Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstandyqtar qoǵamdyq keńesterdiń kómegine biryńǵaı portal arqyly júgine alady

2021 jyldyń 22 qyrkúıek 2021 18:04

NUR-SULTAN.QazAqparat - Búgingi tańda Qazaqstanda qoǵamdyq keńester ınstıtýtyn damytýǵa baǵyttalǵan joba iske asyrylyp jatyr.

Onyń basty mindeti – qoǵamdyq keńesterdiń turǵyndarmen keri baılanysýyna arnalǵan mehanızmderdi qalyptastyrý maqsatynda Kazkenes saıtynyń fýnktsıonalyn keńeıtý jáne jetildirý. Qoıylǵan mindetterdiń qalaı oryndalyp jatqany týraly bizge joba basshysy Erik Batyrhanov aıtyp berdi, dep habarlaıdy QazAqparat.

Azamattyq bastamalardy qoldaý ortalyǵynyń Basqarma tóraǵasy Lıma Dıas «TALAP qoldanbaly zertteýler ortalyǵy» qoǵamdyq qoryna baryp, qoǵamdyq keńester ınstıtýtyn damytýǵa baǵyttalǵan jobanyń iske asý barysymen tanysyp qaıtty. Joba Azamattyq bastamalardy qoldaý ortalyǵynyń jáne Qazaqstan Respýblıkasy Aqparat jáne qoǵamdyq damý mınıstrliginiń qoldaýymen júzege asyrylýda.

Joba jetekshisi, «TALAP qoldanbaly zertteýler ortalyǵy» QQ taldaýshysy Erik Batyrhanovtyń aıtýynsha, qazirgi ýaqytta elimizdiń barlyq oblystary men qalalaryndaǵy qoǵamdyq keńesterdiń qyzmetin aqparattandyratyn biryńǵaı portaldy iske qosýǵa daıyndyq jumystary júrgizilip jatyr. Portal halyqpen keri baılanystyń jaqsy quraly bola alady.

«Naýryzdan bastap biz aqparatty jınaý, saıt fýnktsıonalyn jetildirý jumystaryn júrgizip kelemiz. Búgin kazkenes.kz portalyn iske qosý sharalarynyń 90% astamy aıaqtaldy. Portalda respýblıkalyq, óńirlik qoǵamdyq keńesterdiń jańalyqtarymen, aqparattyq nemese ádistemelik materıaldarymen, esepterimen, qujattarymen tanysyp qana qoımaı, olardyń quramy týraly aqparat alýǵa bolady. Árbir qazaqstandyq «Máseleli suraqtar» bólimindegi arnaıy nysandy toltyryp, ártúrli salalardaǵy problemalar boıynsha respýblıkalyq, oblystyq nemese aýdandyq deńgeıdegi qoǵamdyq keńesterdiń kómegine júgine alady.

Bul joldardyń nashar jaǵdaıyna, aýyz sýdyń sapasyna, memlekettik qyzmetterdiń tıisti deńgeıde kórsetilmeýine qatysty máseleler bolýy múmkin. Azamattar munda tipti, bul máselelerdi sheshý joldaryn usyna alady. Budan ári toltyrylǵan nysan «máseleni suraqtardyń tizilimine» engizilip, barlyq turǵyndarǵa kórinetin bolady. Júıe qaı oblysta qandaı problemanyń basym ekenin jáne máseleniń sheshilgenin ne sheshilmegenin kórsetedi. Muny keri baılanys formasy retinde baǵalaý kerek. Biz ony qoǵamdyq keńester qyzmetiniń ashyqtyǵy úshin ázirledik»,- dedi Erik Batyrhanov.

Budan bólek, jobany iske asyrý aıasynda qoǵamdyq keńesterdiń ishki portaly ázirlendi. Ol atalmysh organnyń múshelerine bir-birimen tyǵyz baılanysta jumys isteýge kómektesedi. Kommýnıkatsııanyń barlyq túrleri bir portalda usynylǵan.

Joba jetekshisiniń aıtýynsha, ol QK jumysyn jeńildetý úshin ázirlengen.

«Іshki portal ozyq tehnologııalardyń negizinde ázirlendi. Ol – ishki jumysqa arnalǵan portal. Biz ony keńes músheleriniń ishki kollaboratsııasy úshin ázirledik. Munda olar eseptermen, qujattarmen almasady. Portalda jeke, toptyq chattarda hat almasý, sondaı-aq beınekonferentsııa qurý qarastyrylǵan. Munyń barlyǵy bir jerde jınalǵan. Dálirek aıtqanda, ishki portal ózara jumystyń óte yńǵaıly quraly bola alady», - dedi ol.

Qazirgi ýaqytta barlyq deńgeıdegi qoǵamdyq keńes múshelerine onlaın semınarlar ótkizý sharalary jalǵasýda. Semınarlar barysynda saıt paıdalanýshylary kazkenes biryńǵaı portalynyń jańa fýnktsıonalymen tanysa alady.

Qoǵamdyq keńester – Qazaqstan Respýblıkasynyń Prezıdentine tikeleı baǵynyshty jáne esep beretin organdar, sondaı-aq jergilikti memlekettik basqarý organdary óz quzyretindegi máseleler boıynsha quratyn konsýltatıvtik-keńesshi, baıqaýshy organdar.

2016 jyldan bastap qoǵamdyq keńester Úkimet quramyna kiretin barlyq organdardyń, sondaı-aq oblystar men respýblıkalyq mańyzy bar qalalar ákimdikteriniń janynan quryldy. Atalmysh organdar kvazımemlekettik qurylymdarda da belsendi túrde qurylýda.

Qoǵamdyq keńester qyzmetiniń maqsaty – azamattyq qoǵamnyń qoǵamdyq mańyzdy máseleler boıynsha pikirin bildirý.


Basty sózder: Qoǵam,
Joǵary qaraı