Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandy oblysynda arnaıy koks óndiretin zaýyttyń qurylysy bastaldy

2021 jyldyń 13 qazan 2021 17:46

QARAǴANDY. QazAqparat - Qazaqstan Táýelsizdiginiń 30 jyldyǵynda ERG (Eýrazııalyq Top) quramyndaǵy «Shubarkól kómir» AQ-nyń ónerkásip alańynda arnaıy koks óndiretin jańa zaýyttyń qurylysyna kapsýla salý rásimi ótti, dep habarlaıdy QazAqparat.

Qada qaǵý rásimine Qaraǵandy oblysynyń ákimi Jeńis Qasymbek, ERG Dırektorlar keńesiniń múshesi Shýhrat Ibragımov, «Eýrazııalyq Top» JShS basqarma tóraǵasy Serik Shahajanov pen «Shubarkól kómir» AQ prezıdenti Rýstam Ibragımov qatysty.

«Shubarkól kómir» AQ – Qazaqstandaǵy eń iri energetıkalyq kómir óndirýshilerdiń biri. Negizgi óndirispen qatar munda kómirdi tereń óńdeý baǵdarlamasy bar.

Jańa zaýyttyń qurylysy – ERG-diń ımportty almastyrý memlekettik baǵdarlamasyna qosqan úlesi. Bul baǵytty damytý qajet ekenin Elbasy Nursultan Nazarbaev pen Qazaqstan Prezıdenti Qasym-Jomart Toqaev birneshe márte aıtqan bolatyn.




Jańa kásiporynda 120 jumys orny ashylady. Zaýyttyń qýaty – jylyna 400 myń tonna ónim. Jobaǵa 40 mlrd. teńgeden astam ınvestıtsııa quıý josparlanǵan.

Negizgi ónimnen bólek, jylyna 72 000 tonna kómir shaıyry men kómir maıyn óndirý kózdelgen. Óndiriske qajetti shıkizat – Shubarkól kenishiniń «D» markaly kómiri.

«Zaýyt qurylysy ımportty almastyrý baǵdarlamasy aıasynda júzege asyrylǵan tabysty jobalardyń biri», - dedi Qaraǵandy oblysynyń ákimi Jeńis Qasymbek.




«Jobaǵa shamamen 40 mıllıard teńge ınvestıtsııa salý josparlanyp otyr, 120 jańa jumys orny qurylady, barlyq normalarǵa tolyq sáıkes keletin zamanaýı jabdyqtar jetkiziledi. Eń zamanaýı quraldar men tehnologııalardy qoldaný esebinen Nura aýdanynda josparlanyp otyrǵan arnaıy koks óndirisi jańa jáne zamanaýı zaýyt bolady.

2005 jyly Shubarkól kómir alańynda qýaty jylyna 210 myń tonna arnaıy koks óndiretin zaýyt salyndy. Qara metallýrgııanyń damýyna baılanysty, onyń ónimderine qajettilik artqan.




«ERG-diń Qazaqstandaǵy aýqymdy josparlary bar. Taıaý jyldary biz jańa jobalarǵa jáne qolda bar óndiristerdi jańǵyrtýǵa 6 mlrd. dollardan astam ınvestıtsııa salýdy josparlap otyrmyz», - dedi ERG Dırektorlar keńesiniń múshesi Shýhrat Ibragımov.

«Arnaıy koks óndiretin zaýyt salý – Shubarkól kómiri men ERG jalpy óz qýatyn arttyryp kele jatqanynyń jarqyn dáleli. Biz joǵary qosylǵan quny bar ónim óndirisin ulǵaıta alamyz jáne qalpyna keltirgish ımportynyń mańyzdy bóliginen bas tarta alamyz. Osylaısha, bizdiń Top óndiretin ferrohromdaǵy qazaqstandyq úlesti arttyramyz.

Jańa zaýytty Sinosteel Equipment and Engineering CO LTD. kompanııasy jobalaǵan. ERS-kelisim sharttaryna sáıkes búkil qurylys, sondaı-aq iske qosý-jóndeý jumystaryn China Nonferrous Metal Industry's Foreign Engineering and Construction Co Ltd. (NFC China) kompanııasy óz moınyna aldy.

«Nysan óndiris qaýipsizdigi men qorshaǵan ortany qorǵaýdyń eń zamanaýı ozyq tehnologııalyq sheshimderi men avtomatıkany paıdalanatyn bolady. Qazaqstan zańnamasynyń barlyq normalaryna tolyq sáıkes keledi», - dep atap ótti «Shubarkól kómir» AQ prezıdenti Rýstam Ibragımov.

Atap aıtqanda, jobada pırolızdi ornatý alańynda skrınıng, usaqtaý jáne tasymaldaý, kómir men jartylaı koksty saqtaý jáne tasymaldaý kezinde paıda bolatyn kómir shańyn qarmap qalýǵa arnalǵan aspıratsııalyq júıe qarastyrylǵan. Budan bólek, elektr energııasyn, jylý men sýdy únemdeýdi qamtıtyn energııa únemdeý jónindegi is-sharalar kesheni ázirlendi. Tehnologııada paıdalanylatyn barlyq sý resýrstary men lastanǵan aǵyndar tazartylyp, qaıtadan sýmen jabdyqtaýdyń aınalym júıesine jiberiletin bolady.

Jańa óndiristi 2023 jyly paıdalanýǵa berý josparlanyp otyr. Zaýyt ERG kásiporyndarynyń ishki qajettilikterin tolyq qamtamasyz etýge múmkindik beredi. Sondaı-aq, ónimderdi eksporttaý múmkindigi qarastyrylady.

Búgingi kapsýlada Shubarkól eńbek ujymynyń 2071 jylǵy kompanııa qyzmetkerlerine joldaǵan haty da bar.


Basty sózder: Qaraǵandy oblysy, Qurylys, Ónerkásip,
Joǵary qaraı