Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandy oblysy turǵyn úı qurylysy boıynsha rekord ornatty

2021 jyldyń 12 qazan 2021 16:09

QARAǴANDY. QazAqparat – Qaraǵandy oblysy turǵyn úıdi paıdalanýǵa berý boıynsha tarıhı maksımýmǵa shyqty. 30 jyl ishinde alǵash ret bıyl 662 myń sharshy metr paıdalanýǵa beriledi. Kóp jyldan beri ıgerilmegen jerlerde jańa aýdandar paıda boldy, dep habarlaıdy QazAqparat tilshisi.

«Ótken jylmen salystyrǵanda bizde turǵyn úı qurylysy 25% artty. 2021 jyldyń 9 aıynda 400 myń sharshy metr turǵyn úı paıdalanýǵa berildi. Bıyl 662 myń sharshy metrdi paıdalanýǵa berý josparlanǵan», – dedi oblystyq Sáýlet jáne qala qurylysy basqarmasynyń basshysy Abzal Jaılybaev.

Oblystaǵy aýqymdy qurylys jergilikti eńbek naryǵyn jáne qurylys materıaldary óndirisin jandandyrdy. Jumysta negizinen otandyq ónimder qoldanylady. Jergilikti óndiristi damytý oblys ákimdiginiń basty mindetteriniń biri boldy. Bes myńnan astam adam qurylys sektorynda jumyspen qamtylǵan.




Jańa turǵyn úıdiń iske qosylýymen kezektilik kórinisi de ózgerýde. Jyl saıyn «Nurly jer» baǵdarlamasy boıynsha halyqtyń áleýmettik osal toptaryna 2-2,5 myń páter bólinedi. Bul – jalǵa beriletin jáne nesıelik turǵyn úıler. Barlyǵy kezekte turǵandardyń tabysyna baılanysty.

Qaraǵandylyq kópbalaly ana Saıagúl Nııazbekova bıyl Ońtústik-Shyǵystaǵy jańa úılerdiń birinen eki bólmeli páter aldy. Buǵan deıin kezekte 13 jyl turdy. Ol farmkompanııada bólshektep ólsheýshi bolyp jumys isteıdi.

«Qańtar aıynda ákimdikten páter kiltin aldym. Emotsııalarym, árıne, keremet boldy, qýanyshtan kózime jas keldi. Buǵan deıin tórt balammen JBI-degi barak úlgisindegi úıde turdyq. Sý joq, pesh jaǵyldy. Endi men jumystan sharshap kelgende, jyly úıime kiremin, qubyrdan ystyq jáne sýyq sý aǵyp tur. Aıaldama men mektep jaqyn. Serýendeýge arnalǵan saıabaq bar», – deıdi qonystanýshy.




Saıagúl Nııazbekovanyń baspanasyn memleket satyp alý quqyǵynsyz jalǵa berdi. Ol aıyna 7 800 teńge jáne kommýnaldyq qyzmetterdi tóleıdi.

Bıylǵy jyly Saıagúldiń shańyraǵynda qos qýanysh. Memleket úlken ulyna otbasymen birge «Shańyraq» baǵdarlamasy boıynsha páter berdi. Ol áıelimen (bala kezinen múgedek) úsh jasar erekshe egizder tárbıelep otyr.

Jyl sońyna deıin Qaraǵandy oblysynda kezekte turǵan 3 myńǵa jýyq adam baspanamen qamtylady. Aldaǵy ýaqytta 830 myń sharshy metr turǵyn úı salý josparda bar.





Joǵary qaraı