Aýa raıy
Astana -24 °S
Almaty -7 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstan armııasy Uly dalanyń erjúrek batyrlarynyń dańqy men áskerı dástúrin muraǵa alǵan – QR Prezıdenti

2020 jyldyń 8 qazan 2020 16:07

ALMATY OBLYSY. QazAqparat - Qazaqstan Prezıdenti – Qarýly Kúshterdiń Joǵarǵy Bas qolbasshysy keshendi bitimgershilik oqý-jattyǵý jıynyna qatysty, dep habarlaıdy QazAqparat Aqordanyń baspasóz qyzmetine silteme jasap.

Almaty oblysynda Qazaqstan Qarýly Kúshteriniń tarıhynda alǵash ret keshendi bitimgershilik oqý-jattyǵý jıyny ótti. Oqý-jattyǵý jıynyn Memleket basshysy Qasym-Jomart Toqaev baqylady.
Oqý-jattyǵý jıynyna desantshy-shabýyldaýshy áskerdiń, áskerı-áýe kúshterdiń, áskerı polıtsııanyń, áskerı medıtsınalyq mekemelerdiń, Bitimgershilik daıyndyq júrgizý ortalyǵy men Mınadan tazartý ortalyǵynyń myńnan astam áskerı qyzmetshileri, 100-den astam áskerı jáne arnaıy tehnıka jumyldyryldy.
Oqý ortalyǵynyń komandalyq pýnktinde Joǵarǵy Bas qolbasshyǵa bitimgershilik polkiniń jumysy týraly baıandaldy. Sondaı-aq qazaqstandyq bitimgershilik polkine júktelgen mindetterdi oryndaýdyń jalpy algorıtmi týraly aqparat berildi. Sonymen qatar Prezıdentke bitimgershilik bazanyń úlgisi tanystyryldy. Memleket basshysy oqý ortalyǵynyń ınjenerlik, lıngvıstıkalyq, taktıkalyq jáne medıtsınalyq synyptaryn aralap kórdi.
Qasym-Jomart Toqaev bitimgershilik daıarlyq oqý ortalyǵynyń ınfraqurylymymen tanysqannan keıin oqý-jattyǵý jıynyn baqylady. Oqý-jattyǵý jıyny barysynda bitimgershilik kontıngenttiń gýmanıtarlyq júk tıelgen kolonnany alyp-júrý kezindegi is-áreketteri pysyqtaldy.







Joǵarǵy Bas Qolbasshy oqý-jattyǵýlary aıaqtalǵannan keıin áskerı qyzmetkerlerdiń aldynda sóz sóıledi. Memleket basshysy Qazaqstannyń zamanaýı armııasy Uly dalanyń erjúrek batyrlarynyń dańqy men áskerı dástúrlerin muraǵa alǵanyn atap ótip, muny árdaıym este ustaý kerek ekenin aıtty.
Memleket basshysy elimizde ǵana emes, búkil álemde beıbitshilik pen tynyshtyqty qamtamasyz etýdiń mańyzyn atap ótti. Onyń aıtýynsha, Qazaqstan álemdegi tynyshtyqty saqtaý maqsatymen qaqtyǵys aımaqtaryna bitimgershilik áskerin turaqty jiberip otyrady.
– Bizdiń basty basymdyǵymyz – yntymaqtastyq pen áriptestik. Sizder halyqaralyq qaýipsizdikti nyǵaıtýǵa úlken úles qostyńyzdar. Bitimger bolý degenimiz – álemniń elshisi bolý degen sóz. Sizder bul mindetti abyroımen atqardyńyzdar. Osyndaı oqý-jattyǵý jıyndarynyń arqasynda áskerı sheberlikterińiz shyńdala túsedi. Armııamyzdyń áskerı rýhy men dańqy odan ári arta túsetinine senimdimin, – dedi Prezıdent.
Memleket basshysy Tuńǵysh Prezıdent – Elbasynyń ózi tikeleı qurǵan Qarýly Kúshterdiń bitimgershilik qyzmeti elimizdiń beıbitshilik, halyqaralyq qaýipsizdik jáne turaqtylyq qaǵıdattaryna is júzinde saı keletinin jetkizdi.
Prezıdent 2007 jyldan beri 35 qazaqstandyq áskerı qyzmetshi, onyń ishinde tórt áıel azamat BUU-nyń Nepaldaǵy, Kot-d’Ivýardaǵy, Batys Sahara men Lıvandaǵy mıssııalaryna shtab ofıtserleri men áskerı baqylaýshylar retinde qatysqanyn aıtty. 2018 jyly BUU mandaty negizinde áreket etetin alǵashqy qazaqstandyq rotanyń Lıvanǵa jiberilýi elimizdiń bitimgershilik áleýetin nyǵaıtý úshin jasalǵan mańyzdy qadam.





