Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstan men Tájikstan parlamentteri yntymaqtastyqty údete túspek

2021 jyldyń 23 qyrkúıek 2021 19:22

NUR-SULTAN. QazAqparat - Senat Tóraǵasy Máýlen Áshimbaev búgin Qazaqstanǵa resmı saparmen kelgen Tájikstan Respýblıkasy Olı Majlısi Mıllı Majlısiniń tóraǵasy Rýstamı Emomalımen kezdesti, dep habarlaıdy QazAqparat QR Parlamenti Senatynyń baspasóz qyzmetine silteme jasap.

Máýlen Áshimbaev óz sózinde Qazaqstan men Tájikstan arasyndaǵy berik baılanystar bizdiń halyqtarymyz arasyndaǵy kópǵasyrlyq dostyq pen baýyrlastyq baılanystaryna negizdelgenin, al eki memleket senimdi strategııalyq áriptester men odaqtastar bolyp tabylatynyn atap ótti.

Senat Tóraǵasy bıyl Qazaqstan Prezıdenti Tájikstanda eki ret bolǵanyn atap ótti. Mundaı saparlardyń jıiligi jáne osy kezdesýler barysynda qol jetken ýaǵdalastyqtardyń deńgeıi eki memleket basshylary ornatqan yntymaqtastyqtyń joǵary deńgeıin kórsetedi.

«Qazaqstan Prezıdenti Qasym-Jomart Toqaevtyń bıylǵy mamyrda Tájikstanǵa jasaǵan resmı sapary aıasynda ózara qarym-qatynastarymyzdy odan ári nyǵaıtýdyń keleshegi aıqyndaldy. Eki el Prezıdentteriniń birlesken málimdemesinde strategııalyq áriptestik qatynastaryn damytýǵa nyq ustanymdaryn bildirdi. Eki el Prezıdentteri ornatqan yntymaqtastyqtyń joǵary deńgeıin Qazaqstan men Tájikstan parlamentteri baılanystary boıynsha qoldaý men ilgeriletýdiń mańyzy zor», - dep atap ótti Máýlen Áshimbaev.




Rýstamı Emomalıdiń aıtýynsha, Tájikstannyń syrtqy saıasatynda Qazaqstanmen yntymaqtastyq basym orynǵa ıe. Olı Majlısi Mıllı Majlısiniń Tóraǵasy ekijaqty jáne kópjaqty sıpattaǵy parlamentaralyq yntymaqtastyqty nyǵaıtýǵa zor mańyz beretinin atap ótti.

«Qazaqstan Ortalyq Azııanyń saıası jáne ekonomıkalyq ómirinde mańyzdy ról atqarady. Sizdiń elińiz táýelsizdik jyldarynda áleýmettik-ekonomıkalyq damý men halyqaralyq arenadaǵy óziniń bedelin nyǵaıtýda zor tabystarǵa qol jetkizdi. Eldiń uzaq merzimdi keleshekke negizdelgen kóptegen damý baǵdarlamalary men strategııasy ázirlenip, tabysty iske asýda. Osy oraıda Sizdi jáne baýyrlas Qazaqstan halqyn Táýelsizdiktiń aldaǵy 30 jyldyq mereıtoıymen quttyqtaǵym keledi», - dep atap ótti Rýstamı Emomalı.

Taraptar áńgime barysynda ekijaqty jáne kópjaqty yntymaqtastyqtyń barlyq salalary boıynsha syndarly dıalogty qalyptastyrýdyń mańyzdylyǵyn atap ótti. Atap aıtqanda, ınvestıtsııalar, saýda-ekonomıkalyq baılanystar, aýyl sharýashylyǵy, kólik-kommýnıkatsııalyq ınfraqurylym, tsıfrlandyrý máseleleri boıynsha birlesken jumystyń mańyzy zor.

Máýlen Áshimbaev sý-energetıka salasyndaǵy yntymaqtastyqty jandandyrý qajettigine erekshe nazar aýdardy.

«Jyl saıyn Ortalyq Azııa óńirindegi sý tapshylyǵy máselesiniń mańyzy arta túsetini bizge túsinikti bolyp otyr. Bul aqıqatty biz qabyldaýǵa tıispiz. Osyǵan baılanysty Bahrı Tochık sý qoımasynyń sý resýrstaryn birlesip paıdalaný týraly úshjaqty kelisim jasasý asa mańyzdy bolar edi. Bul Kelisim Syrdarııa ózeni basseıniniń sý resýrstaryn turaqty negizde birlesip paıdalaný máselelerin retteý úshin pármendi tetik bola alar edi», - dep atap ótti Máýlen Áshimbaev.

Kezdesýge qatysýshylar Aýǵanstan problemalaryna nazar aýdardy. Aýǵanstandaǵy turaqtylyqqa qol jetkizý aımaqtyq qaýipsizdikti qamtamasyz etýdiń mańyzdy faktory ekenine kelise otyryp, taraptar osy baǵytta ózara belsendi is-qımyl men yntymaqtastyqqa daıyn ekendikterin aıtty.

Senat Tóraǵasy sondaı-aq Qazaqstan Aýǵanstannyń terrorızm men esirtkiden azat beıbit jáne táýelsiz memleket retinde qalyptasýyn jaqtaıtynyn atap ótti.

Búgin qol qoıylǵan Qazaqstan Respýblıkasy Parlamenti Senaty men Tájikstan Respýblıkasy Olı Majlısi Mıllı Majlısi arasyndaǵy Yntymaqtastyq týraly kelisim ózara parlamentaralyq is-qımyldyń damýyna jańa serpin beredi. Qujat parlamentaralyq yntymaqtastyq jónindegi turaqty komıssııa qurýdy kózdeıdi.

Rýstamı Emomalı sol kúni «Otan qorǵaýshylar» monýmentine gúl shoqtaryn qoıyp, «Astana Bas jospar» ǵylymı-zertteý jobalaý ınstıtýtyna jáne «iKomek»monıtorıng jáne jedel áreket etý ortalyǵynda boldy.


Joǵary qaraı