Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qazaqstanmen aradaǵy yntymaqtastyqty odan ári nyǵaıtýǵa daıynbyz – Eýropa keńesi

2022 jyldyń 10 qańtar 2022 22:05

NUR-SULTAN. QazAqparat - Memleket basshysy Qasym-Jomart Toqaev Eýropalyq keńestiń prezıdenti Sharl Mıshelmen beınebaılanys rejıminde ekijaqty kelissóz júrgizdi. Vırtýaldy kezdesý eýropalyq taraptyń bastamasymen ótti, dep habarlaıdy Aqordanyń baspasóz qyzmeti.

Ózara dostyq pen senimge negizdelgen áńgimelesý barysynda taraptar Qazaqstandaǵy qazirgi ishki saıası ahýaldy jáne Qazaqstan men Eýropalyq Odaq arasyndaǵy strategııalyq seriktestiktiń damý perspektıvalaryn talqylady.




Sharl Mısheldiń ótinishi boıynsha Qasym-Jomart Toqaev elimizdegi qazirgi oqıǵalardyń sebepteri men qabyldanyp jatqan memlekettik sharalar jóninde málimet berdi. Prezıdent konstıtýtsııalyq qurylysqa nuqsan keltirip, memlekettik tóńkeris jasaýǵa umtylǵan terrorıster men buzaqylardyń zorlyq-zombylyq áreketteri týraly aıtty.

Prezıdent bolǵan qaıǵyly oqıǵalardy asa aýyr agressııalyq akt jáne memlekettiligimizge jasalǵan qastandyq dep atady. Sondaı-aq lańkesterdiń zorlyq áreketteri saldarynan kóptegen quqyq qorǵaý qyzmetkerileri men beıbit turǵyndardyń qurban bolǵanyn, 1300-ge jýyq kásipkerlik nysanǵa zalal kelgenin, 100-den astam saýda ortalyǵy men bankterdiń tonalǵanyn, 500-ge jýyq polıtsııa mashınasy órtengenin aıtty. Qasym-Jomart Toqaevtyń baǵalaýynsha, memlekettiń aldyn ala ekonomıkalyq shyǵyny 2-3 mıllıard AQSh dollaryn quraıdy.

– Munyń terrorlyq shabýyl ekenine eshqandaı kúmánim joq. Bul – Qazaqstanǵa qarsy jaqsy uıymdasqan, ábden daıyndalǵan agressııalyq akt. Shabýyl jasaǵandardyń ishinde basym kópshiligi Ortalyq Azııa elderinen, onyń ishinde Aýǵanstannan kelgen sheteldik sodyrlar bar. Sonymen qatar arasynda Taıaý Shyǵystan kelgen sodyrlar da bar. Olardyń pıǵyly bizdiń aýmaqty baqylaýda ustaıtyn haos aımaǵyna aınaldyrý, sodan keıin bılikti basyp alý boldy. Sondyqtan Qazaqstanda lańkestikke qarsy operatsııa bastaldy, – Memleket basshysy.




Qasym-Jomart Toqaev el aýmaǵyna UQShU-nyń bitimgerlik kúshteri quramynyń ornalastyrylýy jóninde naqty túsindirme jasady.

– Bitimgerlik kúshteri áskerı operatsııalarǵa qatyspaıtynyn ashyp aıtqym keledi. Olardyń negizgi mindeti – Almaty qalasy men Qazaqstan astanasyndaǵy strategııalyq nysandardy qorǵaý. Bul qazaqstandyq kúshtik qurylymdardyń lańkesterge qarsy is-qımyldaryn júzege asyrýyna múmkindik beredi. UQShU-nyń bitimgerlik kúshteri UQShU Ujymdyq qaýipsizdik týraly sharttyń 2-shi jáne 4-shi baptaryna sáıkes ornalastyryldy. Olar Qazaqstandaǵy jaǵdaı tolyq turaqtanǵansha bolady, – dedi Qazaqstan Prezıdenti.

Memleket basshysy Qazaqstan óziniń halyqaralyq mindettemelerin saqtaýǵa beıil ekenin atap ótip, Eýropalyq Odaqtyń ınstıtýttarymen jáne oǵan múshe memlekettermen aradaǵy yntymaqtastyqty odan ári damytýǵa daıyndyǵyn naqtylady.




Qasym-Jomart Toqaevtyń málimetin muqııat tyńdaǵan Sharl Mıshel elimizdegi sońǵy oqıǵalar týraly egjeı-tegjeıli bilýge múmkindik bergen osy vırtýaldy kezdesýdiń zor paıdasy bolǵanyn aıtty. Ol Qazaqstandaǵy oqıǵalarǵa qatysty ártúrli túsindirmelerden góri osylaı shynaıy aqparat alýdyń mańyzdy ekenine toqtaldy.

– Biz Sizdiń elińizdiń egemendigi men aýmaqtyq tutastyǵyn qoldaımyz. Qazaqstanmen aradaǵy yntymaqtastyqty odan ári nyǵaıtýǵa daıynbyz, – dedi Eýropalyq keńestiń prezıdenti.

Kelissóz qorytyndysy boıynsha taraptar syrtqy qurylymdar deńgeıinde turaqty baılanys jasap turýǵa ýaǵdalasty.


Joǵary qaraı