Aýa raıy
Astana -18 °S
Almaty -4 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstan Prezıdenti Soltústik ekonomıkalyq yntymaqtastyq jónindegi halyqaralyq forýmda sóz sóıledi

2020 jyldyń 30 qazan 2020 09:03

NUR-SULTAN. QazAqparat -Qasym-Jomart Toqaev Soltústik ekonomıkalyq yntymaqtastyq – 2020 Halyqaralyq forýmynda beıne úndeý jasady. «COVID-19-dan keıingi jahandyq ózgerister jáne soltústik ekonomıkalyq yntymaqtastyqtyń keleshegi» taqyrybyndaǵy shara búgin Seýl qalasynda bastaldy, dep habarlaıdy QazAqparat Aqordaǵa silteme jasap.

Memleket basshysy Qasym-Jomart Toqaev Prezıdent Mýn Chje In bastamashy bolǵan jáne sońǵy úsh jyldyń ishinde óziniń ózektiligi men ómirsheńdigin dáleldegen «Jańa Soltústik saıasat» strategııasyn joǵary baǵalap, Ońtústik Koreıa basshysynyń órkendegen, ózara baılanysy myǵym jáne turaqty Eýrazııa qurý kóregen ıdeıasyn quptady.

Qazaqstan Prezıdentiniń pikirinshe, qazirgideı álem koronavırýs pandemııasynyń teńdessiz tegeýrinderine tap bolǵan kezde saıası jiger men ekonomıkalyq sana sınergııasy erekshe mánge ıe.

Qasym-Jomart Toqaev Qazaqstan men Ońtústik Koreıa arasyndaǵy strategııalyq yntymaqtastyqtyń ortaq qundylyqtarǵa, ózara qoldaý men tyǵyz baılanystarǵa negizdelgenin aıta kele, elimizde ómir súrip jatqan, dostyqtyń «altyn kópiri» sanalatyn júz myń koreı qaýymdastyǵynyń eki el arasyndaǵy qarym-qatynasqa qosqan úlesin atap ótti.

– Koreıanyń Qazaqstan ekonomıkasyna jasaǵan ınvestıtsııasy 7 mıllıard dollardan asty. Jahandyq turaqsyzdyqqa qaramastan, ekijaqty taýar aınalymy artty. Ortalyq Azııanyń barlyq bes eliniń ortaq jalpy ishki ónimniń 70 paıyzy Qazaqstannyń úlesine tıesili. Koreı memleketi jetekshi ınvestorlardyń arasyndaǵy 10-orynǵa ıe. Bul rette, ózara tıimdi yntymaqtastyqty odan ary jalǵastyrýdyń áli de paıdalanylmaǵan úlken áleýeti bar, – dedi Memleket basshysy.

Qazaqstan Prezıdenti 2019 jyldyń sáýir aıynda Mýn Chje Inniń elimizge jasaǵan tarıhı sapary ekijaqty ózara is-qımyldyń jańa belesin ashty dep sanaıdy. Sapar aıasynda qol qoıylǵan «Samal jel» baǵdarlamasy qazaq-koreı ekonomıkalyq, saýda jáne mádenı jan-jaqty baılanystardy jandandyrýǵa baǵyttalǵan.

Sonymen qatar Qasym-Jomart Toqaev «Samal jel» baǵdarlamasy men «Jańa Soltústik saıasat» strategııasy «Tsıfrly Qazaqstan», «Nurly jol» sekildi ulttyq baǵdarlamalarda belgilengen strategııalyq mindetterge sáıkes keletinin aıtty.

Memleket basshysy álemdegi uzaqqa sozylǵan munaı dáýiriniń aıaqtalyp kele jatqanyn aıtyp, Qazaqstan úshin ártaraptandyrylǵan jáne turaqty ekonomıka qurýdyń erekshe mańyzdy ekenin atap ótti.

– Osyǵan baılanysty men Jańa ekonomıkalyq baǵyttyń bastamashysy boldym. Bul baǵyt qurylymdyq reformalarmen ǵana emes, sondaı-aq barynsha qarqyndy ári myqty memleket qurýmen baılanysty. Qazaqstan koreı ınvestorlary úshin arnaıy ázirlengen quraldardy usynýǵa ázir. Bul rette, salyq jáne keden artyqshylyqtary, jobalardy qosa qarjylandyrý, eksportty qoldaýdyń ishinara kepildikteri men tetikterin aıtýǵa bolady, – dedi Prezıdent.

Memleket basshysy aǵylshyn quqyǵy boıynsha qyzmet kórsetetin «Astana» halyqaralyq qarjy ortalyǵynyń áleýetin de sóz etti. Prezıdent bul ortalyqtyń sheteldik bızneske arnalǵan ekojúıesiniń biregeıligin erekshe atap ótti.

Sóz sońynda Qasym-Jomart Toqaev forým qatysýshylaryna jumystyń tabysty, al Ońtústik Koreıa Prezıdenti men Úkimetiniń ıgi bastamalarynyń sátti bolýyna tilektestik bildirdi.


Basty sózder: Qazaqstan Prezıdenti,
Joǵary qaraı