Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstandyq serıaldardyń YouTube vıdeohostıngindegi tanymaldyǵy ósýde

2021 jyldyń 16 qazan 2021 16:16

NUR-SULTAN. QazAqparat - Aqparat jáne qoǵamdyq damý mıntstrliginiń tikeleı qoldaýymen jasalǵan «Qazaqstan» jáne «Habar» telearnalarynyń qazaqstandyq serıaldary YouTube-te tanymaldylyqqa ıe bolýda, dep habarlaıdy QazAqparat.

Máselen, qyrkúıek aıynda «Habar» kórermenderi arnany 14 mıllıon saǵattan astam ýaqytty «tamashalady». Búgingi tańda Agenttiktiń vıdeohostınginde 8,5 mıllıon biregeı kórermen bar.

Youtube platformasynda 5,4 mıllıonnan astam tirkelýshi (kórermen) bar «Qazaqstan» telearnasynyń da nátıjeleri óte jaqsy.

Aıtalyq, «Qazaqstan» telearnasynyń 100 serııaly «Zamandastar» hıkaıasy YouTube-te 17 mıllıonnan astam qaralym jınady. Jalpy alǵanda, platformada serıaldyń barlyq kórinisteriniń uzaqtyǵy 17045 saǵatqa jetti. Serıaldy qazaqstandyqtar ǵana emes, Qyrǵyzstan, Reseı, Mońǵolııa, Qytaı, Ózbekstan jáne AQSh kórermenderi tamashalady.

Serıal el Táýelsizdiginiń 30 jyldyǵy qarsańynda túsirildi. Onda qazaqstandyqtarǵa memlekettiń Egemendik alǵannan keıingi oń ózgeristeri týraly aıtylady. Basty keıipkerler búkil elmen birge tabys pen qıyndyqtardy bastan keshken ártúrli urpaq ókilderi.

YouTube qoldanýshylary atalmysh serıalǵa túrli pikir bildirerde: Qazaqstanda kınoındýstrııa qarqyndy damyp kele jatqanyn, al serıalda rólge jaqsy úılesken sheber artıster túskenin atap ótken.

Buryn-sońdy bolmaǵan premeralardyń minsiz maýsymyn «Habar» telearnasy tanystyrdy. Kórermen kózaıymyna aınalǵan «Kelinjan-3» serıaly rekordtyq qaralym sanyn jınap, YouTube vıdeohostıngi trendterine kirdi.

Otbasylyq qundylyqtardy dáripteıtin súıikti «Kelinjan-3» komedııasynyń jalǵasy barlyǵy 15 serııa boıynsha 26 mıllıonnan astam qaralym jınady. Tikeleı kórsetilim (translıatsııa) barysynda serıal YouTube trendteriniń alǵashqy qatarlaryn turaqty túrde ustap turdy. Qazaqstandyq otbasynyń ómirin álemniń 50-ge jýyq eli kórip otyrdy: serıal otandyq kórermen qatar Qyrǵyzstan, Reseı, Ózbekstandyq kórshilerimiz arasynda da úlken suranysqa ıe boldy. Sonymen qatar, AQSh, Mońǵolııa, Koreıa Respýblıkasy, Túrkııa, Ulybrıtanııa jáne basqa da elderdiń kórermenderi de «Kelinjan-3» januıasymen birge jylap, kúlip otyrdy.

«Habar» telearnasyndaǵy osy kúzdiń taǵy bir premerasy – «Raýza» telehıkaıasy - YouTube-te 19 mıllıonnan astam ret qaralǵan. 40 eldiń kórermenderi súıikti keıipkerlerine 5 mıllıon saǵat boıy janashyrlyq tanytty, al bul 16 serııany kórý ýaqytyn quraıdy.

«Habar» telearnasy jańa premeralarmen qýantýdy jalǵastyrýda. Qazir kórermender nazaryna qoryqshynyń moraldyq-adamgershilik qundylyqtary men qaýipti jumysynyń qyr-syry týraly baıandaıtyn «Qaqpan» hıkaıasy usynyldy.

Óz kezeginde YouTube qoldanýshylary kóptegen oń pikirler bildirip, ózderiniń súıikti serıaldaryn jalǵastyrýdy suraıdy.

Aıta keteıik, QR Aqparat jáne qoǵamdyq damý mınıstrliginiń qoldaýymen El Prezıdentiniń aqparattyq kontentti ıdeologııalyq tolyqtyrý jónindegi ózekti tapsyrmalary aıasynda otandyq telearnalar belsendi sharalar qabyldaýda.

Atap aıtqanda, aǵymdaǵy jyly tarıhı baǵyttaǵy serıaldyq ónimderdi óndirý boıynsha jumystar josparly túrde júrgizilýde, bul atalǵan taqyryptyń úlesin 30% - ǵa arttyrýǵa múmkindik beredi.


Joǵary qaraı