Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda 75 myń talapker bilim grantynan úmitker

2021 jyldyń 27 shilde 2021 17:38

NUR-SULTAN. QazAqparat - 75 myń talapker bilim grantyn taǵaıyndaý konkýrsyna qatysýǵa ótinish berdi, dep habarlaıdy QazAqparat Bilim jáne ǵylym mınıstrligine silteme jasap.

Qujat qabyldaý 16-26 shilde aralyǵynda júzege asyryldy. B aıqaý nátıjesi 15 tamyzǵa deıin jarııalanady.

Úmitkerler arasynda 7054 «Altyn belgi» ıegeri, 576 halyqaralyq jáne respýblıkalyq olımpıadalardyń jeńimpazdary, sondaı-aq patrıottyq sezimi men belsendi azamattyq ustanymy úshin úzdik belgisimen marapattalǵan 705 bala bar.

Ball teń bolǵan jaǵdaıda olar basym quqyqqa ıe bolady.

«Sonymen qatar bıyl BǴM alǵash ret halyqtyń áleýmettik osal toptarynan shyqqan balalarǵa kvota bóldi. Endi jetim balalar, ata-anasynyń qamqorlyǵynsyz qalǵan balalar, tórt jáne odan da kóp kámeletke tolmaǵan balalardy tárbıelep otyrǵan otbasylardan shyqqan balalar, tolyq emes otbasylardan shyqqan balalar, erekshe qajettilikteri bar balalardy tárbıelep otyrǵan otbasylardan shyqqan balalar, jeńildikter men kepildikter boıynsha Uly Otan soǵysynyń qatysýshylary men múgedekterine teńestirilgen adamdar úshin joǵary oqý oryndaryna túsý múmkindigi artty. Olarǵa arnaıy granttar bólingen. Kámeletke tolmaǵan tórt jáne odan kóp bala tárbıelep otyrǵan otbasylardaǵy balalar úshin granttardyń jalpy sanynyń 5%-y, keminde úsh jyl tolyq emes otbasy mártebesi bar otbasylardan shyqqan balalarǵa – 1%, І, ІІ toptaǵy múgedek balalardy tárbıelep otyrǵan otbasylardan shyqqan túlekterge bilim berý granttarynyń 1%-y kózdelgen», – dep atap ótti QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.

Sondaı-aq aýyl jastary arasynan shyqqan azamattar úshin aýyldardyń áleýmettik-ekonomıkalyq damýyn aıqyndaıtyn mamandyqtarǵa jáne QR azamaty emes, ulty qazaq adamdarǵa kvota qarastyrylǵan.

Bıyl 145 myńnan astam talapker Ulttyq biryńǵaı testileýden ótti. UBT qorytyndysy boıynsha shekti baldy 88 myńnan astam adam jınady. Bul – qatysýshylardyń jalpy sanynyń shamamen 60%-y.

Bıyl ortasha ball - 69. Bul ótken jylmen salystyrǵanda 5 balǵa joǵary.

UBT qorytyndysy boıynsha keminde 65 ball jınaǵan talapkerler ulttyq joǵary oqý oryndarynda grantqa úmitker bola alatynyn aıta keteıik.

«Pedagogıkalyq ǵylymdar» baǵyty boıynsha keminde 75 ball, «Densaýlyq saqtaý» − keminde 70 ball, «Aýyl sharýashylyǵy jáne bıoresýrstar», «Veterınarııa» – keminde 60 ball, basqa joǵary oqý oryndaryna oqýǵa túsý úshin keminde 50 ball qajet.

Granttar taǵaıyndaý jónindegi sheshimdi Respýblıkalyq konkýrstyq komıssııa qabyldaıdy. Konkýrstyq komıssııanyń otyrysy 10 tamyzǵa deıin ótedi.

Komıssııa quramyna memlekettik organdardyń, qoǵamdyq uıymdardyń ókilderi, jýrnalıster, «Qazaqstan stýdentteri Alıansynyń» jáne «Otandastar» qorynyń ókilderi kirdi.


Joǵary qaraı