Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qazaqstan men Koreıa arasyndaǵy dıplomatııalyq qatynasqa 30 jyl: Elshi quttyqtady

2022 jyldyń 28 qańtar 2022 14:21

NUR-SULTAN. QazAqparat – Koreıa Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Ký Hong-sok eki el arasyndaǵy dıplomatııalyq qatynastardyń ornaǵanyna 30 jyl tolýymen quttyqtady, dep habarlaıdy QazAqparat.

«Qazaqstanda turatyn Koreıanyń azamattary jáne jergilikti koreı dıasporasynyń qadirmendi ókilderi! Qurmetti Qazaqstan azamattary, Koreıa men Qazaqstandy jaqsy kóretin dostar jáne qurmetti áriptester! Sizderdi Koreıa Respýblıkasy men Qazaqstan Respýblıkasy arasynda dıplomatııalyq qatynastardyń ornaǵanyna 30 jyl tolýymen shyn júrekten quttyqtaımyn! Koreıa Qazaqstan Táýelsizdik alǵannan keıingi kelesi jyly, 1992 jyldyń qańtarynda dıplomatııalyq qatynastar ornatqan alǵashqy elderdiń biri boldy. Sodan beri Koreıa men Qazaqstan árqashan jaqyn dos jáne senimdi seriktes bolyp keldi. Eki eldiń kóshbasshylary arasynda tyǵyz almasýlar jalǵasyp, túrli jetistikterge qol jetti», - dedi Elshi Ký Hong-sok óz quttyqtaýynda.

Elshiniń aıtýynsha, Qazaqstan Koreıa úkimeti iske asyryp jatqan «Jańa soltústik saıasaty» ekonomıkalyq yntymaqtastyq bastamasynyń negizgi seriktesi bolyp sanalady. Búginde Ortalyq Azııa elderi arasynda Qazaqstan – Koreıamen saýda jasaý jáne ınvestıtsııa quıý kólemi boıynsha jetekshi el, al Qazaqstan úshin Koreıa – kólemi jaǵynan tórtinshi saýda seriktesi.

Pandemııa saldarynan týyndaǵan qıyndyqtarǵa qaramastan, eki el arasyndaǵy saýda kólemi joǵary deńgeıde saqtalyp tur. Qazaqstan joldarynda kóptegen koreı avtokólikterin kórýge bolady, al koreı óndirisiniń smartfondary men turmystyq tehnıkasy árbir úıde, árbir oqý ornynda nemese keńsede bar. Sońǵy ýaqytta koreıalyq kompanııalar tsıfrlyq ındýstrııa, densaýlyq saqtaý jáne bolashaqtaǵy aýyl sharýashylyǵy sııaqty jańa salalardaǵy yntymaqtastyqty ártaraptandyrýǵa tyrysyp keledi.


«Atap aıtqanda, eki el arasyndaǵy kómirtegi beıtaraptyǵy men jańartylatyn energetıka salasynda strategııalyq yntymaqtastyq ornatý úshin úlken áleýetimiz bar dep esepteımin. Táýelsizdik alǵan sátte kólemi boıynsha álemdegi tórtinshi ıadrolyq derjava mártebesinen bas tartý jóninde batyl sheshim qabyldaǵan Qazaqstan ıadrolyq qarýsyzdaný men denýklearızatsııany belsendi qoldaıtyn halyqaralyq qoǵamdastyqtyń jaýapty múshesi bolyp otyr.

Meniń oıymsha, Qazaqstannyń beıbitshilik pen álemniń birlesip órkendeýi úshin ıadrolyq arsenaldan bas tartý týraly sheshimi Ortalyq Azııanyń turaqtylyǵy men órkendeýinde mańyzdy ról atqarady jáne Qazaqstannyń halyqaralyq qoǵamdastyqtaǵy mártebesin nyǵaıtýdyń negizin qalady. ıAdrolyq qarýsyzdaný týraly sheshim qabyldaǵan Qazaqstannyń úlgisi Koreıa túbeginde beıbitshilik ornatýǵa jaqsy bastama bolady dep sanaımyn.

Sondaı-aq, men Koreıa Respýblıkasy úkimetiniń Koreı túbegindegi beıbitshilik protsesin ilgeriletý jónindegi kúsh-jigerine qoldaý kórsetkeni úshin Qazaqstan Úkimetine rızashylyǵymdy bildiremin», - deıdi Koreıa Elshisi.




Elshi qazaqstandyq mádenıettiń koreı mádenıetimen kóp uqsastyǵy baryn, mysaly, qonaqjaılylyq, úlkenderge qurmet kórsetý, bir-birine syılastyqpen qaraý sııaqty dástúrlerdiń erekshe áser etkenin aıtty. Ásirese, 2014 jyly vızany alyp tastaý kelisimi kúshine engennen beri eki el azamattary arasyndaǵy mádenı jáne emotsıonaldy uqsastyqtarǵa negizdelgen ózara almasý turaqty túrde keńeıe bastady.

«Koreıa men Qazaqstan arasyndaǵy qarym-qatynastardyń, ásirese ortaq baılanystyrýshy býyn – koreı dıasporasynyń arqasynda odan ári damýyna áleýeti jetedi dep sanaımyn. Qazirgi ýaqytta Qazaqstanda turatyn 108 myńǵa jýyq etnıkalyq koreıler – 1937 jyly Reseıdiń Qıyr Shyǵysynan májbúrli deportatsııaǵa ushyraǵan koreılerdiń urpaqtary. Etnıkalyq azshylyqtardyń qandaı da bir kemsitýsiz damýyna jáne tabysqa jetýine erekshe kóńil bólinip, qoldaý kórsetiletin Qazaqstan Úkimeti júrgizip otyrǵan ultaralyq kelisim saıasatynyń arqasynda koreı dıasporasynyń ókilderi búginde mańyzdy ról atqarady jáne qazaqstandyq qoǵam ómirine belsendi qatysady.

Dıplomatııalyq qatynastardyń ornaǵanyna 30 jyl tolyp otyrǵan bıylǵy jyldy eki eldiń úkimeti «Ózara mádenı almasý jyly« dep jarııalady. Biz Koreı mádenıetin kóptegen qazaqstandyqtarmen bólisý úshin túrli is-shara daıyndap jatyrmyz. Osy aıtýly oqıǵany - dıplomatııalyq qatynastardyń ornaǵanyna 30 jyl tolýyn birge atap ótý úshin epıdjaǵdaıdyń tezirek jaqsara túsetinine úmit artamyn.

Koreıa Qazaqstannyń tap bolyp otyrǵan qıyndyqtardy eńserýine jáne neǵurlym berik turaqtylyq pen beıbitshilikke qol jetkizý úshin kúsh-jigerin jumsap, óz úlesin qosýǵa tyrasady. Sonymen qatar, eki el arasyndaǵy strategııalyq áriptestikti odan ári keńeıtýine kúsh-jiger jumsaıtyn bolamyz. Dıplomatııalyq qatynastardyń ornaǵanyna 30 jyl tolýyna oraı eki eldiń halqy arasyndaǵy dostyq odan ári nyǵaıa túsedi dep senemin. Barshańyzǵa zor densaýlyq pen mol baqyt tileımin! Kóp rahmet», - dedi Ký Hong-sok.

Aıta keteıik, osydan 30 jyl buryn 1992 jyly 28 qańtarda Koreıa men Qazaqstan arasyndaǵy dıplomatııalyq qatynastar ornatylǵan edi.


Joǵary qaraı