Aýa raıy
Astana -4 °S
Almaty 8 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda bıyl 43 myńnan astam adam zeınetke shyqty

2020 jyldyń 5 tamyz 2020 15:13

NUR-SULTAN. QazAqparat - Jyl basynan beri 43 myńnan astam qazaqstandyq zeınetke shyqty. Bul týraly QazAqparat tilshisi «Azamattarǵa arnalǵan úkimet» memlekettik korporatsııasyna silteme jasap habarlaıdy.

«Bıylǵy jyldyń 7 aıynda 43 453 qazaqstandyq jasyna baılanysty zeınetaqynyń taǵaıyndalýyna ótinish bildirdi. Zeınetkerlikke shyqqandardyń arasynda Almaty (5 myńnan astam), Túrkistan (4,5 myńnan astam) jáne Shyǵys Qazaqstan (3,8 myńnan astam) oblystarynyń turǵyndary kóp. Eń tómengi kórsetkish Atyraý oblysyna tıesili, onda 7 aı ishinde 1295 turǵyn zeınetkerlikti rásimdegen», delingen habarlamada.

Aıta keteıik, ótken jyldyń dál osy kezeńinde 41 myńnan astam azamat zeınetke shyqqan.
Esterińizge salsaq, jasyna baılanysty zeınetaqy tólemderin taǵaıyndaý týraly ótinishti zeınet jasy tolǵanǵa deıin 10 kún buryn «Azamattarǵa arnalǵan úkimet» memlekettik korporatsııasynyń front-ofısi arqyly berý kerek. HQO-ǵa barý úshin aldymen egov.kz portaly nemese eGovKzBot2.0 Telegram boty arqyly kezek ýaqytyn brondaý qajet.

Sondaı-aq koronavırýstyń taralýyn boldyrmaý maqsatynda memlekettik korporatsııa eGov.kz portalyna elektrondy ótinishti jiberý arqyly qashyqtan zeınetaqy taǵaıyndaý múmkindigin qarastyrdy.

Ótinish berý úshin azamat elektrondyq tsıfrlyq qoltańba nemese birjolǵy qupııa sóz arqyly egov.kz portalyna kirý kerek. Sodan keıin «Elektrondyq ótinishter» servısin tańdap, qyzmetke onlaın tapsyrys berý qajet. Sodan keıin jeke aqparat, onyń ishinde elektrondy poshta mekenjaıy, telefon nómiri, qyzmet ataýy jáne t.b. málimetter toltyrylýy tıis.

Sondaı-aq qujattardyń skanerlengen nemese foto kóshirmesin (qajet tizimdi 1414 baılanys ortalyǵynan nemese gov4c.kz veb-saıtyndaǵy «Memlekettik qyzmetter standarttary» bóliminen bilýge ​​bolady), sonyń ishinde qyzmet alýshynyń jeke qoltańbasymen kýálandyrylǵan ótinishti de júkteý qajet. Joldanatyn tarap baǵanynda – «Azamattarǵa arnalǵan úkimet» memlekettik korporatsııasynyń aımaqtyq fılıalyn tańdaý kerek.

Ótinimniń sońynda ETsQ-men qol qoıylýy tıis.

Suraqtar týyndaǵan jaǵdaıda, memlekettik korporatsııanyń qyzmetkerleri qyzmet alýshymen kórsetilgen telefon nómiri arqyly baılanysady.

Memlekettik qyzmet nátıjesi qyzmet alýshynyń jeke kabınetinde kórsetiledi.

Aıta ketý kerek, BJZQ-dan tólenetin tólemder men bazalyq zeınetaqy tólemderine ótinish kompozıt aıasynda bir ótinish arqyly usynylady.

Eske sala ketsek, áleýmettik jelide Qazaqstandaǵy zeınetke shyǵý jasynyń ózgerýi týraly aqparat tarady. Eńbek jáne halyqty áleýmettik qorǵaý mınıstrligi bul aqparattyń shyndyqqa janaspaıtynyn málim etti.



Joǵary qaraı