– Qazirgi ýaqytta óz jaýapkershilik aımaǵynyń baqylaý-ótkizý beketterindegi áskerı mindetterin qazaqstandyq bitimgerler rotasynyń tórtinshi quramy atqarýda. BUU bitimgershilik áleýetiniń daıyndyq júıesindegi mindetter jelisin keńeıtý úshin Qazaqstan saperlerdiń, áskerı medıtsına qyzmetkerleriniń, barlaý jáne áskerı polıtsııanyń arnaıy bólimshelerin usyndy. Bul bólimsheler qazirgi bitimgershilik operatsııalarynda barynsha suranysqa ıe, – dedi Prezıdent.
Joǵarǵy Bas qolbasshy bitimgershilik daıarlyq oqý ortalyǵy mundaı mamandardy joǵary deńgeıde daıyndaıtynyna toqtaldy.
Qasym-Jomart Toqaev oqý-jattyǵý jıyny barysynda áskerı qyzmetkerlerdiń kórsetken kásibı biliktiligin atap ótip, qazaqstandyq bitimgerlerge minsiz jumystary úshin alǵys bildirdi. Memleket basshysy beıbit ómirde úlken mindetterdi atqaryp otyrǵan áskerdiń aıryqsha róline nazar aýdardy.
– Bıyl biz el bolyp pandemııamen kúresýdemiz. Osyndaı jaýapty kezeńde áskerı qyzmetshiler árqashan aldyńǵy shepte boldy. Sarbazdar men ofıtserler otandastarynyń ıgiligi jolynda naǵyz áskerı erliktiń úlgisin kórsetti. Pandemııaǵa qarsy is-qımyl sharalaryna atsalysqan barsha áskerı qyzmetkerlerge alǵys bildiremin, – dedi Qasym-Jomart Toqaev.
Memleket basshysy áskerı qyzmetshilerge arnaǵan sózinde armııanyń irgetasy qatań tártipke, ulttyq qaýipsizdikti saqtaýǵa baǵyttalǵan dara basshylyqqa negizdeletinin málimdedi. Sonymen qatar Qasym-Jomart Toqaev BUU bitimgershilik kontıngenti aıasynda qyzmet etý zor abyroı jáne úlken jaýapkershilik ekenin atap ótti.

