Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qashyqtan oqytý kezinde túrli tsıfrlyq resýrstardy paıdalanǵan jón - almatylyq ustaz

2022 jyldyń 27 qańtar 2022 13:57

ALMATY. QazAqparat - Oqý-aǵartý salasynda onlaın oqytý uǵymy qalyptasty. Bilim alýshylar da, muǵalimder de bul úrdisti qabyldady. Onlaın dáristiń paıdasy qandaı, kemshil tustary bar ma? Bul saýaldardy QazAqparat tilshisi almatylyq ustaz, «№79 gımnazııanyń» qazaq tili men ádebıeti pániniń muǵalimi, «Dıjıtal ustaz Almaty» jobasynyń sýper fınalısi Suńqar Asqarovqa qoıdy.

- Qashyqtan oqytýdyń paıdasy men zııany týraly aıtyp berińizshi?

- Qashyqtan oqytý – zaman talaby. Elimizdegi epıdımıologııalyq ahýalǵa baılanysty bilim berýdiń birden- bir sheshimi qashyqtan oqytý bolyp tabylady. Ult bolashaǵy úshin birinshi orynǵa oqýshylar men ustazdardyń densaýlyǵyn qoıǵan jón. Osy rette bul oń sheshim.

Qashyqtan oqý kezinde oqýshylar úıden shyqpaı ınternet jelisine qosylǵan kompıýter nemese smartfon arqyly-aq bilim alýǵa múmkindikteri bar. Al, bul máseleniń ekinshi jaǵy bar. Oqýshylar mektep qabyrǵasynda bilim alǵanda, sabaq basynda jáne sońynda soǵylatyn «qońyraý» únin estıdi. Bul oqýshyǵa sabaqtyń bastalǵanyn nemese aıaqtalǵanyn bildirip sıgnal beredi. Al, úı jaǵdaıynda barlyq oqýshy óz bólmesin «oqý orny» dep qabyldaı bermeıdi.

Qashyqtan oqytýdyń taǵy bir paıdasy, qabyldaý qabileti baıaý damyǵan oqýshylar muǵalimniń vıdeo- lektsııalaryn birneshe ret qaıtalap kórip, tyńdaý arqyly qıyn taqyryptardy óz betinshe ıgere alý múmkindigi joǵary. Árıne, bilim berý protsesinde muǵalim men oqýshynyń arasyndaǵy tikeleı «tiri» qarym- qatynas óte mańyzdy.

- Onlaın format oqýshylardyń bilimin tómendetip jibermeı me?

- Onlaın formatynda oqý ınternetke tikeleı táýeldi. Osy oraıda, áleýmettik jaǵdaıy tómen otbasylarǵa memleket qamqorlyq jasap, oqýshynyń tolyqqandy bilim alýyna jaǵdaı jasap otyrǵany quptarlyq is.

Oqýshylardy onlaın formatta oqytý muǵalimnen asa úlken jaýapkershilikti talap etedi. Sebebi, buryn mundaı ádis- tásilge muǵalimde, oqýshy da arnaıy daıyndyqtan ótip beıimdelgen emes. Onlaın formatta oqý kezinde ár oqýshy ózine júktelgen mindetti jaýapkershilikpen oryndap, sabaqqa ár oqýshy óz ýaqytymen qatysyp otyrsa bilim deńgeıi tómendemeıdi dep oılaımyn.




- Qashyqtan oqýdyń oqýshylar úshin qandaı oń áseri boldy dep oılaısyz?

- Qashyqtan oqytýdyń oqýshylar úshin birden- bir oń áseri bala kóp ýaqytyn ata- anasynyń jáne jaqyndarynyń janynda ótkizedi, qalaǵan ýaqytynda bilim ala alady. Sabaqqa kerek materıaldardy ózi izdenip tabýyna múmkindigi mol. Oqýshynyń óz betimen bilim alý qabileti arta túsedi dep oılaımyn. Eń bastysy, densaýlyǵy úshin qaýipsiz aımaqta bilim alady.

- Qashyqtan oqytýda qaı platformany tańdaǵan durys?

- Qazirgi tańda bilim alý platformalary óte kóp. Qandaı platforma bolmasyn muǵalimdi almastyra almaıtyny anyq. Degenmen, muǵalim platformany durys tańdap, óz sabaǵynda utymdy paıdalansa, bilim berý sapasy joǵarylaıdy. Qashyqtan oqytý kezinde oqýshylardy tek kitap, qalam arqyly oqýǵa qyzyǵýshylyǵyn oıatý qıyn. Sabaq kezinde túrli tsıfrlyq resýrstardy, platformalardy paıdalanǵan jón. Men óz tájirıbemde «Onlaınmektep» , «Classtime», «Edpuzlle» qosymshalaryn paıdalanamyn. Bul qosymshalar muǵalim men oqýshy arasyndaǵy keri baılanys úderisin tezdetedi. Muǵalimge synyp oqýshylarynyń úlgerimin qadaǵalaýǵa taptyrmas kómekshi qural. Al, oqýshylar úshin óz oqý jetistikterine ózderi baqylaý jasap, damý baǵyttaryn anyqtaýǵa kómektesedi. Bul platformalar muǵalimderden qosymsha shyǵarmashylyq izdenisti talap etedi.

- Muǵalimderdi aldyn ala daıyndaý jáne uıymdastyrý sharalary júrgizildi me?

- Qashyqtan oqytý bastalǵanda men jumys atqaratyn «№ 79 gımnazııada» mektep ákimshiliginiń uıymdastyrýymen muǵalimderge qashyqtan oqytý kýrstary, semınarlar júrgizildi. Al, 2021 jyldyń qyrkúıek aıynan bastap Almaty ákimshiligi jáne «EdCrunch» akademııasynyń uıymdastyrýymen «Dıjıtal ustaz Almaty» jobasy uıymdastyryldy.

Joba aıasynda ZOOM arqyly bilim berý vebınarlary júrgizildi (jazbalaryn You Tube jelisinde qaıtalap kórý múmkindigi boldy) jáne áleýmettik jelilerde bilikti muǵalimder qyzyqty jáne paıdaly aqparattarmen bólisti. Bul jobaǵa pedagogıka salasynda qyzmet atqaratyn kez- kelgen muǵalimniń qatysý múmkindigi boldy. Jobanyń sońǵy kezeńinde júzden júırik shyqqan otyz muǵalimdi iriktep, tsıfrlyq pedagogıkanyń qyr- syrymen tanystyryp, sheberlikterin shyńdaýǵa kómektesti. Bul joba qalamyzda tsıfrlyq pedagogıkanyń damýyna úlken serpin berdi.

- Suhbatyńyzǵa rahmet!


Avtor Alma Muqanova
Basty sózder: Bilim, Almaty,
Joǵary qaraı