Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Infektsııalyq aýrýhanadan shyqqan adam ońaltý sharasyn esten shyǵarmaýy kerek –meıirbıke

2021 jyldyń 13 qazan 2021 15:38

AQTÓBE. QazAqparat - Pandemııa bastalǵan kezde provızorlyq ortalyqta bolyp, naýqastardyń kútimin jasaǵan meıirbıke Araılym Shataeva jańa qural-jabdyqtardyń jetkizilýi jumysty jeńildetkenin aıtty, dep habarlaıdy QazAqparat tilshisi.

Araılym Shataeva Aqtóbe medıtsınalyq kolledjiniń meıirbıke isi mamandyǵy boıynsha támamdap, Aqtóbe qalasyndaǵy jeke emhanalarda bes aı jumys istedi. Keıin týǵan jeri Temir aýdany, Keńqııaq aýylyndaǵy aýrýhanaǵa aýysty. Jas maman jumysqa kirisken soń pandemııa bastaldy. Qala men aýdan, aýyl arasyna blokpos qoıylǵan kezde provızorlyq ortalyqta eńbek etti.

«Koronavırýs ınfektsııasy anyqtalyp, adamdar aýyra bastaǵanda men provızorlyq ortalyqtarǵa da kirip, medtsınalyq kómek kórsettim. Al qazir mobıldi topta júrmin. Provızorlyq ortalyqtyń jumysy óte jaýapty. Biz úshin arnaıy kıim berildi. Qymtanyp, aıaǵymyzǵa etik kıip júrdik. Arnaıy bólme arqyly kirip, sol arqyly ǵana shyǵamyz. Aýylda bir kezde 15-18 adam aýyryp qalyp, em qabyldady. Aýrý belgilerine qaraı hattama boıynsha emdeldi. Rentgenge túsirgen kezde qosymsha esikpen kirip-shyqty. Al biz olar júrgen jerdi qosymsha dezınfektsııaladyq. Temperatýrasyn úsh mezgil ólshep, satýratsııasy 90-nan tómen bolsa ottegi kontsentratoryna qosyldy», - dedi Keńqııaq aýyldyq aýrýhanasynyń meıirbıkesi Araılym Shataeva.

Onyń aıtýynsha, ókpeni jasandy tynys alý apparaty, ottegi kontsentratory naýqastardyń ómirin saqtaý qalýǵa kóp septigin tıgizgen.




«Jańa apparattar adam ómirin saqtap qalýǵa kómek kómektesti. Sonymen birge adamnyń erik-jigeri myqty bolýy kerek. Máselen aýylda zeınetker óte aýyr jaǵdaıda aýrýhanaǵa jetkizildi. Tynys alýy nasharlaǵan áje jattyǵý jasap, ózin-ózi qamshylap, aman qaldy. Negizi ottegi kontsentratory óte yńǵaıly. Onda ballon aýystyryp, qajet kezde ottegi jastyǵyn daıyndaý otyrý kerek degen sekildi artyq jumys joq. Tek elektr togy úzdiksiz berilse bolǵany. COVID-19 vırýsynda satýratsııaǵa kóp mán beriledi», - dedi Araılym Shataeva.

Onyń aıtýynsha, provızorlyq ortalyqtyń jumysyn kórgen soń mobıldi topta jumys isteý jeńil. Vırýstan qorǵaný jolyna úırengen aq halattylar úshin shuǵyl sheshim qabyldaý qıyndyq týdyrmaıdy.

«Árkimniń aýrý tarıhy ártúrli. Kóbi bir-birine juqtyrǵan. Salqyndatqyshty qoldanǵandar da aýyryp jatty. Vaktsına saldyrmaǵandar bar arasynda. Keıde alǵashqy kúnderi jaqsy júrip, 3-4 kún ótkende vırýstyń belgileri anyq kórinedi. Infektsııalyq aýrýhanadan shyqqan adam ońaltý sharasyn esten shyǵarmaýy kerek. Keıbiri 3-4 aı, al keıbiri odan da kóp ýaqyt boıy dárigerler baqylaýynda bolýy tıis. Árıne, ár adam qorǵanyp júrýi kerek. Joly qarapaıym – maska taǵý, qoldy jýyp, antısektık paıdalaný. Sonymen birge vaktsına saldyrý kerek. Otbasym túgel ımmýndaý sharasyna qatysty», - dedi Araılym Shataeva.

Aıta keteıik, oblysta bir táýlikte 77 adamnan COVID-19 anyqtaldy. Onyń kóbi Aqtóbe qalasynyń turǵyny. Qazirgi kezde oblys boıynsha vırýs juqtyrǵandardyń 95,4% jazyldy. Degenmen áli de 9072 adam úı karantıninde.


Joǵary qaraı