Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda ekonomıkasynda ósim men sapaly ózgerister baıqalady –  QR UEM

2021 jyldyń 15 mamyr 2021 17:47

NUR-SULTAN. QazAqparat – 2021 jylǵy qańtar-sáýir aılarynda JІÓ ósý qarqyny ótken jyldan beri alǵash ret 0,7%-dy kórsetti. Bul týraly QR Ulttyq ekonomıka mınıstri Áset Erǵalıev Úkimet otyrysynda málim etti, dep habarlaıdy QazAqparat primeminister.kz saıtyna silteme jasap.

Mınıstrdiń aıtýynsha, Qazaqstan ekonomıkasy qalpyna kelý serpinine ótip jatyr. Qyzmet kórsetý salasy ósip, ishki suranys jaqsarýda. Óńdeý ónerkásibi salalarynda da turaqty ósý baıqalady. Sonymen birge ekonomıkanyń óndirýshi emes salalarynda negizgi kapıtalǵa ınvestıtsııalar aıtarlyqtaı ósýde.

«Jalpy alǵanda, ekonomıka ósiminiń qurylymynda sapaly ózgerister baıqalady. Ekonomıka damýynyń basty draıveri – qazirgi jaǵdaıda naqty sektordyń turaqty ósýi bolyp otyr. Jyl basynan beri taý-ken óndirisi ónerkásibin esepke almaǵanda, naqty sektordaǵy ósim 7,9%-dy qurady. Qurylys, aqparat pen baılanys, óńdeý ónerkásibi, sýmen jáne elektrmen jabdyqtaý, aýyl sharýashylyǵy salalarynda joǵary ósý jalǵasýda. Bul rette, óńdeý ónerkásibi sońǵy 10 jyldaǵy eń joǵary ósýdi kórsetkenin aıta ketken jón», - dedi ulttyq ekonomıka mınıstri.

Bıylǵy qańtar-naýryz aılarynda syrtqy saýdadaǵy taýar aınalymy 19,7 mlrd dollarǵa jetken, onyń ishinde eksport – 11,5 mlrd dollardy qurady. Bul rette shıkizattyq emes taýarlar eksporty 15%-ǵa ósip, 4 mlrd dollarǵa jetti. Al taýarlar ımporty 8,2 mlrd dollardy qurady. Oń saýda balansy 3,3 mlrd dollardan asqan.

Bas ekonomıstiń aıtýynsha, jalpy óńdeý ónerkásibindegi ósim 7,7%-ǵa deıin jedeldegen, 13 óńir oń ósim kórsetti. Eń joǵary ósim Almaty men Nur-Sultan qalalarynda jáne Almaty oblysynda tirkelgen. Kóptegen óńirlerde joǵary ınvestıtsııalyq belsendilik seziledi. Eń joǵary kórsetkishter Almaty, Nur-Sultan qalalarynda, Túrkistan jáne Jambyl oblystarynda baıqalady.

Qurylys salasy joǵary ósý dınamıkasyn kórsetýde. Oryndalǵan qurylys jumystarynyń kólemi 12,5%-ǵa ulǵaıdy. Munda Batys Qazaqstan oblysyn qospaǵanda, barlyq óńirlerde ósim bar. Qurylys-montajdaý jumystarynyń joǵary qarqyny Túrkistan, Qyzylorda oblystarynda jáne Almaty qalasynda baıqalady. Bıylǵy qańtar-sáýir aılarynda turǵyn úıdi paıdalanýǵa berý 13,3%-ǵa ósip, 3,5 mln sharshy metrdi quraǵan.

Aýyl sharýashylyǵy salasynda ónim shyǵarý 3%-ǵa ulǵaıdy. 13 óńirde oń serpin baıqalyp, Aqmola oblysy eń joǵary ósim kórsetken.

«Jalpy, turaqty ósý qarqyny memlekettik qoldaý sharalarymen qamtamasyz etiledi. Olar aýyl sharýashylyǵy óńdeý salasyn ınvestıtsııalaýdy yntalandyrýǵa, aýyl sharýashylyǵy tehnıkasynyń lızıngine, ekonomıkanyń ózindik jetkiliktiligin arttyrý boıynsha ınvestıtsııalyq jobalardy iske asyrýǵa baǵyttalǵan», — deıdi mınıstr.

Sóz sońynda ol ortalyq jáne jergilikti atqarýshy organdarǵa birneshe sharany atqarý qajettigin aıtty.

«2021 jylǵa arnalǵan ekonomıkalyq ósimdi qalpyna keltirý jónindegi ózektendirilgen keshendi jospardy tıimdi iske asyrý kerek. Ekonomıkanyń basym sektorlarynda iri kompanııalarmen ınvestıtsııalyq kelisimderdi is júzinde oryndaý qajet. Aýyl sharýashylyǵy jáne qurylys-montaj jumystary maýsymyn belsendi ótkizip, «Jumyspen qamtýdyń jol kartasy» jáne «Eńbek» baǵdarlamalary sheńberinde targettelgen turaqty jumys oryndaryn qurý kerek. Jańa «ósý faktorlaryn» damytý jáne óńirlerdiń ekonomıkalyq baılanysyn kúsheıtý qajet», - deıdi Áset Erǵalıev.

Mınıstrdiń aıtýynsha, joǵaryda kórsetilgen sharalardy iske asyrý ekonomıkalyq belsendilikti yntalandyrýǵa jáne osy jylǵy ekonomıkalyq ósimdi qamtamasyz etýge múmkindik beredi.

Joǵary qaraı