Aýa raıy
Astana 25 °S
Almaty 27 °S
valıýta baǵamy
USD 412.55
EUR 468.66
RUB 5.79
CNY 58.80

Qasym-Jomart Toqaev 35 jyl buryn Elbasymen qalaı tanysqanyn aıtyp berdi

2020 jyldyń 2 shilde 2020 07:40

NUR-SULTAN. QazAqparat - Qazaqstan Prezıdenti Qasym-Jomart Toqaev búgin Egemen Qazaqstan gazetinde jarııalanǵan maqalasynda Elbasy Nursultan Nazarbaevpen qalaı tanysqanyn aıtyp berdi, dep habarlaıdy QazAqparat.

«Meniń Elbasyn alǵash kór­genime de 35 jyldyń júzi bolyp­ty. Nursultan Ábishuly 1985 jyl­dyń qyrkúıeginde Qazaq KSR Mı­nıstrler Keńesiniń Tóraǵasy kezinde Qytaıǵa kelgen edi. Ol kezde elshilikte jumys isteıtinmin. Son­da Úkimet basshysynyń qy­taı­lyq­tar­men kelissóz barysynda baı­qalǵan mol bilimine, totalıtarızm tusyn­da qa­lyp­tasqan jaılar jónindegi batyl oılaryna, sóziniń júıeliligine bári­miz qatty razy bolǵanbyz. Elshilik qyzmet­kerlerimen bas-aıaǵy eki jarym saǵatqa sozylǵan beıresmı áńgimeden keıin bas qos­qanymyzda men áriptesterime qarap: «Te­ginde, biz Qazaqstannyń bolashaq bas­shy­symen sóılesken shyǵarmyz» dedim. Arada bes jyl ótkende Nursultan Nazarbaev elimizdiń bas­­shy­lyǵyna keldi. Qazaqstannyń Tuńǵysh Prezı­dentiniń táýelsizdik tańyndaǵy alǵashqy kadrlyq sheshimderiniń biri meniń de taǵdyrymdy aı­qyn­dap berdi. «Belasý» atty kita­bymda: «Bul úlken júrekti adam meniń qabiletime sendi, sendi de ony ózim týyp-ósken Qazaq­stan ıgi­ligi úshin aıamaı jumsaýyma jol ashty» dep jazǵan bolatynmyn» dep jazady Memleket basshysy.

Onyń aıtýynsha, Birikken Ulttar Uıymy Bas hat­­shy­­synyń orynbasary bolyp júrgende álemge áıgili saıasat­ker­lerdiń Nursultan Nazarbaevqa bıik baǵa bergen sózderin talaı es­­­tigen.

«Halqymyz úshin mereı­len­dim. Eldiń Prezıdentine ǵana emes, emiren­gen etene perzentine aınala bilgen Nursultan Ábishuly Nazar­baev qara­paıym eńbek adam­darynyń otbasynda dúnıege keldi, qazaq mektebinde bilim aldy, eńbek jolynyń bastaýynda shoıyn qory­typ shyńdaldy. Ózi týyp-ós­ken Alataýdyń asqaq shyń­daryn­daı asqaraly armanyna erte qol sozdy. Jastaıynan jurttyń ja­ıyn oılady, ózi de dombyra sher­tip, halyq murasyn jaqsy bilgen­dikten, zııaly qaýymǵa jaqyn boldy. Uıymdastyrýshylyq qabi­leti men eńbekke degen eren súıis­pen­shiligi jas jetekshini basqarý júıesiniń eń bıik shyńyna alyp keldi» dep atap ótti Qasym-Jomart Toqaev.


Joǵary qaraı