Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda sportshylar men jattyqtyrýshylarǵa ómir boıy beriletin tólem birneshe esege ósýi múmkin

2021 jyldyń 1 qazan 2021 23:53

NUR-SULTAN. QazAqparat – Qazaqstanda Olımpıada, Paralımpıada jáne Sýrdlımpıada oıyndarynyń, álem chempıondary jeńimpazdary men olardyń jattyqtyrýshylarynyń ómir boıy aı saıynǵy tólem kólemi óspek. Bul týraly Ashyq NQA saıtynda jarııalanǵan QR Úkimeti qaýlysynyń jobasynda jazylǵan, dep habarlaıdy QazAqparat.

«Olımpıada, Paralımpıada jáne Sýrdlımpıada oıyndarynyń chempıondary men júldegerleri jáne (nemese) sporttyń olımpıadalyq túrleri boıynsha álem chempıondary ataqtaryn jeńip alǵan sportshylarǵa, olardy daıyndaǵan jattyqtyrýshylarǵa ómir boıy aı saıynǵy tólem – 100 aılyq eseptik kórsetkish (2021 jyǵy eseppen 291 700 teńge - avtor) mólsherde tólenedi», dep jazylǵan Qaýly jobasynda.

Qazirgi kezde álemdik dodalardyń jeńimpazdary men olardyń jattyqtyrýshylaryna 24,0 aılyq eseptik kórsetkish (2021 jyǵy eseppen 70008 teńge- avtor) kóleminde aqy tólenýde.

Al Mádenıet jáne sport mınıstrligi atalǵan qaýly jobasyna qatysty pikir bildirdi.

«Qoǵamdyq talqylaýǵa usynyp otyrǵan jobanyń maqsaty – aı saıynǵy materıaldyq qamsyzdandyrý tólemderin arttyrý arqyly sportshylar men jattyqtyrýshylardy joǵary sporttyq nátıjelerge yntalandyrý, áleýmettik turǵydan qoldaý kórsetý. Atalǵan ózgeristerdi usyný kezinde kóptegen memlekettiń tájirıbesi zertteldi. Joǵaryda aıtylǵan Reseıden bólek, AQSh, Kanada, Avstrııa, Shveıtsarııa, Ulybrıtanııa syndy birqatar elderdiń qarjylaı qoldaý kórsetý mehanızmi negizge alyndy. Sportshylar men jattyqtyrýshylarǵa ómir boıy jáne aı saıynǵy materıaldyq qamsyzdandyrý «Dene shynyqtyrý jáne sport týraly» Zańǵa sáıkes, respýblıkalyq bıýdjetten tólendi», - dedi mınıstrliktiń baspasóz qyzmeti QazAqparatqa.

Aıta ketsek, atalǵan ózgeris 14 qazanda qoǵamdyq talqylaýdan ótken soń respýblıkalyq bıýdjettik komıssııa otyrysynda talqylanady. Ózgeris qoldaý tapsa, materıaldyq qamsyzdandyrý 2022 jyly Zań júzinde iske asady.


Joǵary qaraı