Prezıdent BUU qurylǵan sátten beri álem kóptegen aımaqtyq jáne ultaralyq qaqtyǵystardan arylmaǵanyn ókinishpen jetkizdi. Ol barlyq qaqtyǵysty saıası-dıplomatııalyq jolmen sheshýge úndeıtin Qazaqstannyń dáıekti ustanymyn, halyqaralyq quqyqtyń bazalyq qaǵıdattaryn saqtaý qajettigin aıtty.
– «Bitpeıtin» nemese «uzaqqa sozylǵan» dep tanylǵan aımaqtyq qaqtyǵystar BUU Jarǵysynyń qazirgi halyqaralyq quqyqtyń qaınar kózi jáne negizi bolyp tabylatyn basty eki qaǵıdatynyń arasyndaǵy túbegeıli qarama-qaıshylyqtardy aıqyndady. Bul – memleketterdiń aýmaqtyq tutastyǵy men ulttardyń óz taǵdyryn ózi tańdaý quqyǵy. Sońǵy qaǵıdat memleketter táýelsizdik alyp, otarlyqtan qutylǵan kezde óte ózekti bola tústi. Qazirgi ýaqytqa deıin álem óziniń damý baǵytyn anyqtady. Sondyqtan búginde memleketterdiń aýmaqtyq tutastyǵy qaǵıdaty birinshi orynǵa shyǵyp, basymdyqqa ıe boldy. Qazirgi qaqtyǵystarǵa baǵa berý kezinde BUU Bas Assambleıasy men Qaýipsizdik Keńesiniń qararlaryn basshylyqqa alýy tıis, – dedi Memleket basshysy.





Joǵarǵy Bas qolbasshy Qarýly Kúshterdi damytýdyń perspektıvalaryna arnaıy toqtaldy.
– «Eki maqsatty kózdeıtin» komponentterdi damytýǵa basymdyq berý qajet. Pandemııamen kúres tájirıbesi olardyń suranysqa ıe ekenderin kórsetti. Atap aıtqanda, biz áskerı-kólik avıatsııasyn damytatyn bolamyz. Radıatsııalyq, hımııalyq jáne bıologııalyq qorǵanysh áskerleri óz mindetterin oryndaýǵa árqashan daıyn bolýy tıis, – dedi Qasym-Jomart Toqaev.
Prezıdenttiń aıtýynsha, mundaı áskerlerdi zamanaýı tehnıkamen jabdyqtaýǵa basymdyq berilip, bul jumysqa otandyq kásiporyndar tartylýy qajet.
Memleket basshysy áskerdi basqarýda tsıfrlyq tehnologııalardy damytý qajettigine, sondaı-aq, kıber jáne aqparattyq keńistiktegi taktıka men áreketterdiń strategııasyn pysyqtaýǵa kóńil bóldi.
Joǵarǵy Bas Qolbasshy serjanttar men ofıtserlerdi durys daıyndamaǵan jáne yntalandyrmaǵan jaǵdaıda qýatty Qarýly Kúshter qurý múmkin emes dep esepteıdi.
Bizdiń basty mindetterimizdiń biri – serjanttyq quramǵa kásibı áskerı bilim berý isin damytý. Bul máseleni sheshýde «Jas Ulan» mektepteriniń jáne Kadet korpýsynyń barlyq áleýetin paıdalaný qajet. Qalyptasqan jaǵdaı komandırlerge de erekshe talap qoıady. Olar baqylaýshy organdar tarapynan ótkiziletin túrli sharalarǵa alańdamaı, qajetti bastama men sheshim qabyldaý múmkindigine ıe bolý kerek. Eger áskerı qyzmetshilerdiń tarapynan quqyq buzýshylyq derekteri anyqtalsa, olar zańǵa sáıkes qatań jaýapqa tartylýy tıis. Biraq komandırlerdi jumystarynan sebepsiz ajyratýǵa jol berilmeıdi. Bul máseleler quqyq qorǵaý júıesin reformalaý aıasynda qarastyrylýy kerek, – dedi Prezıdent.





Memleket basshysy Qarýly Kúshterdiń zamanaýı áskerı ınfraqurylymyn jáne materıaldyq-tehnıkalyq qamtamasyz etýdiń logıstıkalyq júıesin qurý qajettigin aıtty.
Qasym-Jomart Toqaev sóziniń sońynda armııany jáne áskerı qyzmetshilerdi áleýmettik qoldaý máseleleri árdaıym memlekettiń basty nazarynda bolatynyn atap ótti.





















Joǵary qaraı