Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandy oblysynyń balabaqshalarynda memlekettik tapsyrys kólemi ulǵaıtyldy

2021 jyldyń 23 qazan 2021 22:53

QARAǴANDY. QazAqparat – Qaraǵandy oblysynda balabaqshalarda memlekettik bilim berý tapsyrysyn ulǵaıtý úshin qarajat qarastyryldy. Bir balaǵa endi 38 myń teńge bólinedi – bul ótken jyldarǵa qaraǵanda 9 myń teńgege artyq, dep habarlaıdy QazAqparat tilshisi.

Oblystyq máslıhat depýtattary onlaın rejıminde ótken kezekten tys VIII sessııada oblystyq bıýdjetke ózgeristerdi maquldady.

Bilim berý qajettilikterine qosymsha 4,8 mıllıard teńge bólindi. Qarjy basqarmasynyń basshysy Lıýdmıla Basharınanyń aıtýynsha, bul qarajat 1-4 synyp oqýshylarynyń tegin tamaqtanýyna, balabaqshalarda jan basyna qarjylandyrýǵa, shákirtaqynyń ulǵaıýyna, balalardyń qaýipsizdigine jáne t. b. jumsalady.

Sonymen qatar, densaýlyq saqtaý, mádenıet jáne sport nysandaryn jóndeýge qarjy bólindi. Jáne de oblystyń jeti memlekettik muraǵatyna qordy sandyq júıege aýystyrý úshin aqsha bólindi.

Budan basqa, turaqtandyrý qoryn qurýǵa, fermerlerge mıneraldy tyńaıtqyshtardyń qunyn sýbsıdııalaýǵa shyǵyndar qarastyrylǵan. Turǵyn úı máselesi de nazardan tys qalmady: bıýdjette kezekte turǵandarǵa úıler salý men qaıta jańartýǵa, halyqtyń áleýmettik qorǵalatyn sanattaryna páter satyp alýǵa kóbirek qarjy bólindi.

Saran qalasynda ındýstrıaldy aımaq ınfraqurylymynyń qurylysy bastalady: gaz qubyry men sý qudyqtary. Bul jobalar da oblystyq bıýdjetten qarjylandyrylady.

«Qarajat aımaqtyń damýyna, áleýmettik máselelerdi sheshýge jumsalady. Óte mańyzdy másele – turaqtandyrý qorlaryn tolyqtyrý. Bizdiń fermerler men taýar óndirýshilerdiń áleýmettik jaýapkershiligin atap ótkim keledi jáne olarǵa aımaqtyń azyq-túlik qaýipsizdigin qamtamasyz etýge kórsetken kómekteri úshin alǵys bildiremin. Bıyl jaz qurǵaq bolǵanyna qaramastan, dıqandar jaqsy ónim jınady. Buǵan memlekettik qoldaý kómektesti. Bizdiń taraptan mıneraldy tyńaıtqyshtardy sýbsıdııalaý máselesin tolyǵymen jabý úshin qoldan kelgenniń bári jasaldy», – dedi oblys ákimi Jeńis Qasymbek.

Sessııada depýtattar memlekettik-jekemenshik áriptestiktiń jańa úsh jobasyn da maquldady. Qaraǵandyda ınvestorlar eki jańa emhana men sáýlelik dıagnostıkalyq ortalyq salýǵa nıetti.

Joǵary qaraı