Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qazaqstanda 1200 kásiporyn 1 mln astam jumysshynyń aılyǵyn kóterdi

2022 jyldyń 28 sáýir 2022 18:50

NUR-SULTAN. QazAqparat – Munaıǵa qyzmet kórsetýshi kásiporyndardaǵy eńbekaqy kóleminiń teńsizdigin azaıtý úshin «Samuryq-Qazynanyń» tenderine qatysýshylar úshin baǵany túsirý shegi 15 paıyz bolyp belgilendi, dep habarlaıdy QazAqparat tilshisi.

Bul týraly QR Bas memlekettik eńbek ınspektory Tólegen Ospanqulov ortalyq kommýnıkatsııalar qyzmetinde ótken brıfıngide aıtty.

«Eńbek daýlarynyń basym bóligi negizinen Mańǵystaý oblysynda tirkelip otyrǵanyn aıttyq. Osyǵan baılanysty Úkimet, onyń ishinde bizdiń mınıstrlik bul máselege erekshe mán berip otyr. Premer-Mınıstrdiń orynbasary Eraly Toǵjanov basshylyq jasaıtyn arnaıy jumys toby bar. Jańaózen qalasynyń problemalyq máselelerin sheshýge arnalǵan vedomstvoaralyq shtab bar. Ony oblys ákimi basqarady. Narazylyq aktsııalary men eńbek daýlary negizinen munaı servıs kásiporyndarynda bolyp jatady. Bul jerde men munaı servısi dep qosalqy merdigerler týraly aıtyp otyrmyn. Olardyń bári óz jumyskerleriniń aılyǵyn kóterýdi talap etip otyr. Óıtkeni qosalqy merdigerlerdiń aılyǵy bas merdigerler jumysshylarynyń aılyǵynan áldeqaıda az», - dedi komıtet ókili.

Komıtet mamandary osynyń bárin eskerip, taldaı kele, «Samuryq-Qazyna» kompanııasynyń tender ótkizý tártibine ózgeris engizý týraly sheshim qabyldaǵan.

«Tenderge qatysý kezinde baǵany tómendetý shegi belgilendi. Buryn baǵany tómendetý shegi 30 paıyzǵa deıin bolsa, qazir 15 paıyzǵa deıin ǵana túsirýge bolady. Kásiporyndar qanshalyqty kóp dempıng jasasa, bólinetin soma sonshalyq tómen bolady. Eger tender somasy tómen bolsa, qosalqy merdiger tender qujattamasy boıynsha qyzmetshileriniń aılyǵyn kótere almaıdy. Sondyqtan 15 paıyz shekteý qoıyp otyrmyz. Tender qujattamasyna qosalqy merdiger uıymnyń eńbekaqysy bas merdiger uımdaǵy eńbekaqysynyń 70 paıyzynan kem bolmaýy kerek degen ózgeris engizdik», - dedıdi Tólegen Ospanqulov.

Onyń aıtýynsha, qosalqy merdigerlerdiń arasyndaǵy «alypsatarlyqqa» da tosqaýyl qoıylmaq.

«Bir kompanııa tenderdi utyp alyp, taǵy bir qosalqy merdigerge berýi múmkin. Biz buǵan da shekteý engizdik. Budan bylaı tender utyp alǵan mediger qosalqy merdigerge tapsyrystyń 25 paıyzyn ǵana ótkize alady. Qazir osynyń bári jemisin bere bastady. Óıtkeni bul jumys basqa da kompanııalarǵa engizilip jatyr. Qazaqstan qurylysshylar qaýymdastyǵy da osy tásildi durys kórdi. Energetıka mınıstrligi jer qoınaýyn ıgerip otyrǵan iri kásiporyndardyń bárimen óz jumysshylarynyń eńbekaqysyn kóbeıtý boıynsha jumys istep jatyr. Búginde 1200 kásiporyn 1 mıllıonnan astam jumysshynyń aılyǵyn 5-ten 50 paıyzǵa deıin kóterdi», - dedi komıtet basshysynyń orynbasary.

Buǵan deıin QR Premer-Mınıstriniń orynbasary Eraly Toǵjanov eńbek daýlaryn sheshý máselesinde Mańǵystaý oblysynyń tájirıbesin engizýdi usynǵan edi.


Joǵary qaraı