Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstan fýtbol federatsııasy memleket esebinen qarjylandyrýdan bas tartty

2021 jyldyń 15 qarasha 2021 22:52

NUR-SULTAN. QazAqparat – Qazaqstan fýtbol federatsııasy memleket esebinen qarjylandyrýdan bas tartty. Bul týraly federatsııanyń baspasóz qyzmetinen málim etti, dep habarlaıdy QazAqparat tilshisi.

Qazaqstan fýtbol federatsııasynyń bas hatshysy Azamat Aıthojın 2022 jylǵy álem chempıonatynyń irikteý kezeńi aıasynda Frantsııamen ótken sátsiz oıyn úshin (8:0) keshirim surady.

«Eń áýeli qazaqstandyq jankúıerlerden Frantsııamen oıynda sátsizdikke ushyraǵanymyz úshin keshirim suraǵym keledi. Ár jeńilisti biz jan dúnıemizden ótkeremiz. Negizgi quramdaǵy biraz fýtbolshynyń bolmaýyna baılanysty, Parıjde ońtaıly qurammen oınaý múmkin bolmady. Búgingi tańda ulttyq komandamyzdyń rezervtik quramy joq deýge bolady. Komanda jetekshilerin almastyrǵan oıynshylar áli halyqaralyq deńgeıde oınaýǵa daıyn emes», - deıdi federatsııanyń bas hatshysy.

Azamat Aıthojınniń aıtýynsha, keıingi jyldary Qazaqstan fýtbolyna 100 mlrd teńgeden astam qarjy jumsalǵany týraly aqparat shyndyqqa janaspaıdy.

«Jurtshylyqtyń synyna keletin bolsaq, ashyq aıtaıyn: byltyr jáne onyń aldyndaǵy jyly Qazaqstan fýtbol federatsııasy memlekettik bıýdjetten 200 mıllıon teńgeden alyp otyrdy. Ol aqsha ulttyq komandanyń túrli jastaǵy quramalaryna (U17, U19, U21 sanaty boıynsha), Blind-Football (zaǵıp jandarǵa arnalǵan fýtbol), áıelder, ulttyq, jaǵajaı, sondaı-aq fýtzal quramasyn halyqaralyq jarystarǵa jumsaldy. Qaıdaǵy mıllıardtar týraly aıtylyp jatyr?», - deıdi federatsııa ókili.

Sondaı-aq, ol kelesi jyldan bastap Qazaqstan Fýtbol federatsııasy memlekettik jáne kvazımemlekettik qurylymdardyń qarjysynan bas tartý týraly sheshim qabyldanǵanyn málimdedi.

«Uıym ÝEFA-dan túsetin jáne demeýshilerdiń aqshasynan qarjylandyrylady. Sondyqtan, ulttyq quramanyń sátsizdikterin óz jarnamasy úshin paıdalanǵysy keletinderge aıtarym bar. Sizder eń bolmaǵanda, til bezemeı turyp, problemany tereń túsinip alyńyzdar, materıaldyq bólikti zertteńizder. Elimizde fýtbol bar, bolǵan jáne bola beredi. Bizde fýtbolmen tynystaıtyn mıllıondaǵan adam bar. Árıne, ulttyq fýtboldyń deńgeıin jańa deńgeıge kóterý úshin ýaqyt pen janashyr, jankúıerlerdiń qoldaýy kerek», - degen Azamat Aıthojın jýyqta ulttyq quramanyń bas jattyqtyrýshysymen birge jurtty tolǵandyratyn suraqtarǵa jaýap berý úshin sport jýrnalısterimen kezdesý ótkiziletinin jetkizdi.

Eske salsaq, qarashanyń 13-inen 14-ine qaraǵan túni Qazaqstan fýtbolshylary 2022 jylǵy álem chempıonatynyń irikteý kezeńi aıasynda Frantsııa quramasymen Parıjde kezdesip, 8:0 esebimen oısyraı utyldy. Qazaqstan quramasy buǵan deıin eshbir oıynda mundaı iri eseppen jeńilip kórmegen. Buǵan deıingi antırekord «6:0» bolatyn.
Avtor Esimjan Naqtybaı
Basty sózder: Sport, Qoǵam, Fýtbol,
Joǵary qaraı