Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qazaqstannyń energııa júıesi qalpyna keltirildi - Úkimet

2022 jyldyń 25 qańtar 2022 20:30

NUR-SULTAN. QazAqparat - Qazaqstannyń energııa júıesi qalpyna keltirildi,dep habarlaıdy QazAqparat QR Úkimetiniń resmı saıtyna silteme jasap.

Úkimettiń baspasóz qyzmetiniń málimetterine qaraǵanda, 2022 jylǵy 25 qańtarda saǵat 11:59-da (Nur-Sultan ýaqyty boıynsha) Ortalyq Azııanyń energııa júıesindegi elektr energııasyn tutynýdan generatsııanyń aıtarlyqtaı aýytqýyna baılanysty 500 kV «Qazaqstannyń Soltústik-Shyǵys-Ońtústik» elektr tranzıti shamadan tys júkteldi.

Elektr jelileriniń zaqymdalýyna jol bermeý jáne iri júıelik avarııany boldyrmaý maqsatynda «Qazaqstannyń Soltústik-Shyǵys-Ońtústik» elektr tranzıti avarııaǵa qarsy avtomatıkanyń durys jumys isteýi arqyly bólindi, bul Qazaqstannyń ońtústik aımaǵyndaǵy tutynýshylardyń toqtan tolyq ajyratylýyna jol bermedi. Shtattan tys jaǵdaı bolǵan kezde Qazaqstannyń ońtústik aımaǵyndaǵy tutyný kólemi 3200 MVt qurady.

Avarııaǵa qarsy avtomatıka áreketimen tutynýshylardy 1300 MVt kóleminde elektrmen jabdyqtaı otyryp, Jambyl GRES-i, Shymkent JEO-3, Qyzylorda JEO-6 jáne Almaty oblysynyń elektr stantsııalarynyń jumysyn tolyq toqtatýǵa jol berilmedi. Májbúrli shekteýler 1900 MVt qurady. 50 Gts normatıvtik jıilikte – Ortalyq Azııanyń energııa júıesindegi jıilik 47 Gts-ke deıin kúrt tómendedi, sonyń saldarynan Ózbekstan men Qyrǵyzstannyń energııa júıeleri tolyq óshirildi.

Saǵat 13:39-da Qazaqstannyń ulttyq elektr jelisiniń qalypty shemasy qalpyna keltirildi. Qyrǵyzstannyń energııa júıesimen qatarlas jumys qaıta jandandy. Saǵat 14:53-te Almaty qalasy men Almaty oblysy boıynsha barlyq shekteýler alynyp tastaldy. Saǵat 15:10-da Jambyl 500 kV, Shymkent 500 kV shaǵyn stantsııalaryna kerneý berildi. Qazaqstannyń ońtústik aımaǵynyń barlyq óńirleriniń tutynýshylaryn elektrmen jabdyqtaý 16:00-de qalpyna keltirildi.

Ýaqytyly qabyldanǵan sharalardyń arqasynda energııa júıesiniń qalypty rejımi jáne tutynýshylardy elektrmen jabdyqtaý qysqa merzimde qalpyna keltirildi. Ózbekstan men Qyrǵyzstannyń energııa júıesinde tutynýshylar toqtan tolyq óshirildi.

Qatarlas jumys aıasynda Qazaqstan tarapynan Ózbekstan Respýblıkasyndaǵy avarııany joıýǵa kómek kórsetilip jatyr, óńirlik stantsııalar kezeń-kezeńimen iske qosylyp, elektrmen jabdyqtaý qalpyna keltirilip jatyr.

Aıta keteıik, búgin saǵat 11.59-da (Nur-Sultan ýaqytymen) Ortalyq Azııa (Ózbekstan, Qyrǵyzstan) energııa júıesinde týyndaǵan aıtarlyqtaı apattyq teńgerimsizdiktiń saldarynan «Soltústik-Shyǵys-Qazaqstannyń ońtústigi» 500 kV elektr energııasy tranzıtine arnalǵan qýat tómendedi. Sonyń saldarynan «Soltústik-Shyǵys-Qazaqstannyń ońtústigi» tranzıtiniń apatty bólinýi oryn alyp, Qazaqstannyń ońtústik aımaǵyndaǵy tutynýshylardyń basym bóligi úshin jaryq óshkenin habarlaǵan bolatynbyz.



Basty sózder: Energetıka, QR Úkimeti,
Joǵary qaraı