Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandy drama teatry Áshirbek Syǵaı atyndaǵy festıvalde Gran-prı jeńip aldy

2021 jyldyń 19 qazan 2021 00:04

QARAǴANDY. QazAqparat – Qaraǵandyda respýblıkalyq teatr festıvali aıaqtaldy. Áshirbek Syǵaı atyndaǵy bas júldeni «Qulager» spektakli úshin Ǵabıt Músirepov atyndaǵy Qazaq balalar men jasóspirimder teatry ıelendi (Almaty qalasy). Táýelsizdiktiń 30 jyldyǵy Gran-prı júldesi «Elektra» qoıylymy úshin Sáken Seıfýllın atyndaǵy Qaraǵandy qazaq drama teatryna berildi, dep habarlaıdy QazAqparat tilshisi.

Belgili teatr synshysy, professor Áshirbek Syǵaı atyndaǵy birinshi festıvalge 15 qazaqstandyq teatr qatysty.

Qazylar alqasynyń aıtýynsha, olardyń repertýary qyzyqty ári alýan túrli boldy.

Kórermen nazaryna klassıkamen qatar zamanaýı janrlar da usynyldy.

«Áshirbek Syǵaı atyndaǵy festıval dástúrge aınalǵanyn qalaımyz. Ony eki jylda bir ret ótkizý josparda bar. Jas rejısserler shyǵarmashylyqqa jańa ıdeıalar engizýde, sondyqtan qazaq teatrynyń bolashaǵyna senimmen qaraýǵa bolady», – dep atap ótti qazylar alqasynyń múshesi Mıras Ábil.

Festıval sońynda 15 nomınatsııa boıynsha jeńimpazdar anyqtaldy, onyń ishinde eki Gran-prı boldy.

J. Shanın atyndaǵy Shymkent qalalyq akademııalyq qazaq drama teatry Áshirbek Syǵaıdyń shákirtterinen arnaıy syılyq aldy.

Birinshi oryndy memlekettik qýyrshaq teatry (Almaty q.), ekinshi oryndy Shymkent qalalyq J. Shanın atyndaǵy akademııalyq qazaq drama teatry, úshinshi oryndy «Darıǵa-aı» jastar teatry (Semeı q.) ıelendi.

Nomınatsııa boıynsha jeńimpaz atanǵandar:

– «Úzdik rejıssýra» – Dına Qunanbaı (N. Jantórın atyndaǵy Mańǵystaý mýzykalyq drama teatrynyń «Naızaǵaı» spektakli);

– «Úzdik akter» – Abzal Ratbek (N. Jantórın atyndaǵy Mańǵystaý mýzykalyq drama teatry);

– «Úzdik aktrısa» – Amıra Omarova (S. Seıfýllın atyndaǵy Qaraǵandy oblystyq qazaq akademııalyq drama teatry);

– «Úzdik stsenografııa» – B. Rımova atyndaǵy Taldyqorǵan drama teatry;

– «Úzdik akterlik ansambl» – K. S. Stanıslavskıı atyndaǵy Qaraǵandy orys drama teatry;

– «Ekinshi plandaǵy úzdik akter» – Maksım Mıheev (Aqmola oblystyq orys drama teatry);

- «Ekinshi plandaǵy úzdik aktrısa» – Ajar Shakirjanova (Nur-sultan qalasynyń Á. Mámbetov atyndaǵy memlekettik drama jáne komedııa teatry);

– «Úzdik epızodtyq ról»: áıelder arasynda – Erkejan Tóleýbek (J.Aımaýytov atyndaǵy Pavlodar oblystyq qazaq mýzykalyq drama teatry) jáne erler arasynda – Oljas Bekaıdarov (I. Omarov atyndaǵy Qostanaı oblystyq qazaq drama teatry).

Bas júldeni ıelengen «Qulager» saýnd-dramasynyń rejısseri Farhad Moldaǵalıdiń aıtýynsha, bul onyń birneshe jyl boıy júreginde saqtap, oıyn júzege asyrǵan erekshe spektakl.

«Festıvalge meniń úsh qoıylymym qatysty. Solardyń biri – «Qulager» saýnd – dramasy bas júldeni jeńip aldy. Spektakldi biz bir jarym jyl buryn daıyndadyq, biraq pandemııaǵa baılanysty az kórsetildi. Bul bizdiń alǵashqy jeńisimiz», – dep atap ótti Ǵ. Músirepov atyndaǵy Qazaq balalar men jasóspirimder teatrynyń kórkemdik jetekshisi, rejısser Farhad Moldaǵalı.

Al «Úzdik aktrısa» nomınatsııasynyń jeńimpazy Amıra Omarovaǵa attas spektaklde óziniń keıipkeri Elektrany oınaý óte qıyn boldy, biraq ol óz rólin keremet oryndady.

«Maǵan Elektrany somdaý qıyn boldy, sebebi bul - erekshe keıipker. Spektakldiń ózi - psıhologııalyq. Meniń jumysymdy joǵary baǵalaǵanyna qýanyshtymyn», – dedi Sáken Seıfýllın atyndaǵy Qaraǵandy memlekettik drama teatrynyń aktrısasy Amıra Omarova.



Joǵary qaraı