Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda meken etken dınozavrlar: 3-synyp oqýshysy onlaın-karta jasady

2021 jyldyń 20 qazan 2021 02:09

TEMІRTAÝ. QazAqparat – Qaraǵandy oblysy Temirtaý qalasynyń turǵyny, Toqtar Áýbákirov atyndaǵy gımnazııanyń 3-synyp oqýshysy Aleksandr Alıev «Daryndy jas ǵalym – 2021» dástúrli respýblıkalyq ǵylymı-zertteý jobalary baıqaýynda birinshi oryn jeńip aldy. Onyń dınozavrlar týraly jumysy «Daryn» nomınatsııasynda úzdik dep tanyldy, dep habarlaıdy QazAqparat tilshisi.

Balanyń dınozavrlarǵa qyzyǵýshylyǵy 5 jyl buryn bastalǵan. Ata-anasy oǵan qoldaý bildirip, entsıklopedııalar men kitaptar, oıynshyq kesirtkeler satyp alyp berip otyrǵan. Qazir Sashada 100-ge jýyq fıgýra bar.





«Ulym 5 jyldan artyq dınozavrlarǵa qyzyǵýshylyq tanytyp keledi. Osy ejelgi janýarlar týraly málimetterdi kez kelgen aqparat kózderinen jınaıdy. Biz tipti Mysyrda dınozavr saıabaǵyna bardyq. Onda úlken fıgýralar bar. Ol jerde Sasha gıdten jan-jaqty aqparat aldy. Tájirıbeli gıd dınozavrlar týraly bilgen barlyq bilimimen bólisti», – deıdi Sashanyń anasy Elena Kýropıatnıkova.





Sasha úzdik oqýshylar qatarynda. Matematıka men aǵylshyn tilin jaqsy kóredi. Onyń bolashaqqa jospary aýqymdy. 6 jasyna deıin ol premer-mınıstr bolǵysy kelgen. Endi prezıdent bolýdy armandaıdy. Biraq eń úlken hobbıiniń biri – dınozavrlardy umytpaq emes.

«Synypta Sashanyń hobbıi týraly barlyǵy biledi. Ol únemi balalarǵa dınozavrlar týraly jańa málimet aıtady. Joba ıdeıasy jaratylystaný sabaǵynda paıda boldy. Biz «Qazaqstan aýmaǵynda tirshilik etken janýarlar» taqyrybyn qarastyrdyq. Balalar «bizdiń respýblıka aýmaǵynda dınozavrlar boldy ma?» degen suraq qoıdy. Sasha bul suraqqa jaýap izdeýge birden talpynys bildirdi, sondyqtan men oǵan bul týraly kóbirek bilýge tapsyrma berdim», – deıdi bastaýysh synyp muǵalimi Olga Shter.





Osylaısha bir jyl buryn joba dúnıege keldi. Muǵalimmen birge Sasha kitaptar men ınternetten jaýap izdeı bastady. Aldymen qarapaıym karta jasaldy, onda dınozavrlardyń tirshilik etý ortasy belgilendi. Biz joǵary tehnologııalar áleminde ómir súrip jatqandyqtan, onlaın-karta jasaý týraly sheshim qabyldandy. Onda bir kezderi Qazaqstanda ómir súrgen dınozavrlar ornalasqan.

«Mysaly, Qaraǵandy oblysynyń aýmaǵynda dınozavrlar tuqymdasynyń eń iri jyrtqyshy – tırannozavr nemese tıreks ómir súrgen. Eger kýrsordy onlaın-kartadaǵy kez kelgen dınozavrdyń sýretine alyp kelip, bassańyz, ol týraly kóptegen qyzyqty málimet shyǵady. Sasha ekeýimizdiń zertteýimiz barysynda jalpy Qazaqstan aýmaǵynda dınozavrlardyń 10-nan astam túrin tabýǵa múmkindik týdy», – dep túsindiredi Olga Shter.





Joba gımnazııalyq jáne qalalyq konferentsııalarǵa qatysty. Pedagog respýblıkalyq baıqaý týraly bilip, ótinim jibergenin aıtady.

«Qazaqstanda qandaı dınozavrlar ómir súrdi?» atty eńbegimiz qazylar alqasynyń tek qyzyǵýshylyǵyn oıatyp qana qoımaı, olardyń joǵary baǵasyn aldy. Osylaısha birinshi orynǵa ıe boldyq.

Balanyń talanty men bilimge umtylysy úshin arnaıy dıplom, sertıfıkat jáne «Jas ǵalym» tósbelgisi berildi. Joba respýblıkalyq kitap-jınaqqa engizildi», - deıdi Sashanyń ustazy.

Qazirgi ýaqytta Sasha Alıev muǵalimimen birge joba boıynsha jumysyn jalǵastyrýda.











Joǵary qaraı