Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qańtar oqıǵasy kezinde nysandardy tonaǵandar qalaı anyqtalyp jatyr

2022 jyldyń 25 qańtar 2022 19:15

NUR-SULTAN. QazAqparat – Tártipsizdik kezinde urlyq jasaǵany úshin 274 adam ýaqytsha ustaý abaqtysyna qamaldy. Bul týraly búgin Ortalyq kommýnıkatsııalar qyzmetinde QR ІІM Tergeý departamentiniń bastyǵy Sanjar Ádilov málim etti, dep habarlaıdy QazAqparat tilshisi.

«Urlyq pen tonaý qylmysyn jasaǵany úshin 274 adam ýaqytsha ustaý abaqtysyna qamaldy. Ustalǵandardyń kinási urlanǵan taýarlar men qarý túrindegi alynǵan zattaı dáleldemelermen, sondaı-aq beınebaqylaý kameralarynyń jazbalarymen, áleýmettik jelilerdegi rolıktermen, kúdiktilerdiń ózderiniń uıaly telefondarynan tabylǵan derektermen dáleldenedi. Mysaly, 19 qańtarda Almaty qalasynda 18 jastaǵy turǵyn ustaldy. Onyń uıaly telefonynan azyq-túlik dúkenderiniń birinde urlyq jasaǵan beınejazba, urlanǵan zattar aıasynda «selfı» jasaǵany jáne eń soraqysy, kóshede bir polıtsııa qyzmetkerin top bolyp qatygez uryp-soǵýǵa qatysqany anyqtaldy. Bul beınejazbalardyń barlyǵyn kúdiktiniń ózi jasaǵan. Ol ýaqytsha ustaý abaqtysyna qamaýǵa alyndy», - dedi S. Ádilov.

Osy oraıda ol mundaı faktiler kóp ekenin atap ótti.

«Qazirgi ýaqytta óndiristegi qylmystyq ister boıynsha aryzdanǵan zalaldyń aldyn ala jalpy somasy 87 mlrd teńgeden asty. Zardap shekkenderdiń aryzdanýy barysynda bul soma ósip keledi», - dedi Tergeý departamentiniń bastyǵy.

Budan buryn habarlanǵandaı, tártipsizdik kezinde zaqym kelgen nysandar men kólikter sany belgili boldy.

Sonymen qatar, qarýdy urlaǵany úshin 98 adam ustalyp, ýaqytsha ustaý abaqtysyna qamaldy jáne olardy zańsyz saqtaǵany úshin 61 adam ustaldy.

Sanjar Ádilov elimizdegi tártipsizdik kezinde qozǵalǵan qylmystyq ister týraly aıtyp berdi.


Joǵary qaraı