Aýa raıy
Astana -2 °S
Almaty 5 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstandyqtar satyp alatyn kóliktiń teń jartysy otandyq óndiriste qurastyrylǵan

2020 jyldyń 17 qyrkúıek 2020 12:11

NUR-SULTAN. QazAqparat – Qazaqstandyqtar satyp alatyn kóliktiń árbir ekinshisi otandyq óndiriste qurastyrylǵan. Bul týraly Qazaqstan mashına jasaýshylarynyń VIII forýmynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Búginde satyp alynǵan kóliktiń árbir ekinshisi otandyq óndiriste qurastyrylǵan kólik sanalady. Bul birlesken jemisti jumystyń tamasha kórsetkishi. Buǵan qosa, qazaqstandyq avtoónerkásip ónimderi eksporttyq naryqqa da shyǵyp otyr. Osy jyldyń 8 aıynda ǵana elimizde 341,2 mlrd teńge somaǵa 45 myń avtomobıl shyǵaryldy. Onyń 4,7 myńnan astamy Reseı, Belarýs jáne Ózbekstanǵa eksporttaldy. Mundaı kórsetkishke ishki ósim rezervin yntalandyrýdyń arqasynda qol jetkizildi», - dedi mınıstr.

Onyń atap ótýinshe, qazirgi ýaqytta jeńildetilgen avtokredıt pen jeńildetilgen lızıng baǵdarlamasy jumys istep otyr. Atalǵan baǵdarlama aıasynda 5 jylǵa 50 mlrd teńge bólindi. Bul qarajat otandyq kásiporyndarǵa 98,6 mlrd teńge somaǵa 19 myń kólik quralyn qurastyrýǵa múmkindik berdi.

«Halyq tarapynan týyndyǵa úlken suranysty qanaǵattandyrý úshin ótken jyly Ulttyq bank jeńildetilgen avtokredıt baǵdarlamasyn iske qosyp, onyń aıasynda 5 jylǵa, ıaǵnı jyl saıyn 20 mlrd teńgeden taǵy 100 mlrd teńge bólindi. Atalǵan baǵdarlama aıasynda qazirdiń ózinde 40 mlrd teńge somaǵa 7,1 myń avtomobıl satyldy», - dedi Beıbit Atamqulov.

Buǵan qosa, mınıstrdiń aıtýynsha, 2018-2020 jyldary eskirgen avtobýs parkin jańartý baǵdarlamasy aıasynda 33,5 mlrd teńge bólindi. Bul qarajat elimizdiń óńirlerine 1 350 avtobýs satyp alýǵa múmkindik berdi. Bıyl qosymsha 10 mlrd teńge bólinip otyr.


Joǵary qaraı