Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda zeınetaqynyń bir bóligin alýǵa ótinim qabyldaý bastaldy

2021 jyldyń 23 qańtar 2021 10:52

NUR-SULTAN. QazAqparat – Zeınetaqynyń bir bóligin alýǵa ótinim qabyldaıtyn saıt iske qosyldy. Osy arqyly el aýmaǵynda ótinim qabyldaý bastaldy, dep habarlaıdy QazAqparat tilshisi.

Atap aıtqanda, búgin saǵat 09.00-den bastap enpf-otbasy.kz arnaıy saıty iske qosyldy.

«Portal turaqty istep tur. Ótinimdi noýtbýk/kompıýter arqyly joldaýǵa bolady. Smartfon arqyly ótinim berilmeıdi. Ótinimdi joldaý úshin ETsQ bolýy kerek», - delingen Telegram kanaldaǵy habarlamada.

«Osy baǵdarlamaǵa qatysqysy keletin azamattar biryńǵaı zeınetaqy jınaǵy qoryndaǵy óziniń jınaǵyn esepteýi kerek. Odan keıin «Otbasy bankinde» nemese óz qalaýy boıynsha ekinshi deńgeıli bankterden arnaıy shot ashýy kerek. Úshinshi qadam: 23 qańtardan, saǵat tańerteńgi 09.00-de «Otbasy bankte» portaly ashyldy. Sol portalǵa azamattar óziniń elektrondy qoltańbasy arqyly kiredi. Ol portalǵa azamattar jetkilikti deńgeıden artyq somany qaı maqsatqa paıdalanatynyn kórsetip, ótinim beredi. Al ótinim zeınetaqy qoryna joldanady. Bes kúnniń ishinde ol jaqtan jaýap kelip, maquldanǵannan keıin azamat «Otbasy banktiń» portaly arqyly rastaıtyn qujattardy tirkep, arnaıy esepshotyndaǵy aqshany ózi kórsetken rekvızıtter boıynsha satyp alýshyǵa, ne bolmasa ıpotekany óteýge joldaıdy», - dep túsindirdi «Otbasy banki» AQ ortalyq fılıalynyń dırektory Jansultan Mataev.

Azamattar ózderiniń zeınetaqy jınaqtarynyń bir bóligin:

- kepildik bolǵan kezde turǵyn úı qurylysyna úlestik qatysý týraly sharttar boıynsha turǵyn úı satyp alý kezinde nemese akt bolǵan kezde kóppáterli turǵyn úıdegi úlesti berý týraly shart jasasý kezinde;

- jer ýchaskesin satyp alýdy qos alǵanda jeke turǵyn úı salý úshin tolyq esep aıyrysý kezinde;

- ıpotekalyq qaryz alý, turǵyn úıdi satyp alý, bereshekti óteý, bankter arqyly ıpotekany qaıta qarjylandyrý úshin bastapqy jarna retinde;

- turǵyn úı qurylysy jınaqtary júıesi boıynsha jer ýchaskesin satyp ala otyryp, turǵyn úı satyp alýǵa nemese jeke turǵyn úı salýǵa arnalǵan ıpoteka boıynsha bereshekti alý, qaıta qarjylandyrýdy óteý kezinde;

- Islam bankiniń qarjylandyrýy sheńberinde úı satyp alý jáne osyndaı qarjylandyrý boıynsha bereshekti óteý kezinde;

- turǵyn úı qurylysy jáne daǵdarysqa qarsy baǵdarlamalar sheńberinde satyp alý quqyǵymen berilgen baspanany uzaq merzimdi jaldaý sharttary boıynsha bereshekti óteý úshin paıdalanýyna ruqsat etiledi.

Aıta keteıik, Ortalyq kommýnıkatsııalar qyzmetiniń alańynda keshe zeınetaqynyń bir bóligin baspanaǵa jumsaý máselesine qatysty baspasóz máslıhaty ótti. Indýstrııa jáne ınfraqurylymdyq damý mınıstrliginiń ókilderi men «Otbasy bank» basshylary jıynda kóptiń kókeıinde júrgen basty suraqtarǵa jaýap berdi.


Avtor Rýslan Ǵabbasov
Basty sózder: Zeınetaqy júıesi,
Joǵary qaraı