Kanadada daýyl soǵyp, 900 myńnan astam úı jaryqsyz qaldy

TORONTO. QazAqparat - Kanadanyń ońtústigindegi Ontarıo jáne Kvebek provıntsııalarynda qatty daýyl saldarynan 900 myńǵa jýyq úı jaryqsyz qaldy, dep habarlaıdy QazAqparat VVS aqparat agenttigine silteme jasap.

Tabıǵı apat saldarynan ústine aǵash qulaǵan tórt adam kóz jumdy, al Ottava ózeninde qaıyq aýdarylyp, bir áıel sýǵa batyp ketti.

Kanadanyń qorshaǵan ortany qorǵaý mınıstrliginiń málimetinshe, jel ekpini 132 km/saǵ jetken.

Daýyldan soń kóp aǵash qulap, kólik qozǵalysy buzyldy, kóptegen úıler zardap shekti, tótenshe jaǵdaılar qyzmeti kómekke shaqyrǵan qońyraýlardy qabyldap úlgermedi.

Ontarıo provıntsııasyn qamtıtyn Hydro One energetıka kompanııasy árbir úıdi elektr qýatyna qaıta qosý úshin birneshe kún qajet ekenin málimdedi.