Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qasym-Jomart Toqaev Mońǵolııanyń Syrtqy qatynastar mınıstrin qabyldady

2021 jyldyń 13 qazan 2021 18:21

NUR-SULTAN. QazAqparat - Memleket basshysy Nur-Sultan qalasyna resmı saparmen kelgen Mońǵolııanyń Syrtqy qatynastar mınıstri Batmýnh Battsetsegti qabyldady, dep habarlaıdy QazAqparat Aqoranyń resmı saıtyna silteme jasap.

Kezdesý barysynda Qasym-Jomart Toqaev qarqyndy damyp kele jatqan qazaq-mońǵol qarym-qatynastaryna toqtaldy.

– Mońǵolııa – bizdiń senimdi ári strategııalyq seriktesimiz. Memleketterimizdi ortaq tarıhymyz biriktiredi. Mońǵol halqyna, Sizdiń memleketińizge degen qurmetimiz erekshe. Sizder bizdiń halyqaralyq bastamalarymyzǵa túsinistik tanytyp, únemi qoldaý kórsetesizder. Sondaı-aq halyqaralyq alańdarda birge belsendi jumys istep kelemiz. Osy yntymaqtastyǵymyzdy odan ári arttyryp, is júzinde nyǵaıta berýimiz qajet dep sanaımyn. Bul, eń aldymen, saýda-ekonomıkalyq yqpaldastyqqa qatysty. Biz kólik logıstıkasy salasyn pysyqtaı túsýimiz kerek, – dedi Prezıdent.




Memleket basshysy qalyptasqan ekijaqty yntymaqtastyqtyń áleýetin barynsha paıdalanýǵa shaqyrdy.

– Osy sátti paıdalana otyryp, etnıkalyq qazaqtarǵa kórsetilip otyrǵan qurmeti pen qamqorlyǵy úshin Sizdiń eldiń basshylyǵyna jáne mońǵol halqyna rızashylyǵymdy bildiremin. Mońǵolııa qazaqtarynyń tilin, mádenıeti men dástúrin saqtaý máseleleri boıynsha tyǵyz yntymaqtastyǵymyz jalǵasa beredi dep úmittenemin. Bul – Sizdiń memleketińiz júrgizip otyrǵan ulttyq saıasattyń nátıjesi. Muny zor rızashylyqpen atap ótkim keledi, – dedi Qasym-Jomart Toqaev.




Mońǵolııa Syrtqy saıasat vedomstvosynyń basshysy qabyldaǵany úshin Qasym-Jomart Toqaevqa alǵys aıtyp, Mońǵolııa Prezıdenti Ýhnaagıın Hýrelsýhtyń sálemin jetkizdi.

– Prezıdentimizdiń shynaıy sálemin jetkizýdi zor mártebe sanaımyn. Mońǵolııa men Qazaqstandy jaqyn kórshi elder dep aıtýǵa bolady. Qazaqstan Respýblıkasymen aradaǵy baılanystardy damytý isi Mońǵolııanyń syrtqy saıasatynda mańyzdy oryn alady. Biz bul qatynastardy jandandyrǵymyz keledi. Kelesi jyly elderimiz arasynda ornaǵan dıplomatııalyq qatynastardyń 30 jyldyq mereıtoıyn atap ótemiz, – dedi Batmýnh Battsetseg.




Kezdesý sońynda Memleket basshysy Qasym-Jomart Toqaev Mońǵolııa Prezıdenti Ýhnaagıın Hýrelsýhty elimizge resmı saparmen kelýge shaqyratynyn aıtty. Memleket basshysy atalǵan resmı sapar Qazaqstan men Mońǵolııa arasyndaǵy yntymaqtastyqtyń damýyna tyń serpin beredi dep sanaıdy.


Joǵary qaraı