Qazaqstandyqtardyń ortasha jalaqysy 285,5 myń teńgeni qurady

NUR-SULTAN. QazAqparat – Bıylǵy birinshi toqsanda qazaqstandyqtardyń ortasha aılyq jalaqysy 285,5 myń teńge boldy, dep habarlaıdy QazAqparat QR Strategııalyq josparlaý jáne reformalar agenttigi Ulttyq statıstıka bıýrosyna silteme jasap habarlaıdy.

«2022 jylǵy І toqsanda bir qyzmetkerdiń ortasha aılyq ataýly jalaqysy 285433 teńgeni qurady», - delingen statıstıkalyq málimette.

2021 jyldyń tıisti toqsanymen salystyrǵanda jalaqynyń eń kóp ósimi qurylys (33,7%), memlekettik basqarý (33,1%), kólik jáne qoımalaý (30,4%), aqparat jáne baılanys (26,6%) salalarynda baıqalǵan. Bilim berýde ortasha aılyq jalaqy 21,7%, densaýlyq saqtaý jáne halyqqa áleýmettik qyzmet kórsetýde 18,1% ósken.

Salalar boıynsha eń joǵary eńbekaqy:

- taý-ken óndirý jáne karerlerdi qazý ónerkásibinde – 619,4 myń teńge (ortasha respýblıkalyq deńgeıden 2,2 ese joǵary);

- qarjy jáne saqtandyrý qyzmetinde – 521,1 myń teńge (1,8 ese joǵary);

- kásibı, ǵylymı jáne tehnıkalyq qyzmette – 416,4 myń teńge (1,5 ese joǵary);

- aqparat jáne baılanys salasynda – 415,5 myń teńge (sáıkesinshe 1,5 ese).

Eń tómengi jalaqy:

- aýyl, orman jáne balyq sharýashylyǵy qyzmetkerlerinde – 144,1 myń teńge;

- óner, oıyn-saýyq jáne demalys salasynda – 169,6 myń teńge.

Óńirler boıynsha eń joǵary aılyq Atyraý oblysynda belgilendi – 477,9 myń teńge (ortasha respýblıkalyq kórsetkishten shamamen 1,7 ese joǵary). Eń tómen aılyq – Soltústik Qazaqstan oblysynda – 203,4 myń teńge (el boıynsha ortasha deńgeıden 28,7% tómen).