Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandy polıtseıleri kópqabatty úıdegi órtten balalardy qutqardy

2021 jyldyń 17 qazan 2021 21:42

QARAǴANDY. QazAqparat – Qaraǵandyda tártip saqshylary órt shyqqan úıden eki áıel men tórt balany alyp shyqty, dep habarlaıdy QazAqparat tilshisi.

Qaraǵandy qalalyq Polıtsııa basqarmasy patrýldik polıtsııa polkiniń arnaıy mashınasynyń ekıpajy – aǵa leıtenanttar Damır Adalıev pen Shynarbek Asylhan qalanyń Ortalyq sektorynda qyzmet atqaryp júrgen kezde, saǵat 20.30 shamasynda olarǵa dabyl habarlamasy túsken. Dıspetcher Pıchýgın kóshesindegi bes qabatty úıde páter janyp jatqanyn málim etken. Polıtsııa oqıǵa ornyna birneshe mınýtta jetti.

Birinshi kireberiste tútin býdaqtap jatqanyn kórgen polıtseıler kómekke asyqqan. Oqıǵa ornynda órt sóndirýshiler jumys istep, podezge adamdardy kirgizbeýge tyrysqan. Dalaǵa shyǵyp úlgergen turǵyndar kóptegen adam áli de páterlerde qalyp otyrǵanyn aıtqan.

«Áriptesimmen birge podezge kirip, páterlerdiń esigin qaǵa bastadyq. Tútin qalyń bolǵany sonshalyq, betimizdi kıimmen jaýyp qana júre aldyq. Tek osyndaı jaǵdaıda ǵana demalý múmkin boldy. Biz tórtinshi qabatqa kóterilip, 16-shy páterde segiz jáne on jastaǵy eki balasy bar áıel jáne ıti qalǵanyn anyqtadyq. Seriktesimmen birge barlyǵyn kóshege shyǵardyq», - deıdi Shynarbek Asylhan.

Polıtseıler taza aýaǵa shyǵyp, dem ala bastaǵan bette olardyń janyna erli-zaıypty jaqyndap, tańerteń jumysqa ketkende úılerinde kári ata-anasyn eki balamen qaldyrǵanyn jetkizgen. Belgili bolǵandaı, atasy men ájesi náresteni alyp shyqqan. Al eki jasar nemeresi úıde qalyp qoıǵan. Sonymen qatar besinshi qabattaǵy páterde bes jasar balasy bar áıel de qalǵan. Bul málimetterdi estigen bette tártip saqshylary oılanbastan taǵy da tútinge oranǵan kireberiske júgirgen.

Olar eki jasar balany balkonnan tapqan. Polıtseıler búldirshindi orap alyp, dalaǵa shyǵardy.

«Men besinshi qabatqa kóterilip, 18-shi páterdiń esigin qaqtym. Onda áıel men bes jasar bala boldy. Nege shyqpaı turǵandaryn surap edim, ol kireberis qarańǵy jáne qatty tútin bolǵandyqtan syrtqa shyǵýǵa qorqatynyn túsindirdi. Men balany qolyma alyp, áıeldi jetektep, birge tústik», - deıdi Damır Adalıev.

Oqıǵa kezinde eshkim zardap shekken joq. Turǵyndar óz úılerine shamamen 23.00-de orala aldy. Osydan keıin polıtseıler qyzmetin jalǵastyrdy. Keıinnen órt elektr symdarynyń tuıyqtalýynan bolǵany anyqtaldy.


Joǵary qaraı