Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstandyq sýretshi  áıgili Louis Vuitton-nan shaqyrý aldy

2021 jyldyń 10 maýsym 2021 11:35

LONDON. QazAqparat – Qazaqstandyq sýretshi áıgili Louis Vuitton sán úıinde qyzmet etýge shaqyrtý aldy. Aneılıa Ibraımova Ulybrıtanııa, Ońtústik-Afrıka men Irlandııadaǵy tanymal saýda jelileri men sánqoılarǵa arnap qol sandyqtaryn bezendiredi, dep habarlaıdy QazAqparat tilshisi.

24 jastaǵy jas talant Aneılıa Qaraǵandynyń týmasy, sońǵy on jyldan beri Londonda turady. Sýret ónerin osy jaqta meńgergen. Eki jyl buryn áıgili Louis Vuitton sán úıine qarapaıym satýshy bolyp jumysqa turǵan ol, keıin dızaıner retinde baıqaýda baq synap kóredi.

«Eki aıǵa sozylǵan qatal irikteýden óttim. Ulybrıtanııa jáne Eýropa elderiniń sýretshileri arasynan tańdap alynǵan 17 dızaınerdiń biri bolǵanyma sheksiz rızamyn. Ártúrli ıdeıalardy dúnıege ákelemiz. Klıentterdiń nazaryn aýdarý úshin jáne Louis Vuitton saýdasyn júrgizý úshin kreatıvti usynystar daıyndaımyz», - deıdi jas sýretshi.




Qylqalamnyń has sheberi qazir Louis Vuitton-nyń áıgili qolsandyqtaryn bezendiredi. Jalpy sán úıiniń sheberhanasyna kirýge ruqsat joq - óndiristik qupııa. Biraq Aneılıa bizben jeke qoryndaǵy fotolarmen bólisti.

Aınelıanyń árbir sýreti qaıtalanbas dúnıe. Sondyqtan olardy satyp alýǵa tanymal tulaǵalar da, ónerge qushtar jandar da asyq. Myna bir qolsandyqta Vıktorııa patshaıymnyń táji beınelengen. Qylqalam sheberi ony túpnusqaǵa uqsatyp, dálme-dál jetkizýge tyrysqan.




Aneılıanyń anasy Záýre Muhamadıeva Londonda konsaltıng salasynda eńbek etedi. Bastapqyda qarjyger bolýyn qalaǵan ol qyzynyń shyǵarmashylyqqa jaqyn ekendigin baıqap, júregi qalaǵan mamandyqqa beripti.




«Qyzymnyń osyndaı dárejege jetkenine óte rızamyn. Negizinen, bul onyń jeke basynyń jetistigi. Ol - óte eńbekqor adam. Árdaıym maqsatyna jetýdi kózdeıdi jáne jetedi. Ómirde bastysy jalqaýlanbaý kerek. Bıik maqsattar qoıyp, umtyla bilý qajet. Shetelde básekelestik óte joǵary. Biraq adam eńbek etip, umtyla bilse, árdaıym maqsatyna jetedi. Barlyqtaryńyzǵa aıtarym, jas daryndardy qoldaı bileıik», - deıdi Aneılıanyń anasy, jeke kásipker Záýre Muhamadıeva.




Aneılıa jeke shyǵarmashylyǵyn da damytyp keledi. Ol kúzge qaraı Londonda óz kórmesin ashýdy josparlap otyr. Jeke týyndylaryn qaıyrymdylyq aýktsıonyna shyǵaryp, odan túsken qarajatty jergilikti ǵıbadathanany jóndeý jumystaryna jumsamaq.

Sýretshi týǵan jerimen de baılanysyn úzbeýge tyrysady. Bolashaqta Qazaqstanda jeke kórmesin ashqysy bar. «Men árdaıym Qazaqstanmen baılanysta bolǵym keledi. Óıtkeni Otanym meni qanattandyrady jáne patrıottyq sezimim eshqaıda ketpek emes», deıdi Aneılıa.


























Avtor Ǵalymjan Qaramanuly
Basty sózder: Qoǵam, Álem,
Joǵary qaraı