Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandyda taǵy bir ferroqorytpa zaýyty ashyldy

2021 jyldyń 26 qarasha 2021 13:00

QARAǴANDY. QazAqparat - Qaraǵandy oblysynyń ındýstrııasy zamanaýı kásiporynmen tolyqty. Oblys ortalyǵynda «Qaz Carbon» JShQ Saryarqa ferroqorytpa zaýyty ashyldy. Ol qysqa merzimde – 9 aıda salyndy. Sońǵy eki jylda bul qaladaǵy ekinshi zaýyt, dep habarlaıdy QazAqparat.

Joba «Qazaqstannyń Damý Banki» AQ qarjylyq qoldaýymen júzege asyryldy. Onyń ishinde 11 mlrd teńge – kompanııanyń menshikti qarajaty, QDB qaryzy - 38,8 mlrd teńge.

Zaýyttyń óndiristik qýaty – jylyna 57 myń tonna ferroqorytpa. Árqaısysy 8 MVt bolatyn segiz pesh ornatylady. Zaýyt táýligine 25 tonna túrli ferroqorytpa shyǵarýǵa qaýqarly.

Birinshi kezeńde tórt pesh paıdalanýǵa berildi, qalǵan tórteýi jyl sońyna deıin paıdalanýǵa beriledi. Osy ýaqytqa deıin zaýyt tolyǵymen óziniń óndiristik qýatyna shyǵady.

«Qaz Carbon kompanııasynyń iri ınvestıtsııalyq jobalardy iske asyrýda úlken tájirıbesi bar ekenin atap ótkim keledi. Muny iske asyrý Memleket basshysynyń ınvestıtsııalar tartý, óńdeý ónerkásibindegi eńbek ónimdiligin arttyrý jónindegi tikeleı tapsyrmalaryn oryndaýǵa yqpal etedi. Jańa zaýytta 300-den astam turaqty jumys orny ashyldy», – dedi Qaraǵandy oblysynyń ákimi Jeńis Qasymbek ashylý saltanatynda.

Ferroqorytpa zaýytynyń qurylysy 2020 jyldyń jeltoqsanynda bastaldy. Tamyz aıynda alǵashqy rýdotermııalyq ferroqorytpa peshi iske qosyldy. Qazirdiń ózinde 3 myń tonnadan astam otandyq sılıkomarganets óndirildi. Ónim sheteldik tutynýshylarǵa – Japonııaǵa, Koreıaǵa, EO jáne TMD elderine jóneltildi. Aldaǵy ýaqytta zaýyt eksport kólemin arttyrady.

« Búgin Qazaqstan Respýblıkasy Táýelsizdiginiń 30 jyldyǵy qarsańynda biz ferroqorytpa óndirisi boıynsha taǵy bir jobany ashyp otyrmyz. Jańa kásiporynda álemdik tehnologııalyq ázirlemeler qoldanylǵan jáne jańa jabdyqtar ornatylǵan. Bul óndiris ekologııalyq taza, qorshaǵan ortaǵa barynsha az áser etedi. Zaýytta aýany lastamaıtyn úsh satyly gaz tazalaý júıesi qoldanylǵan. Qaldyqtardy qaıta paıdalaný kózdeledi. Qaz Carbon jobasynyń jalpy somasy 50,7 mlrd teńgeni quraıdy, oǵan baıytý fabrıkasy, aglomeratsııalyq fabrıkasy bar Saryarqa ferroqorytpa zaýyty jáne qoldanystaǵy óndiristi jańǵyrtý kiredi», – dedi Qaz Carbon aktsıoneri Erlan Nyǵmatýlın.

Zaýyt Qaraǵandy óńiriniń shıkizatyn qaıta óńdeýge jobalanǵan, bul úzdiksiz óndiristik tsıkldy qamtamasyz etýge jáne álemdik naryqtarǵa sapaly ónim shyǵarýǵa múmkindik beredi. Bul Qazaqstannyń ekonomıkasy men eksporttyq áleýetiniń damýyna yqpal etedi. Óndiristik protsess tolyǵymen avtomattandyrylǵan. Peshter úsh saǵat ishinde qorytpalardyń bir túrinen ekinshisine aýysa alady.




«Jańa zaýyt – Qazaqstandaǵy qolaıly ınvestıtsııalyq ahýaldyń kórsetkishi. Sheteldik ınvestorlar retinde biz osy jerde jumys isteý úshin jasalǵan zańnamalyq bazany jáne basqa da jaǵdaılardy erekshe atap ótkimiz keledi. Bul, árıne, Qazaqstannyń búgingi tańda ferroqorytpa naryǵyndaǵy perspektıvaly oıynshy ǵana emes, sondaı-aq úlken qorlarmen myqty básekeles bolý faktoryna áser etedi», – dep atap ótti Qaz Carbon tobynyń aktsıoneri Davıd Kemertelıdze.

«Qaz Carbon ınnovatsııalyq kásipornynda QDB-niń strategııalyq baǵyttaryna – óńirdiń áleýmettik-ekonomıkalyq damýyna, ımportty almastyrýǵa, eksportqa baǵdarlanǵan strategııaǵa jáne álemdik naryqta qosylǵan quny joǵary básekege qabiletti ónimniń otandyq óndirisine tolyq kólemde sáıkes keletin zaýyt quryltaıshylarynyń biregeı ınjenerlik oıy iske asyryldy. Sondaı-aq kompanııanyń ekologııalylyq pen óndiris qaýipsizdiginiń joǵary standarttaryna beıildiligi», – dep atap ótti Qazaqstannyń Damý banki basqarmasynyń Tóraǵasy Abaı Sarkýlov.

Qaz Carbon kompanııasy 2021 jyldyń sáýir aıynda jylyna 2 mln tonna kómir óndiretin baıytý fabrıkasyn iske qosqanyn eske sala ketemiz. Kompanııanyń kórme ortalyǵy salyndy. Osy jyldyń sońyna deıin qýaty jylyna 200 myń tonna aglomeratsııalyq fabrıkany iske qosý josparlanýda.


Joǵary qaraı