Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda iri jáne usaq maldy, kartop pen sábizdi eksporttaýǵa tyıym salyndy

2021 jyldyń 30 qarasha 2021 16:25

NUR-SULTAN. QazAqparat - Vedomstvoaralyq komıssııa iri jáne usaq maldy, kartop pen sábizdi eksporttaýǵa tyıym salý týraly sheshimdi maquldady, dep habarlaıdy QazAqparat.

25 qarashada syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń otyrysy ótip, onda mal, kartop jáne kókónisti eksporttaýǵa tyıym salý máselesi qaraldy.

Nátıjesinde vedomstvoaralyq komıssııa barlyq jas toptaryndaǵy iri qara maldy 6 aıǵa, sondaı-aq kartop pen sábizdi 3 aı merzimge Qazaqstan Respýblıkasynyń aýmaǵynan shyǵarýǵa tolyq tyıym salýdy engizýdi maquldaý týraly sheshim qabyldady.

Qazirgi ýaqytta ishki naryqta iri qara jáne usaq mal etine baǵanyń ósýi baıqalady.

Qarasha aıynda respýblıka boıynsha sıyr etiniń baǵasy bir kılogramm úshin orta eseppen 2 239 teńgeni qurady.

Jyl basynan beri baǵa 15% - ǵa nemese 292 teńgege ósti.

Qoı etiniń ortasha baǵasy 21% - ǵa (419 teńge) ósip, bir kelisi úshin 2 409 teńgeni qurady.

Bul rette et óńdeý kásiporyndarynyń júktemesi 50% tómen deńgeıde qalyp otyr.

Bıylǵy jyldyń 10 aıynda 173 myń tonna et óńdelgen, bul et óndirisiniń jalpy kóleminiń nebári 18% - yn quraıdy.

Sonymen birge buqashyqtar men qoshqarlar eksportynyń ulǵaıǵany baıqalady. Aǵymdaǵy jyldyń 10 aıynda 161 myń bas iri qara mal shyǵaryldy nemese 2020 jyldyń deńgeıinen 5,6 ese artyq, usaq mal shyǵarý 6,7 ese ulǵaıdy jáne 112 myń basty qurady.

Osy jyldyń sońyna deıin 200 myńǵa jýyq iri qara mal shyǵarylýy múmkin.

Qalyptasqan jaǵdaı et jáne et ónimderi baǵasynyń ósýine sebep bolýy múmkin.

Aǵymdaǵy jyly kartop pen sábizden jınalǵan ónim ishki tutyný jáne eksporttyq áleýetti saqtaý úshin jetkilikti ekenin atap ótken jón.

Alaıda, kórshi elderde kókónis ónimderi men kartoptyń tómen ónimdiligi bar ekenin atap ótken jón, bul ishki naryqtaǵy baǵalardyń ósýine ákelýi múmkin.

Osy obektıvti kórsetkishterge súıene otyryp, ishki naryqtaǵy tapshylyqty boldyrmaý jáne baǵany turaqtandyrý úshin vedomstvoaralyq komıssııa iri jáne usaq maldy, kartop pen sábizdi Qazaqstannyń aýmaǵynan áketýge tyıym salýdy maquldaý týraly sheshim qabyldady.

Bul rette, syrtqy eksporttyq ótkizý naryqtaryn saqtaýdyń mańyzdylyǵyn eskere otyryp, shekteýler jeltoqsan aıynyń sońynda kúshine enetinin nazarǵa ala otyryp, mınıstrlik bir aı ishinde aǵymdaǵy jaǵdaıǵa kúndelikti monıtorıng pen taldaýdy júzege asyratyn bolady.

Sondaı-aq osy másele boıynsha salalyq qaýymdastyqtarmen jáne odaqtarmen talqylaý jáne konsýltatsııalar túrinde birlesken jumys júrgiziledi.

Іshki naryqty qamtamasyz etý boıynsha jaǵdaı turaqtalǵan jaǵdaıda shekteý sharalarynyń kúshin joıý máselesi de qaralatyn bolady.


Basty sózder: Mal sharýashylyǵy, Eksport,
Joǵary qaraı