Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qazaqstanda 5 sheteldik joǵary oqý ornynyń fılıaly ashylady

2022 jyldyń 13 qańtar 2022 15:55

NUR-SULTAN. QazAqparat - Bilim jáne ǵylym mınıstri Ashat Aımaǵambetov prezıdent tapsyrmalaryn oryndaý úshin qandaı jumystar jasalatynyn aıtyp berdi, dep habarlaıdy QazAqparat.

«Memleket basshysy Q.Q. Toqaev Májilis otyrysynda sóılegen sózinde Úkimet aldynda birqatar mańyzdy tapsyrmalar júktedi. Bizdiń mınıstrlik aldyna sapaly bilim alýǵa qol jetkizýdi qamtamasyz etýge baǵyttalǵan mindetter qoıyldy. Biz osy tapsyrmalardy oryndaýǵa kiristik, bul týraly ótken Úkimet otyrysynda baıandadym. Qysqasha toqtalyp óteıin. Prezıdenttiń tapsyrmasyna sáıkes qyzmetterin oryndaý kezinde qaza tapqan áskerı qyzmetshilerdiń, quqyq qorǵaý jáne arnaýly memlekettik organdar qyzmetkerleriniń balalaryna, joǵary oqý oryndary men kolledjderde oqýy úshin grant berý jónindegi normany qabyldaý josparlanýda. Memleket tarapynan mundaı qoldaý qajetti shara bolyp tabylatynyna senimdimin. Jaqynda bolǵan qaıǵyly oqıǵalar kezinde biz olardyń erliginiń kýási boldyq, azamattardy óz ómirin aıamaı qorǵady» dep jazdy Ashat Aımaǵambetov Facebook paraqshasynda.

Onyń aıtýynsha, kadr tapshylyǵy baıqalatyn jáne bilim sapasynda úlken alshaqtyq bar óńirlerge úzdik pedagogterdi tartýǵa qatysty biraz is qolǵa alynady.

Prezıdenttiń tapsyrmasy boıynsha qoldaý sharalarynyń tıisti paketimen osy óńirlerge úzdik pedagogterdi tartý jóninde arnaıy baǵdarlama ázirlenip jatyr.

«Pedagogterdiń osy salalarda jumys isteýine múddeli bolýy úshin biz jalaqynyń arttyrý koeffıtsıentin belgileý, turǵyn úı berý nemese turǵyn úıdi jalǵa alý qunyn óteý, kommýnaldyq qyzmetterdi tóleý ótemaqysy jáne t.b. osy sııaqty áleýmettik qoldaý sharalaryn usynamyz. Mundaı áleýmettik paket arnaıy rásimnen ótip, belgili bir ólshemderge sáıkes keletin jáne belgili bir mektepterge jumysqa aýysatyn muǵalimderge beriledi. Naqty iske asyratyn keıbir tetikterin áli de talqylyıtyn bolamyz. Memleket basshysynyń birqatar tapsyrmalary joǵary bilim berýdi damytýǵa qatysty boldy. Taǵy bir baǵyt – 5 sheteldik JOO fılıaldaryn ashý. Bul shara otandyq ýnıversıtetter arasynda básekelestikti arttyrýǵa da múmkindik beredi. Biz osy baǵyttaǵy jumysqa kiriskenimizdi atap ótkim keledi. 2021 jyldyń qyrkúıeginde De Montfort Lester Brıtan ýnıversıtetiniń (De Montfort University Leicester) fılıaly ashyldy. Sonymen qatar, Qozybaev atyndaǵy ýnıversıtetti Arızona ýnıversıtetine senimgerlik basqarýǵa berý máselesi pysyqtalýda. Elimizdiń batys óńirlerindegi jastardyń joǵary bilimge qol jetkizýin arttyrý úshin onda eki jetekshi sheteldik tehnıkalyq ýnıversıtettiń fılıaldary ashylatyn bolady. Sondaı-aq, Prezıdenttiń tapsyrmasyna sáıkes Reseıdiń úzdik tehnıkalyq ýnıversıtetiniń fılıalyn ashý boıynsha jumys júrgizilýde. Basqa da álemdik deńgeıdegi ýnıversıtetterdiń fılıaldaryn ashý boıynsha jumys júrgizilýde. Sondaı-aq, bilim sapasynda úlken alshaqtyǵy bar óńirlerden oqýǵa túsýshiler úshin tehnıkalyq daıyndyq baǵyttary boıynsha qosymsha granttar bólý josparlanýda. Atalǵan maqsatty granttar elimizdiń jetekshi joǵary oqý oryndarynda bilim alý úshin bólinetin bolady. Bul rette negizgi turǵylyqty jeri boıynsha bitirýshilerdiń jumyspen qamtýdy sharttardyń biri retinde bekitý usynylady. Aǵymdaǵy jyldyń ózinde tehnıkalyq daıyndyq baǵyttary boıynsha joǵary oqý oryndarynda oqý úshin granttar sany aıtarlyqtaı ósetin bolady» dep atap ótti mınıstr.


Joǵary qaraı