Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qazaqstan geologteri Kaspııdiń tabanynan 15 shaqyrymdyq uńǵyma burǵylamaqshy

2022 jyldyń 19 mamyr 2022 11:56

NUR-SULTAN. QazAqparat – Kaspııdiń tabanyndaǵy munaı qoryn tereńirek barlaý úshin teńizdiń tabanynan 15 shaqyrymdyq uńǵyma burǵylaý josparlanyp otyr, dep habarlaıdy QazAqparat tilshisi.

QR Ekologııa, geologııa jáne tabıǵı resýrstar mınıstrligi Geologııa komıtetiniń tóraǵasy Talǵat Satıev Ortalyq kommýnıkatsııalar qyzmetinde ótken brıfıngide «Eýrazııa» munaı barlaý jobasynyń qandaı satyda ekenin baıandady.

«Kaspıı mańy oıpatyn tereńdep zertteý jáne kómirsýtek shıkizatynyń qoryn ulǵaıtý maqsatymen «Eýrazııa» jobasy qolǵa alynǵan. Buǵan deıin Kaspııdegi ken oryndarynyń bári soltústiginde Qarashyǵanaq, Chınarev, Teplov-Tokarev ken oryndary tobynda ashylǵanyn atap ótken jón. Al shyǵysynda Jańajol, Keńqııaq, ońtústiginde – Teńiz, Qashaǵan, Qalamqas-Teńiz taby bar», - dedi Talǵat Satıev.

Onyń aıtýyna qaraǵanda, Kaspıı oıpaty ınvestorlar úshin áli de tartymdy.

«Byltyr geologııalyq-geofızıkalyq materıaldardy zamanaýı tehnologııalarmen taldap, qorytatyn halyqaralyq mańyzǵa ıe «Eýrazııa» jobasynyń birinshi kezeńin iske asyrý bastaldy.

Ekinshi jáne úshinshi kezeńderdi jeke ınvestıtsııalar esebinen iske asyrý josparlanǵan. Sonyń aıasynda óńirdegi seısmıkalyq ahýaldy pysyqtaý, perspektıvaly ýchaskelerge durys barlap, tereńde jatqan perspektıvaly obektilerdi izdeý kózdeledi. Buǵan joǵary tehnologııalar qajet.

Osy zertteýler kezinde 10-15 shaqyrymǵa deıingi uńǵyma burǵylaý josparlanyp otyr. Bul basseınniń áleýetin tereńirek barlap, baǵalaýǵa múmkindik beredi.

Osylaısha, memleket tereń gorızonttar men asa tereń uńǵymalar boıynsha derekter bankin qurady», - dedi komıtet tóraǵasy.

Aıta ketý kerek, «Eýrazııa» jobasynyń «tańǵajaıyp keleshegi» týraly 2010 jyldardyń basynan beri aıtylyp keledi.

Joba sol kezeńde Qazaqstan men Reseı Prezıdentterine kezekti óńirarlyq forýmda tanystyrylǵan bolatyn.

Geologtardyń málimetteri boıynsha, Kaspıı mańyndaǵy oıpatty aımaqtarda munaıdyń iri ken oryndary bar. Ondaǵy qor shamamen birneshe mıllıard tonnaǵa boljanyp otyr. Onyń ishinde perspektıvalyq ken ornynyń 70 paıyzǵa jýyq aýmaǵy Qazaqstannyń, 30 paıyzy Reseıdiń aýmaǵynda jatýy yqtımal ekeni aıtylǵan.

Al 2020 jyly QR Ekologııa, geologııa jáne tabıǵı resýrstar mınıstri Shell kompanııasyn Kaspıı mańy basseıinde geologııalyq barlaý jumystaryna ınvestıtsııa salý múmkinshilikterin zerdeleýge shaqyrǵan bolatyn.



Joǵary qaraı