Qazaqstan komandasy Sýrdlımpıadadan 13-oryn aldy

NUR-SULTAN. QazAqparat - XXIV jazǵy Sýrdlımpıada oıyndary máresine jetti. Bul týraly Dene múmkindikteri shekteýli tulǵalarǵa arnalǵan sporttyq daıarlaý ortalyǵy málimdedi, dep habarlaıdy QazAqparat.

«Brazılııanyń Kashıas-dý-Sýl qalasynda ótken jazǵy Sýrdlımpıada oıyndary aıaqtaldy. 1-15 mamyr aralyǵynda ótken jarysta álemniń 73 elinen 2500-ge jýyq sportshysy óner kórsetip, baq synady.

Baıraqty básekede Qazaqstan sportshylary 28 medalǵa qol jetkizdi. Onyń ishinde 3-eýi altyn, 7-eýi kúmis jáne 18-i qola», - dedi vedomstvodan.

Ortalyqtyń jazýyna qaraǵanda, Qazaqstan bul nátıjemen jalpy medaldyq esepte 13-orynǵa ornalasty. Tizimniń top basynda 137 medalmen Ýkraına tur. Ekinshi oryndy 54 medalmen AQSh enshiledi. Úzdik úshtikti 40 medalmen Iran sportshylary túıindedi.

«Elimizdiń sportshylary Brazılııadan 19 mamyr kúni saǵat 3.25-te Almaty qalasyna ushyp keledi», - dep málimdedi vedomstvo.