Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstandaǵy Baby-boom: 1987 jylǵy rekord jańartyldy

2021 jyldyń 28 aqpan 2021 13:21

NUR-SULTAN. QazAqparat – 2020 jyly Qazaqstanda 400 myńnan astam bala dúnıege keldi. Osy oraıda demografııa salasyndaǵy sarapshy pandemııaǵa qaramastan Qazaqstanda bala týý kórsetkishindegi dúmpýge qatysty oıymen bólisti, dep habarlaıdy QazAqparat tilshisi.

QR Strategııalyq josparlaý jáne reformalar agenttigi Ulttyq statıstıka bıýrosynyń málimetinshe, 2020 jylǵy qańtar-jeltoqsandaǵy aldyn ala derekter boıynsha, elimizde 425,6 myń náreste dúnıege keldi. Bul 2019 jyldyń tıisti kezeńimen salystyrǵanda 22,6 myń adamǵa nemese 5,6 paıyzǵa jáne 1987 jylmen salystyrǵanda 8,5 myń adamǵa nemese 2 paıyzǵa (týǵandar sany boıynsha aldyńǵy rekord 417,1 myń adam bolǵan) kóp.

«Ósim dúnıege keletin sábılerdiń kútilgen sanynan joǵary boldy. Tolyqtaı alǵanda, demografııalyq boljamǵa sáıkes, týý sanynyń tómendeýi kútilgen edi. Jalpy, otbasydaǵy úshinshi, tórtinshi, besinshi balalardyń sany artyp keledi. Bosanatyn qyz-kelinshekterdiń negizgi jas toby – 30-40 jastyń aralyǵy. Bul 80-shi jyldardyń býyny ózderiniń reprodýktıvtilik kezeńin paıdalanýyna baılanysty», - dedi «Bolashaq» baǵdarlamasynyń túlegi, demografııa magıstri Aıaýlym Saǵynbaeva.

2020 jyldyń 12 aıynda qalalyq jerlerde týǵandar sany – 248,7 myń adam nemese 58,4 paıyz, aýyldyq jerlerde 176,9 myń adam nemese 41,6 paıyz boldy. Dúnıege kelgen sábılerdiń jartysynan kóbi elimizdiń 6 oblysynda, atap aıtqanda, Túrkistan (14,4%), Almaty oblystarynda (12,7%), Almaty (8,3%), Shymkent (7,4%), Nur-Sultan (7%) qalalarynda jáne Jambyl oblysynda (6,9%) tirkelgen.

«Bala týý ósiminiń qarqyny kópbalaly otbasylarda baıqalady. Bala týý kórsetkishi boıynsha 1987 jylǵy rekord jańartyldy. Ol kezde 417 myń sábı dúnıe esigin ashqan bolatyn», - dedi spıker.

Onyń atap ótýinshe, árbir 35 jyl saıyn Qazaqstanda baby-boom baıqalady.

«Bizde árbir 35 jyldan keıin baby-boom baıqalady desek te bolady. Jıyntyq koeffıtsıentin aıtar bolsaq, 2018-2019 jyldary bir áıelge/otbasyǵa 2,9 týýdan keledi. Al 2020 jyldyń koeffıtsıenti áli eseptelgen joq. Mundaı protsess potskeńestik elderdiń barlyǵynda baıqalady», - dedi Aıaýlym Saǵynbaeva.

Statıstıka sáıkes, 1 000 adamǵa shaqqandaǵy týý sanyn kórsetetin týýdyń jalpy koeffıtsıenti 2020 jylǵy qańtar-jeltoqsanda 1000 adamǵa 22,40 týǵandy qurap otyr. Bir áıeldiń búkil reprodýktıvti kezeńinde týatyn balalar sanyn kórsetetin týýdyń jıyntyq koeffıtsıenti 2020 jyldyń 12 aıyndaǵy aldyn ala derekterge sáıkes, bir áıelge 3,12 balany qurady.

Spıker taıaý jyldardaǵy halyq sanynyń ósimine qatysty da boljamymen bólisti.

«Eger burynyraq týýdyń negizgi ósimi aýylda tirkelse, qazir jaǵdaı birtindep teńesip kele jatyr. Bul – tabıǵı protsess. Aýyldan qalaǵa ishki kóshi-qon tolqyny osyndaı bala týý kórsetkishiniń artýyna ákeledi. Taıaý jyldary negizi neke men bala sanalatyn dástúrli formatta tálim-tárbıe alǵan 80-shi jyldarǵy áıelder býynynyń aýysýyn eskere otyryp týý kórsetkishiniń tómendeýin kútemiz», - dedi ol.


Joǵary qaraı