Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qazaqstan Koreıa úshin jaqyn dos jáne qoldaýshyǵa aınaldy – Koreıa elshisi

2021 jyldyń 5 qazan 2021 21:24

NUR-SULTAN. QazAqparat – Elordadaǵy Koreıa Respýblıkasy elshiliginde Koreı memleketiniń qurylǵanyna 4354 jyl tolýyna arnalǵan saltanatty shara ótti. Onda Koreıa Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Ký Hong-sok eki el yntymaqtastyǵynyń damýy týraly aıtyp berdi, dep habarlaıdy QazAqparat.

«Bıyl Qazaqstannyń Táýelsizdigine 30 jyl tolady, osy sátti paıdalana otyryp, qazaqstandyqtardy osy aıtýly kúnmen quttyqtaǵym keledi. 1992 jyly eki el arasynda dıplomatııalyq qatynastar ornaǵan sátten bastap, ári Qazaqstan táýelsizdik alǵannan keıin bir jyldan soń, Qazaqstan Koreıa úshin jaqyn dos jáne berik qoldaýshyǵa aınaldy. Oǵan qosa, Qazaqstan Koreıa Úkimeti iske asyryp jatqan ekonomıkalyq yntymaqtastyq bastamasynyń – «Jańa Soltústik saıasattaǵy» negizgi seriktesi. Eki el de kelesi jyly dıplomatııalyq qatynastardyń ornaǵanyna 30 jyl tolýyn mádenı almasý jyly dep jarııalady, onda eki el arasyndaǵy dostyq qatynastardy damytý úshin túrli is-sharalar ótkizý josparlanǵan», - dedi elshi saltanatty shara ashylýynda.




Elshi bıylǵy tamyz aıynda Qazaqstan Prezıdenti Q. Toqaevtyń Koreıaǵa Memlekettik sapary ótkenin eske saldy. Bul shet memleket basshysynyń Koreıaǵa COVID-19 pandemııasy bastalǵannan keıingi alǵashqy sapary boldy.

«Bul sapar Koreıa men Qazaqstan arasyndaǵy strategııalyq áriptestikti odan ári keńeıtýge negiz boldy. Sapar qorytyndysy boıynsha 20-dan astam memorandýmǵa qol qoıyldy jáne «Samal jel» ekonomıkalyq yntymaqtastyq baǵdarlamasy sheńberinde eki el arasyndaǵy zattyq yntymaqtastyqty odan ári damytý boıynsha egjeı-tegjeıli kelissózder júrgizildi. Bul sapar Prezıdent Mýn Chje Inniń 2019 jylǵy sáýirdegi Qazaqstanǵa Memlekettik sapary arqyly bekitilgen ózara qarym-qatynas pen yntymaqtastyqty odan ári nyǵaıtýǵa jaqsy múmkindik berdi», - dep atap ótti Ký Hong-sok.




Onyń aıtýynsha, Ortalyq Azııa elderi ishinde Qazaqstan Koreıamen aradaǵy saýda jáne ınvestıtsııa kólemi boıynsha jetekshi el bolyp otyr, al Qazaqstan úshin Koreıa kólemi boıynsha tórtinshi saýda seriktesi.

«Bizdiń memleketter pandemııadan týyndaǵan daǵdarysty abyroımen eńserýde jáne ótken jyly taýar aınalymy 4 mıllıard dollardan astam deńgeıge jetti. Qazirgi ýaqytta Qazaqstanda 300-den astam koreı kompanııasy jumys isteıdi. Qazaqstan joldarynda júrgen kóptegen koreı avtokólikterin kórýge bolady, al koreılik smartfondar men turmystyq tehnıka ónimderi shamamen árbir úıde, árbir oqý ornynda nemese keńsede bar. Koreıalyq kompanııalar Qazaqstannyń ekonomıkalyq jáne áleýmettik damýyna óz úlesin qosa otyryp, jergilikti jumysshylarmen jáne isker seriktestermen úlgili iskerlik áriptestik qatynasty damytýǵa umtylady», - deıdi Ký Hong-sok.

Bıyl Qazaqstan kólemi boıynsha tórtinshi ıadrolyq derjava mártebesinen bas tartý jáne ıadrolyq synaq polıgonyn jabý týraly asa kúrdeli sheshim qabyldaǵanyna 30 jyl toldy. Tamyz aıynda ótken Memleket basshylarynyń kezdesýinde eki kóshbasshy Koreıa Respýblıkasy Úkimetiniń Koreı túbegindegi beıbitshilik protsesin ilgeriletýge baǵyttalǵan turaqty kúsh-jigerin joǵary baǵalady.

«Beıbitshilik pen birlese órkendeý úshin ıadrolyq arsenaldan bas tartý týraly sheshim qabyldaǵan Qazaqstan úlgisi Koreı túbeginde beıbitshilik ornatýǵa jaqsy basshylyq bolady dep sanaımyn. Eki eldiń azamattary arasyndaǵy almasý 2014 jyly vızany alyp tastaý týraly Kelisim kúshine engennen beri qarqyn alyp, únemi keńeıýde. Sondaı-aq, biz bıyl 30 jyldyǵyn atap ótetin Nur-Sultan qalasyndaǵy Koreı mádenı ortalyǵy men Almaty qalasyndaǵy Koreı bilim berý ortalyǵynda qazaqstandyqtardyń koreı tilin úırenýge degen zor yntasyn kórip otyrmyz.

Álemde pandemııanyń taralýyna baılanysty qıyndyqtarǵa tap bolǵanda bizdiń eki el densaýlyq saqtaý salasynda tyǵyz yntymaqtastyq júıesin qurdy. Byltyr Koreıa Úkimeti Qazaqstanmen koronavırýspen kúresý boıynsha tabysty tájirıbesimen bólisti jáne Qazaqstanda jumys isteıtin koreıalyq kompanııalarmen birge jalpy somasy 1,2 mıllıon dollarǵa gýmanıtarlyq kómek kórsetti. Koreıa Respýblıkasynyń Elshiligi tarapynan Qazaqstanda az qamtylǵandarǵa kómek kórsetý úshin únemi aktsııalar ótkizilip turady. COVID-19 pandemııasynyń ózi ókinishti jaǵdaı, degenmen bul, bir jaǵynan, Qazaqstan halqyna jaqyn bola túsý ári qıyn-qystaý kezeńde naǵyz dostyq tanytý múmkindigi boldy», - dedi elshi.

Sondaı-aq, 8-9 qazanda EHRO aımaǵynda ornalasqan Nomad City Hall kontsert zalynda koreı mádenıeti festıvali ótedi.








Joǵary qaraı