Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaq tarıhyn aǵylshyn tilinde jazatyn ǵalymdardyń shyǵatynyna senemiz – Kósherbaev

2021 jyldyń 15 qazan 2021 13:56

NUR-SULTAN. QazAqparat – Tarıh ǵylymynyń basty mıssııalarynyń biri – halyqty álemge tanytý. Tańdaýly eńbekterdiń aǵylshyn tiline aýdarylýyna memleket tarapynan qamqorlyq jasalýy tıis. Bul týraly QR Memlekettik hatshysy Qyrymbek Kósherbaev aıtty, dep habarlaıdy QazAqparat tilshisi.

«Keıingi kezde qazaq tarıhynyń qazaq tarıhshylary kózimen zerttele bastaǵany, qazaq tarıhynyń qazaqsha jazylyp júrgeni jaqsy úrdis. Sonymen birge, tarıh ǵylymynyń basty mıssııalarynyń biri – halyqty álemge tanytý ekenin de esten shyǵarýǵa bolmaıdy. Bul oraıda orys tiline jazylyp nemese orys tiline aýdarylyp, keńesten keıingi keńistikke taraıtyn tarıhı eńbekterdiń kúrt azaıyp ketkenine alańdaý bildirý jón. Olardyń tańdaýlylary aǵylshyn tiline aýdarylýyna da memleket tarapynan qamqorlyq jasalýy tıis. Birte-birte zertteýlerin tikeleı aǵylshyn tilinde jazatyn ǵalymdardyń da shyǵatynyna kámil senemiz», - dedi Memlekettik hatshy belgili ǵalym, alashtanýshy Tursyn Jurtbaıdyń 70 jyldyǵyna arnalǵan «Eldik ustanym jáne Táýelsizdik nysanasy» atty halyqaralyq konferentsııada.

Qyrymbek Kósherbaev Memleket basshysy Qasym-Jomart Toqaevtyń da bul jóninde arnaıy aıtqanyn, osyǵan baılanysty redaktsııa alqasyn quryp, jumys toptaryn jasaqtap, naqty merzimin belgilep, qarjylandyrý tetikterin jasap, tez arada iske kirisý qajettigin basa aıtty.

«Reseı ǵylym akademııasynyń N. Mıklýho-Maklaı atyndaǵy etnologııa jáne antropologııa ınstıtýty «Narody ı kýltýry» serııasymen TMD keńistigindegi etnostarǵa arnalǵan kólemdi zertteý eńbekterin júıeli túrde jarııalap keledi. Ózimizge jaqyn túrkitildes halyqtardy atap ótsek, olardyń arasynda «Ýzbekı», «Kyrgyzy», «Bashıkırı», «Tıýrkskıe narody Kryma», «Tıýrkskıe narody Sıbırı», «Týrkmeny», «Tatary», «Azerbaıdjantsy» tomdary jaryq kórgenin aıta alamyn. Bul serııamen 2019 jyly «Kazahı» atty kitaby da shyqty. Eger mamandar bul eńbektiń sapasyn jaqsy dep baǵalap jatsa, ony aǵylshyn tiline aýdarýdy da tıisti jolmen oılastyrǵan durys bolady. Jalpy aıtqanda, Qazaqstan tarıhy qaıta qaraýdy, jan-jaqty zertteýdi qajet etedi. Al ony iske asyrý – tarıhshylarymyzdyń basty mindeti, ortaq iske sáttilik tileımin», - dedi Memlekettik hatshy.

Buǵan deıin Qyrymbek Kósherbaev Qazaqstan tarıhyn zertteýdegi keleli máselelerdi ataǵan edi.


Joǵary qaraı