdigi erejeleriniń saqtalýyna barlaý jumystaryn barynsha kúsheıtýdi tapsyrdy.

Avtor Saıa Sembaı
Basty sózder: Ákim, Jambyl oblysy, Bilim,
Joǵary qaraı