Aýa raıy
Astana -7 °S
Almaty -13 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandy oblysynda sý tartý boıynsha 90 joba júzege asyrylady

2020 jyldyń 27 qazan 2020 09:17

QARAǴANDY. QazAqparat – Qaraǵandy oblysynda 2022 jylǵa qaraı qala turǵyndaryn tolyqtaı ortalyqtandyrylǵan sýmen qamtamasyz etý maqsaty qoıylǵan. Aýyldyq eldi mekenderde 2023 jylǵa qaraı júz paıyzdyq kórsetkishke qol jetkizý kózdelýde. Bıyl bul mindetti oryndaý úshin óńirde 90 joba júzege asyrylady. Sýmen qamtamasyz etýdiń 25 jańa nysany salynýda, dep habarlaıdy QazAqparat tilshisi.

Onlaın rejımde ótken apparattyq keńeste sapaly aýyz sýmen qamtamasyz etý jaǵdaıy men áleýeti talqylandy.

«Prezıdenttiń Qazaqstan halqyna Joldaýyn oryndaý maqsatynda Qaraǵandy oblysynda 2019 jyly memlekettik jáne úkimettik baǵdarlamalar boıynsha sýmen jabdyqtaý jáne sý burý boıynsha 31 joba iske asyryldy. Eldi mekenderde 295 shaqyrym sý qubyry jáne káriz jelileri salyndy jáne qaıta jańartyldy, sý qubyry jelileriniń tozýy 67%-ǵa deıin, káriz jelileriniń tozýy 78%-ǵa deıin tómendedi, 11 nysan paıdalanýǵa berildi. 2020 jyly «Óńirlerdi damytý«, «Nurly jol«, «Jumyspen qamtýdyń jol kartasy« baǵdarlamalary boıynsha 90 jobany iske asyrýǵa qarajat bólindi. Jyl qorytyndysy boıynsha 380 shaqyrymnan astam sý qubyry men káriz jelilerin salý jáne qaıta jańartý, 76,8 shaqyrym jelige aǵymdaǵy jóndeý júrgizý jáne 25 nysandy paıdalanýǵa berý josparlanǵan», - dep baıandady energetıka jáne turǵyn úı-kommýnaldyq sharýashylyq basqarmasynyń basshysy Ulantaı Úsenov.

Toǵyz aıda 274 shaqyrym jeli salyndy jáne qaıta jańartyldy.

Onyń aıtýynsha, osy jylǵy jobalardy iske asyrý sapaly sýmen qamtamasyz etýge qoljetimdilikti qalalarda 98%-ǵa deıin, aýyldyq eldi mekenderde 89,9%-ǵa deıin jetkizýge múmkindik beredi.

Aldaǵy úsh jylǵa josparlar jasalýda. Respýblıkaǵa taǵy 27 jobaǵa ótinim berildi. «Nurly Jer» baǵdarlamasy boıynsha 45 basym aýyl iriktelip alyndy, olardyń altaýynda jumystar bastaldy.

200-den az adam turatyn aýyldarda sýdy blok-modýldik tazartý keshenderin ornatý josparlanýda. Olardy qurastyrý jáne paıdalaný ońaı, qajet bolǵan jaǵdaıda jabdyqty bir jerden ekinshi jerge aýystyrýdyń esh qıyndyǵy joq.

Sondaı-aq, jańa uńǵymalar salý múmkindigi úshin jerasty sýlaryna qosymsha barlaý júrgiziledi.

Oblysta eskirgen tazartý qurylystary máselesin sheshýge kiristi. Bıyl Ulytaýda tazartý qurylystaryn, Abaı men Qarabasta káriz sorǵy stantsııalaryn salýdy aıaqtaý josparlanyp otyr. Qarqaraly aýdanynyń Qaraǵaıly kentinde jáne Aqtoǵaı aýylynda nysandardyń qurylysy kezekte tur.

Oblys ákimi Jeńis Qasymbek aldaǵy birneshe jylda óńirde TKSh jańǵyrtý men damytýdyń qazaqstandyq ortalyǵynyń kómegimen 7 káriz-tazartý qurylystaryn salý josparlanǵanyn habarlady.

«Halyqty sapaly aýyz sýmen qamtamasyz etý - jergilikti bılik organdary jumysynyń mańyzdy basymdyqtarynyń biri. Sýmen jabdyqtaý nysandaryn salý jáne jóndeý barysyn qatań baqylaý bolady. Sonymen qatar, ekologııalyq zańnama talaptaryn saqtaý - tazartý qondyrǵylaryn qarastyrý qajet», - dep atap ótti aımaq basshysy.

Jeńis Qasymbek Jezqazǵan óńirinde Esqula sý tartqyshyn salý jáne Balqashtaǵy Toqyraý - Saıaq sý tartqyshyn rekonstrýktsııalaý boıynsha jobalardyń iske asyrylýy erekshe baqylaýda ekenin eske saldy.


Joǵary qaraı