Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda qashyqtan jumys isteıtinder sany 2 ese azaıdy

2021 jyldyń 29 qarasha 2021 07:27

NUR-SULTAN. QazAqparat - Daǵdarystan keıin qalpyna kelý kezeńinde Qazaqstannyń eńbek naryǵy pandemııaǵa deıingi kórsetkishterge oralýda. Biraq keıbir qurylymdyq ózgerister bar. 3-toqsanda qashyqtan jumys isteıtinder sany aıtarlyqtaı tómendedi: ótken toqsanmen salystyrǵanda olardyń sany 75 myńnan 41 myń adamǵa deıin azaıdy, dep habarlaıdy QazAqparat.

«Shekteý sharalaryn jeńildete otyryp, qyzmet kórsetý, sonyń ishinde aqparat jáne baılanys, saýda jáne densaýlyq saqtaý salalaryndaǵy jumyspen qamtý kólemi artty. Sonymen qatar, jumyspen qamtý qurylymy ózin jumyspen qamtýdy ulǵaıtý jaǵyna qaraı ózgerýde, bul kóbinese ónimsiz bolyp keledi», - dep habarlady «Eńbek resýrstaryn damytý ortalyǵy» AQ basqarýshy dırektory Aleksandra Molchanovskaıa.

Qashyqtan isteıtin jumysshylardyń kúrt tómendeýi jumysshylardyń dástúrli jumys formatyna oralýymen baılanysty. Bul rette qashyqtan isteıtin jumysshylardyń basym kópshiligi áıelder, er adamdar tek 36,5% bolyp otyr.

Sondaı-aq aýylda qashyqtan jumyspen qamtýdyń qysqarýy (36%-dan 18%-ǵa deıin) jáne qalalyq jerlerde qashyqtan jumys isteıtinderdiń balamaly ósýi baıqalady. Sonymen qatar, jumysshylardyń 93% ózderiniń baılanys quraldaryn paıdalansa, jumys berýshilerdiń qajetti jabdyqtarymen 7% ǵana qamtamasyz etilgen.

«Ótken toqsanmen salystyrǵanda, bıylǵy jyldyń 3-toqsanynda jumys kúshiniń sany 7,2 myń adamǵa nemese 0,1% ósti jáne 9,3 mln qurady. Eger ótken jyldyń uqsas kezeńimen salystyrsaq, jumys kúshiniń 95,7 myń adamǵa nemese 1% artýyn atap ótýge bolady», - dedi sarapshy.

Sonymen qatar, ýaqytsha jumyspen qamtylmaý aǵymdaǵy jyldyń 2-toqsanymen salystyrǵanda 44% nemese 59,6 myń adamǵa artty, bul burynǵydaı shekteý sharalaryna emes, kóbinese maýsymdyq aýytqýlarǵa baılanysty. Osylaısha, jumyssyzdardyń sany negizinen «demalýshylar» esebinen tolyqtyryldy, olardyń sany 3-toqsanda 4,3 ese ósti. Sonymen qatar, jumys berýshiniń bastamasy boıynsha ýaqytsha jumyspen qamtylmaǵandardyń sany bir toqsanda 28% jáne bir jyldyq kezeńde 97% qysqardy.

«Sondaı-aq 3-toqsannyń qorytyndysy boıynsha jumyssyzdar sany aıtarlyqtaı azaıdy. Eger ótken toqsanmen salystyrǵanda azaıý bar bolǵany 606 adamdy qurasa, ótken jyldyń 3-toqsanymen salystyrǵanda olardyń sany 4 myńǵa jýyq adamǵa qysqardy. Biraq jumyssyzdyqtyń jalpy deńgeıi 4,9% deńgeıinde saqtaldy jáne sońǵy tórt toqsan ishinde osyndaı bolyp qalýda. Jastar arasyndaǵy jumyssyzdyq deńgeıi de aıtarlyqtaı ózgerissiz qaldy – 3,7%», - dedi sarapshy.

Óńirler bólinisinde jumyssyzdyqtyń eń tómengi deńgeıi Qaraǵandy oblysynda jáne Nur-Sultan qalasynda (4,6%-dan) saqtalýda. Jumyssyzdyq respýblıkalyq deńgeıden joǵary Túrkistan oblysynda (5,1%), sondaı-aq Almaty (5,1%) jáne Shymkent (5%) qalalarynda tirkelgen.

QR Strategııalyq josparlaý jáne reformalar jónindegi agenttigi Ulttyq statıstıka bıýrosynyń deregi boıynsha, osy jyldyń 3-toqsanynda ortasha aılyq ataýly jalaqy 243,7 myń teńgeni qurap, toqsan ishinde absolıýttik mánde 8 myńǵa jýyq teńgege qysqardy. Bul rette Atyraý (+5,2%), Qostanaı (+3,2%) jáne Batys Qazaqstan (+2%) oblystarynan basqa barlyq óńirlerde tómendeý oryn aldy.


Joǵary qaraı