Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstandyq ǵalymdar jara men kúıikti jazatyn birneshe ınnovatsııalyq qural oılap tapty

2021 jyldyń 15 qazan 2021 10:09

NUR-SULTAN. QazAqparat - QR BǴM Ulttyq bıotehnologııa ortalyǵynyń ǵalymdary tereń jaralar men kúıikterdi emdeýge arnalǵan birneshe ınnovatsııalyq qural ázirledi, dep habarlaıdy QazAqparat.

QR BǴM Ulttyq bıotehnologııa ortalyǵynyń ǵalymdary tereń jaralar men kúıikterdi emdeýge arnalǵan birneshe ınnovatsııalyq qural ázirledi. Olardyń biri – X-Graft bıologııalyq jabyny. Ol klınıkalyq zertteýlerden ótip, kóp uzamaı Qazaqstan Respýblıkasynda tirkeledi. Zertteý nátıjeleri atalǵan bıologııalyq materıaldy qoldaný jarany emdeý protsesin edáýir tezdetetinin kórsetti. Sonymen qatar naýqastardyń aýrýhanada emdelý kezeńin qysqartady.

«Ortalyq ǵalymdary ázirlegen X-Graft jabyny zamanaýı ınjenerlik tehnologııalar kómegimen kollagen jáne elastın talshyqtarynan jasalǵan. Tańý materıaly tereń jáne uzaq ýaqyt emdelmeıtin jaralarǵa arnalǵan, sonymen qatar trofıkalyq jaralardy ýaqytsha tańý úshin qoldanylady. Jabyn qoldanysta yńǵaıly, dáke tańǵyshpen salystyrǵanda jaranyń betine jabyspaıdy. Emdik qasıetteri boıynsha atalǵan bıologııalyq jabyn sheteldik analogtardan kem túspeıdi jáne beriktigi joǵary, ıkemdi ári absorbtsııaǵa ıe», – dedi QR BǴM Ulttyq bıotehnologııa ortalyǵynyń bas dırektory Erlan Ramanqulov.

Sondaı-aq Ulttyq bıotehnologııa ortalyǵynyń ǵalymdary tereń jaralar men kúıikterdi emdeýge arnalǵan «Fıbrospreı» jasýshalyq preparatyn oılap tapty. Aerozol adamnyń teri jasýshalarynyń (fıbroblasttar) sýspenzııasynan turady jáne jaranyń saýyǵý protsesin eki ese jyldamdatady. Sonymen qatar klınıkalyq tájirıbede bul preparat teri transplantatsııalaryn tezdetý úshin qoldanylady.

Ortalyq ǵalymdary sonymen qatar baǵanaly jasýshalardy qoldaný arqyly kúrdeli synyqtar men zaqymdalǵan tize býyndaryn qalpyna keltirý tehnologııasyn jasady. Klınıkaǵa deıingi synaqtardyń nátıjeleri boıynsha bıokompozıtti jasýshalyq gıdrogel joǵary tıimdiligin kórsetti. Gıdrogeldiń quramyndaǵy baǵanaly jasýshalar súıek nemese shemirshek tinderiniń qalpyna kelý protsesin tezdetedi. Arnaıy tehnologııanyń arqasynda preparat operatsııadan keıin úsh-alty aı ishinde zaqymdalǵan súıek pen shemirshek tinin qalpyna keltiredi.


Joǵary qaraı